ကချင်ပြည်နယ် အခြေစိုက်ပါတီ တစ်ခုဖြစ်သည့် ကချင်ပြည်နယ် ပြည်သူ့ပါတီအနေဖြင့် ဒုတိယအကြိမ် ညီလာခံကို ဖေဖေါ်ဝါရီလ(၂)ရက်မှ (၃) ရက်အထိ ကျင်းပခဲ့သည်။
အဆိုပါ ညီလာခံသို ကချင်ပြည်နယ် ဒေသအသီးသီးမှ ညီလာခံကိုယ်စားလှယ်များ စုံညီစွာတက်ရောက်ခဲ့ကြောင်း ပါတီကထုတ်ပြန်ထားသည်။
ပါတီ ဒုတိယအကြိမ် ညီလာခံမှတဆင့် ပါတီဗဟိုအလုပ် အမှုဆောင်အဖွဲ့သစ်ကို ညီလာခံကိုယ်စားလှယ်များ၏ သဘောတူညီချက်ဖြင့် ရွေးချယ်ဖွဲ့စည်းခဲ့ကြောင်း သိရသည်။
အဆိုပါ ဒုတိယအကြိမ် ပါတီညီလာခံမှတဆင့် ကချင်ပြည်နယ် ပြည်သူ့ပါတီ တည်တံ့ခိုင်မြဲရေး၊ ဖက်ဒရယ် ဒီမိုကရေစီ ပိုမိုထွန်းကားရေးနှင့် အမျိုးသား သင့်မြတ်ရေးအတွက် ရိုးသားဖြောင့်မတ်စွာ သယ်ပိုးကြရန်အတွက် သဘောတူညီမှု ရရှိခဲ့ကြောင်း ကချင်ပြည်နယ်ပြည်သူ့ပါတီက သတင်း ထုတ်ပြန်ထားသည်။
ပြီးခဲ့သည့် ဇန်နဝါရီလ (၂၆) ရက်က ဗိုလ်ချုပ်မှူးကြီး မင်းအောင်လှိုင် လက်မှတ်ရေးထိုးထုတ်ပြန်ခဲ့သည့် နိုင်ငံရေးပါတီများ မှတ်ပုံတင်ခြင်း ဥပဒေ (၂၀၂၃) အရ ကချင်ပြည်နယ် ပြည်သူ့ပါတီ အပါအဝင် နိုင်ငံရေးအရ ဆက်လက်ရပ်တည်လိုသည့် နိုင်ငံရေးပါတီများအနေဖြင့် ရက်ပေါင်း (၆၀) အတွင်း ပြန်လည်ကာ ပါတီမှတ်ပုံတင်ရန် လိုအပ်နေပြီး မှတ်ပုံမတင်ပါက နိုင်ငံရေးပါတီအဖြစ်မှ အလိုအလျှောက်ဖျက်သိမ်းခံရမည်ဖြစ်သည်။
ကချင်ပြည်နယ် ပြည်သူ့ပါတီအပါအဝင် တိုင်းဒေသကြီးနှင့် ပြည်နယ်တစ်ခုအတွင်း စည်းရုံးမည့် ပါတီများအနေ ဖြင့် ပါတီဝင် အင်အား (၁၀၀၀) ကို ပါတီ မှတ်ပုံတင်ခွင့်ပြုသည့်နေ့မှစကာ ရက်ပေါင်း (၉၀) အ တွင်း စည်းရုံးရမည်ဖြစ်ပြီး ပါတီမှတ်ပုံတင်ခွင့်ပြုသည့်နေ့မှစကာ ရက်ပေါင်း (၁၈၀) အတွင်း မိမိပါတီ အခြေ စိုက်သည့် တိုင်းဒေသကြီး သို့မဟုတ် ပြည်နယ်အတွင်းရှိ မြို့နယ်အား လုံး၏ (၅) မြို့နယ်တွင် ပါတီရုံးခန်း ဖွင့်လှစ်ရမည်ဖြစ် ကြောင်း ပြဌာန်းထားသည်။
ပါတီမုတ်ပုံတင်ခြင်း ကိစ္စနှင့် ရွေးကောက်ပွဲ ကိစ္စရပ်များအား မေးမြန်းရန် ကချင်ပြည်နယ် ပြည်သူ့ပါတီ ဥက္ကဋ္ဌ ဒေါက်တာတူးဂျာထံ ပေါ်ပြူလာနယူး(စ်)က ဆက်သွယ် ခဲ့သော်လည်း အဆက်သွယ်မရရှိသေးပေ။
