ကချင်ပြည်နယ်၊မိုးညှင်းမြို့တွင် ၃ နှစ်တစ်ကြိမ်ကျင်းပသည့် ဇောတိရှမ်းမျိုးနွယ်စုများ၏ ၂၃ ကြိမ်မြောက် ရိုးရာစုပေါင်းရှင်ပြုပွဲအား ဇန်နဝါရီ ၂၉ ရက်(မနက်ဖြန်)မှစတင်၍ ဖေဖော်ဝါရီ ၄ ရက်အထိ ကျင်းပသွားမည်ဖြစ်ကြောင်း သိရသည်။
ဇောတိရှမ်းမျိုးနွယ်စုများ၏ စုပေါင်းရှင်ပြုပွဲအား မိုးညှင်းမြို့၊မြို့မရပ်ကွက်ရှိ ပညာလင်္ကာရဇောတိရှမ်းကျောင်း၌ ရိုးရာအစဥ်အလာအတိုင်း ကျင်းပသွားမည်ဖြစ်ကြောင်း သိရသည်။
“ဇောတိရှမ်းမျိုးနွယ်စုတွေရဲ့ စုပေါင်းရှင်ပြုပွဲကို မိုးညှင်းမြို့က ပညာလင်္ကာရဇောတိရှမ်းကျောင်းကပဲလုပ်ပေးပါတယ် ဒါ့ကြောင့် မြန်မာတစ်နိုင်ငံလုံးမှာရှိတဲ့ ဇောတိရှမ်းမျိုးနွယ်စုတွေလာကြတယ် ၃ နှစ်တစ်ကြိမ်ကျင်းပပါတယ်”ဟု စုပေါင်းရှင်ပြုပွဲကျင်းပရေးကော်မတီ၏ တာဝန်ရှိသူတစ်ဦးကပြောသည်။
ဇောတိရှမ်းမျိုးနွယ်စုများ၏ ၂၃ ကြိမ်မြောက်စုပေါင်းရှင်ပြုပွဲတွင် ရှင်သာမဏေလောင်း ၂၇၃ ပါးရှိပြီး တနေ့လျင် ရှင်သာမဏေ ၄၆ ပါးစီအား ရှင်သာမဏေအဖြစ်သို့သွတ်သွင်းချီးမြှောက်သွားမည်ဖြစ်ကြောင်း သိရသည်။
“ဇောတိရှမ်းမျိုးနွယ်စုတွေရဲ့ ရှေးရိုးရာအစဥ်အလာအတိုင်းကျင်းပတာဖြစ်တဲ့အတွက် ရှင်သာမဏေလောင်းတွေကို ရပ်မိရပ်ဖတွေက ရှင်လောင်းအပ်ရတယ် နောက်ပြီး ရှင်သာမဏေလောင်းတွေက ဝိနည်း(၃)ကြမ်း၊အဘိဓမ္မာ(၇) ကြမ်း၊မင်္ဂလသုတ်တော်၊သင်္ကန်းတောင်း၊ဆုပေးနဲ့ရှင်ကျင့်ဝတ်တွေကိုကြိုပြီးလေ့လာသင်ယူရတယ်”ဟု စုပေါင်းရှင်ပြုပွဲကျင်းပရေးကော်မတီ၏ တာဝန်ရှိသူတစ်ဦးကပြောသည်။
စုပေါင်းရှင်ပြုပွဲသို့လာရောက်သည့် အနယ်နယ်အရပ်ရပ်မှ ဇောတိရှမ်းမျိုးနွယ်စုများတည်းခိုနေထိုင်နိုင်ရန် နန့်ရင်းချောင်းသဲသောင်ပြင်၌ တည်းခိုတန်းလျားများစီစဥ်ပေးထားကာ အခမဲ့တည်းခိုနိုင်ပြီး စတုဒိသာကျွေးမွေးလှူဒါန်းမှုများလည်းရှိကြောင်း သိရသည်။
