မွန်ပြည်နယ်နှင့် ပဲခူးတိုင်းအစပ်ရှိ နာမည်ကျော် ညောင်ခါးရှည် စစ်ဆေးရေးဂိတ်အပါအဝင် ရန်ကုန် – မော်လမြို င် လမ်းတစ်လျှောက် စစ်ဆေးရေး တင်းကြပ်မှုများနှင့် ထိတွေ့တိုက်ပွဲများ ၊ ဘုရားဖူးယာဉ် ပစ်ခတ်ခံရသည့် ဖြစ်စဉ်များကြောင့် ပြည်တွင်း ခရီးသွားများနှင့် ဘုရားဖူးခရီးသည်များ လာရောက်မှုအခြေအနေမှာ သိသိသာသာ ကျဆင်းခဲ့ကြောင်းသိရသည်။
” ညောင်ခါးရှည် ဂိတ်ကတော့ အဆိုးဆုံးပေါ့ ။ အခုတော့ နည်းနည်းပါးပါး ဖြေလျှော့ပေးတာတွေ့ရတယ်။ အိမ်စီးယာဉ်တွေကို X -Ray မဖြတ်ခိုင်းတော့ဘူးလို့ ကြားတယ်။ ကျန်တဲ့ ကားတွေတော့ အကုန်ဖြတ်နေရတုန်းပဲ။ အချိန်အရမ်းကြာတယ်။ ပြီးတော့ တောက်လျှောက် အစစ်အဆေးကြမ်းတယ်လေ ” ဟု ရန်ကုန် – မြဝတီ ကုန်ကားမောင်းနှင်သူတစ်ဦးက ပြောသည်။
ကျိုက်ထီးရိုး ဘုရားဖူးများအနေဖြင့် လက်ရှိတွင် တစ်ရက်လျင် (၅၀၀) ဝန်းကျင် ဝင်ရောက်မှု ရှိနေပြီး အချို့ရက်များတွင် (၁၀၀၀) ဝန်းကျင်အထိ ဝင်ရောက်မှု ရှိနေကြောင်း စေတီတော် ဂေါပကအဖွဲ့ထံမှ သိရသည်။
လက်ရှိတွင် လုံခြုံရေးအပြည့်အဝ တာဝန်ယူထားသော် လည်း ဘုရားဖူး ယာဉ်များ ပစ်ခတ်ခံရသည့် ဖြစ်စဉ်များ ရှိခဲ့သည့်အတွက် ပြည်သူများအနေဖြင့် စိုးရိမ်ထိတ်လန့်မှုများ ရှိနေဆဲ ဖြစ်ကြောင်း ကျိုက်ထီးရိုး စေတီ ဂေါပကအဖွဲ့ ရုံးအဖွဲ့မှူး ဦးစိုးတင့်က ပြောသည်။
” ဟုတ်တယ် ၊ တော်တော်နည်းသွားတယ်။ လတ်တလော လုံခြုံရေးကတော့ ရဲတပ်ရင်းက လာစောင့်ပေးပါတယ်။ လုံခြုံရေးကတော့ စိုးရိမ်စိတ်တွေ မရှိကြပါနဲ့။ ဘုရားဖူးလာလို့ရပါတယ်” ဟု ဦးစိုးတင့်က ပြောသည်။
ပြီးခဲ့သည့် ၂၀၂၂ ခုနှစ် အောက်တိုဘာလလယ်ကကျိုက် ထီးရိုးဘုရား တောင်တက်ဂိတ်တွင် ပစ်ခတ်မှုများဖြစ်ပွားကာ ဘုရားဖူးပြည်သူ (၃)ဦး သေဆုံးကာ (၁၀) ဦးဝန်ကျင် ထိခိုက်ဒဏ်ရာရခဲ့သည့် ဖြစ်စဉ်ဖြစ်ပွားခဲ့ပြီး အဆိုပါဖြစ်စဉ်နှင့် ပတ်သက်၍ တပ်မတော်နှင့် ဒေသတွင်းလက်နက်ကိုင် အဖွဲ့များအကြား အပြန်အလှန်စွပ်စွဲပြစ်တင်မှုများ လုပ် ဆောင်ခဲ့ကြသည်။
