ဖေဖေါ်ဝါရီ (၁)ကထပ်မံ သက်တမ်းတိုးထားသည့် ထပ်တိုး အရေးပေါ်ကာလ (၆)လ သက်တမ်းအတွင်း အကြမ်းဖက်မှုများနှင့် ပတ်သက်၍ ထိရောက်စွာ ကိုင်တွယ်သွားမည်ဖြစ်ကြောင်း တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်က ယမန်နေ့ ဖေဖေါ်ဝါရီ (၉)ရက်က ပြုလုပ်သည့် ရှေ့လုပ်ငန်းစဉ် (၅) ရပ်နှင့် ပတ်သက်၍ လမ်းညွှန်မှုများတွင် ထည့်သွင်းပြောကြားသွားခြင်း ဖြစ်သည်။
“အကြမ်းဖက်မှုများကို ဒုတိယအကြိမ် အရေးပေါ်သက်တမ်းကာလတွင် ထိထိရောက်ရောက် ကိုင်တွယ်ဖြေရှင်းရန် လိုအပ်လာသဖြင့် အရေးကြီးသည့်မြို့နယ်များကို စစ်အုပ်ချုပ်ရေးအမိန့်များ တိုးမြှင့်သတ်မှတ်ခဲ့ရပြီး အကြမ်းဖက်မှုများလျော့ပါးအောင် ကိုင်တွယ်ဆောင်ရွက်သွားမှာ ဖြစ်ပါတယ်။ စစ်အုပ်ချုပ်ရေးသတ်မှတ်ခြင်းသည် ပြစ်မှုကျူးလွန်သူများအတွက်သာဖြစ်ပြီး ပြည်သူများကိုကြေညာခြင်း မဟုတ်ပါဘူး။ ပြည်သူများအနေဖြင့် စည်းကမ်းနှင့်အညီ လွတ်လပ်စွာနေထိုင်သွားလာလှုပ်ရှားနိုင်ပြီး လာမည့် (၆)လတာကာလအတွင်း အဆိုပါဒေသများ၏ တည်ငြိမ်အေးချမ်းမှုသည်လည်း အတိုင်းအတာတစ်ခုအထိ တိုးတက်လာမယ်လို့ ယူဆပါတယ်” ဟု ဗိုလ်ချုပ်မှူးကြီး မင်းအောင်လှိုင်က ပြောကြားခဲ့သည်။
၂၀၂၃ ခုနှစ် ဇန်နဝါရီ (၃၁) ရက်က ကာလုံအစည်းအဝေးတွင် တပ်မတော်ကာကွယ်ရေး ဦးစီးချုပ်က ကာလုံထံ တင်ပြသည့် အစီရင်ခံစာတွင် လုံခြုံရေးကို ထိထိရောက်ရောက် တိုးမြှင့်လုပ်ဆောင်ရန် ကျန်ရှိနေသည့် မြို့နယ် (၆၅) မြို့နယ် ကျန်ရှိနေသေးကြောင်း တင်ပြခဲ့ပြီး ဖေဖေါ်ဝါရီ (၁) ရက်မှ စတင်ကာ တိုင်းနှင့်ပြည်နယ်အချို့ရှိမြို့နယ်ပေါင်း (၃၀)ကျော်ကို စစ်အုပ်ချုပ်ရေး ကြေညာမှုများ လုပ်ဆောင်ခဲ့သည်ကို တွေ့ရသည်။
မြန်မာနိုင်ငံတွင် ၂၀၂၁ ခုနှစ် နောက်ပိုင်းတွင်ပေါ်ပေါက်လာသည့် လက်နက်ကိုင် အဖွဲ့အစည်းများသည် ဒီမိုကရေစီပေါ်တွင် သဘောထားကွဲလွဲမှုများကြောင့် ပေါ်ပေါက်လာသည့် အဖွဲ့အစည်းများဖြစ်ပြီး ဒီမိုကရေစီစနစ်တွင် လက်နက်ကိုင်အကြမ်းဖက်ခြင်းကို မည်သည့်နိုင်ငံ၊ မည်သည့်အစိုးရမှ ခွင့်ပြုထားခြင်းမရှိကြောင်းလည်း နစက ဥက္ကဋ္ဌက ဆိုသည်။
ထို့အပြင် အကြမ်းဖက်လုပ်ရပ်များကို လုပ်ကိုင်ဆောင်ရွက်နေသူများအနေဖြင့်လည်း ဒီမိုကရေစီကို နားလည်သဘောပေါက်ရန်လိုအပ်ကြောင်းလည်း နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားခဲ့သည်။
မြန်မာနိုင်ငံတွင် ၂၀၂၁ ခုနှစ် ဖေဖေါ်ဝါရီ (၁) ရက် နောက်ပိုင်းတွင် သာမန်ပျက်စီးမှု မဟုတ်သည့် နိုင်ငံတော်ပိုင်နှင့် ပုဂ္ဂလိကပိုင်ပစ္စည်းများ ပျက်ဆီးဆုံးရှုံးမှု (၄၉၀၀) ကျော်ရှိ၊ လက်ပစ်ဗုံး၊ မိုင်း၊ လက်လုပ်ဗုံးများဖြင့် ပစ်ခတ်တိုက်ခိုက်မှု (၈၅၀၀)ကျော်၊ပစ်ခတ်တိုက်ခိုက်မှု (၉၇၀၀) ကျော် ၊ မီးရှို့ဖျက်ဆီးမှုအကြိမ်ပေါင်း ၁၂၃၀ ကျော်ရှိခဲ့ကြောင်း နစကဖက်က သတင်းထုတ်ပြန်ထားသည်။
အဆိုပါ ဖြစ်စဉ်များအတွင်း သိမ်းဆည်းရမိသည့် လက်နက်ပေါင်း ၁၇၆၉၀ ကျော်၊ လက်လုပ်မိုင်းနှင့် ဗုံးအလုံးရေ ၂၇၂၀၀ ကျော်အပါအဝင် လက်နက်ခဲယမ်းများစွာဖမ်းဆီးရမိခဲ့ကြောင်းလည်းထုတ်ပြန်ထားသည်။
