ရှမ်းပြည်နယ် ရင်းနှီးမြှုပ်နှံမှုကော်မတီမှ အလုပ်အကိုငိအခွင့်အလမ်း ၁၀၀၀ ကျော်ရရှိမည့် ရင်းနှီး မြှုပ်နှံမှုလုပ်ငန်း ၁၈ ခုအားခွင့်ပြုပေးခဲ့ကြောင်း ပြည်နယ်ရင်းနှီးမြှုပ်နှံမှုကော်မတီ၏ (၁/၂၀၂၃) အစည်းအဝေးမှ သိရသည်။
ရှမ်းပြည်နယ် ရင်းနှီးမြှုပ်နှံမှုကော်မတီ၏ (၁/၂၀၂၃)အစည်းအဝေးအား ဇန်နဝါရီ ၂၃ ရက်နံနက် ၁၀ နာရီခွဲက တောင်ကြီးမြို့ရှိ ရှမ်းပြည်နယ် အစိုးရအဖွဲ့ရုံး၌ကျင်းပရာ ပြည်နယ်ဝန်ကြီးချုပ်ဒေါက်တာကျော်ထွန်းတက်ရောက်ခဲ့သည်။
ပြည်နယ်ရင်းနှီးမြှုပ်နှံမှုကော်မတီမှ နိုင်ငံခြားရင်းနှီးမြှုပ်နှံမှုလုပ်ငန်း ၅ ခု၊မြန်မာနိုင်ငံသားရင်းနှီး မြှုပ်နှံမှုလုပ်ငန်း ၁၃ ခု(စုစုပေါင်း ၁၈ ခု)အား ခွင့်ပြုပေးခဲ့ခြင်းဖြစ်ပြီး ယင်း လုပ်ငန်းများမှ ရှမ်း ပြည်နယ်အတွင်းနေထိုင်သည့် မြန်မာနိုင်ငံသားအလုပ်သမား ၉၉၄ ဦးနှင့်ပြည်ပ ၅၃ ဦးအတွက် အလုပ်အကိုင်များရရှိမည်ဖြစ်ကြောင်း သိရသည်။
ရှမ်းပြည်နယ်အတွင်း ရင်းနှီးမြှုပ်နှံမှုများစီးဝင်လာကာ ပြည်နယ်စီးပွားရေးမြှင့်တက်လာပြီး ဒေသခံများအတွက် အလုပ်အကိုင်အခွင့်အလမ်းများစွာဖော်ဆောင်နိုင်မည်ဖြစ်၍ ရင်းနှီးမြှုပ်နှံမှု လုပ်ငန်းများကို ဖိတ်ခေါ်ဖော်ဆောင်ရွက်ရန် ရှမ်းပြည်နယ်ရင်းနှီးမြှုပ်နှံမှုကော်မတီ ဥက္ကဋ္ဌ၊ဝန်ကြီးချုပ်ဒေါက်တာကျော်ထွန်းက မှာကြားခဲ့သည်။
ထို့ပြင် ရရှိလာသည့်လုပ်ငန်းများအား မြန်ဆန်စွာ အတည်ပြုခွင့်ပြုပေးသွားမည်ဖြစ်ကာ ပြည်နယ်အတွင်းရှိ ရင်းနှီးမြှုုပ်နှံမှုလုပ်ငန်းများ လွယ်ကူချောမွေ့စေရန် ကူညီဆောင်ရွက်ပေးရမည်ဟု မှာကြားခဲ့သည်။
ရှမ်းပြည်နယ် ရင်းနှီးမြှုပ်နှံမှုကော်မတီအတွင်းရေးမှူးဦးလေးနိုင်မှ ထောပတ်သီးစိုက်ပျိုးခြင်းနှင့် သစ်သီးများပြုပြင်ထုတ်လုပ်ခြင်းလုပ်ငန်းအား တည်ဆောက်ရေးတိုးမြှင့်ခွင့် တင်ပြလာခြင်းအား ပြည်နယ်ဝန်ကြီးချုပ်ထံ ရှင်းလင်းတင်ပြခဲ့သည်။