ထို့အပြင် ပြီးခဲ့သည့် ဇန်နဝါရီလ (၂၅) ရက်ကလည်း ကျိုက်ထီးရိုးဘုရားဖူးရန်လာရောက်သည့် ယာဉ်တစ်စီးပေါ်သို့ လက်နက်ကြီးကျည်ကျကာ ပြည်သူ (၁) ဦး သေဆုံးပြီး (၇) ဦး ဒဏ်ရာအပြင်း အထန်ရရှိခဲ့သည့် ဖြစ်စဉ်တစ်ခု မုပ္ပလင်စစ်ဆေးရေးဂိတ်အနီးတွင် ဖြစ်ပွားခဲ့သေးသည်။
” အဓိကတော့ လုံခြုံရေး အခြေအနေပေါ့ ။ ဘယ်အချိန် ဘာထဖြစ်မယ် မသိရဘူးလေ။ အခုက အပေါ်မှာရော အောက်မှာရော ရဲက လုံခြုံရေး ယူပေးထားတာတော့ ရှိပါတယ်။ ဒါပေမဲ့ တစ်ခုခုဖြစ်လို့ ကိုယ့်အဖွဲ့တွေ အန္တရာယ်ဖြစ်ရင် မကောင်းဘူးလေ။ ဒါကြောင့် အစ်မတို့အနေနဲ့တော့ ကျိုက်ထီးရိုး ခရီးစဉ်ကို မစီစဉ်ပေးတော့ဘူး ။ လာမေးရင်တော့ နီးစပ်ရာကို လမ်းညွှန်ပေးလိုက်တာပဲ” ဟု ပြည်တွင်းခရီးသွားအေဂျင်စီ တစ်ခုမှ တာဝန်ရှိသူ တစ်ဦးက ပြောသည်။
ပြီးခဲ့သည့် ဇန်နဝါရီလအတွင်း ကျိုက်ထီးရိုးစေတီသို့ လာရောက်ဖူးမျှော်သည့် ဘုရားဖူးပြည်သူ (၃၀၀၀၀) ဝန်း ကျင် ဝင်ရောက်ခဲ့ပြီး ၂၀၂၂ ခုနှစ် ဒီဇင်ဘာလအတွင်း၌ ဘုရားဖူးပြည်သူ (၂၀၀၀၀) ကျော် ၊ နိုဝင်ဘာလအတွင်းက (၁၅၀၀၀) ဝန်းကျင် အသီးသီး ဝင်ရောက်ခဲ့ကြောင်း စေတီတော် ဂေါပကအဖွဲ့ထံမှ သိရသည်။
ပြီးခဲ့သည့် ၂၀၂၂ ခုနှစ် နှစ်ကုန်ပိုင်းက တောင်တက်ယာဉ်များ ၊ တည်းခိုဆောင်များ အခမဲ့ စီစဉ်ပေးသည့် အခြေအနေရှိခဲ့ပြီး လက်ရှိတွင်အဆိုပါ အစီအစဉ်များ မရှိတော့ဘဲ ပုံမှန်အတိုင်းပြန်လည်ဆောင်ရွက်နေကြောင်းလည်း သိရသည်။
ကိုဗစ်မတိုင်ခင် နှစ်များဆီက ကျိုက်ထီးရိုးဘုရားရင်ပြင်ပေါ် ခြေချစရာ ရှာရခက်လောက်အောင် ညဖက်အိပ်သူများဖြင့် ပျော်စရာ ကျိုက်ထီးရိုးညများကိုတော့ လွမ်းနေကြဆဲဖြစ်သည်။
Photos-ကျိုက်ထီးရိုးရင်ပြင်ပေါ်ပုံများက ပုံဟောင်းများဖြစ်ပြီး ညောင်ခါးရှည်ဂိတ်ပုံများက လွန်ခဲ့သော ၂လကျော်က ပုံများဖြစ်ပါသည်။
