မြန်မာနိုင်ငံတွင် သာမန်အရပ်သားပြည်သူများ အပါအဝင် ဌာနဆိုင်ရာဝန်ထမ်းများ ၊ ပြည်သူ့စစ်များနှင့်လုံခြုံရေးအဖွဲ့များအား လုံခြုံရေးအတွက် လိုအပ်ပါက သေနတ်ကိုင်ဆောင်ခွင့်ပြုရန် နစကက ဇန်နဝါရီ (၃၁) ရက် ရက်စွဲဖြင့် ထုတ်ပြန်ကြေညာခဲ့ခြင်း ဖြစ်သည်။
ဒီဇင်ဘာလက ကျင်းပခဲ့သည့် ပြည်ထောင်စု အစိုးရအဖွဲ့အစည်းအဝေး အမှတ်စဥ် (၉/၂ ၀၂၂)၏ သဘောတူ ခွင့်ပြုချက်အရ လက်နက်ခဲယမ်းကိုင်ဆောင်ခွင့်မူနှင့် လက်နက်လိုင်စင်ပုံစံအမှတ်(၁၆) စာအုပ်တို့အား အမိန့်အမှတ် (၅၄/၂၀၂၃)ဖြင့် ဇန်နဝါရီ (၃၁) ရက်က ထုတ်ပြန်ကြေညာခဲ့ခြင်း ဖြစ်သည်။
အဆိုပါ လက်နက်ခဲယမ်းကိုင်ဆောင်ခွင့်မူအရ မြန်မာနိုင်ငံတွင် အသက် (၁၈) နှစ်ပြည့်ပြီးသူများအနေဖြင့် လုံခြုံမှုအတွက် သေနတ်ကိုင်ဆောင်ရန် အမှန်တကယ်လိုအပ်ပါက အစိုးရက ခွင့်ပြုထားသည့် သေနတ်များကို လိုင်စင် သို့မဟုတ် ပါမစ် ဖြင့်ကိုင်ဆောင်ခွင့်ပြုမည်ဖြစ်ကြောင်း သိရသည်။
လက်နက်ခဲယမ်းကိုင်ဆောင်ခွင့်မူနှင့် လက်နက်လိုင်စင်ပုံစံ အမှတ်(၁၆) အရ ကိုင်ဆောင်ခွင့်ပြုမည့် သေနတ်အမျိုးအစားများမှာ ၉ မမ အမျိုးအစား သေနတ်များ၊ (.၂၂) အမျိုးအစား သေနတ်၊ ရိုင်ဖယ်နှင့် စက်ကလေး အမျိုးအစား သေနတ်များ၊ အမဲလိုက်သေနတ်နှင့် လေသေနတ်အမျိုးအစားများ ပါဝင်ကြောင်း သိရသည်။
အဆိုပါ အမိန့်ထုတ်ပြတ်ချက်အရ သာမန်အရပ်သား ပြည်သူများအနေဖြင့် လိုင်စင်ဖြင့် သေနတ်ကိုင်ဆောင်နိုင်ပြီး ပါမစ်ဖြင့် ကိုင်ဆောင်ရမည့် သေနတ်များကို အစိုးရပိုင်သေနတ်အဖြစ် မှတ်ပုံတင်ရမည်ဖြစ်ပြီး အဆိုပါ အုပ်စုထဲတွင် ပါဝင်သည့် ရိုင်ဖယ်နှင့် စက်ကလေး အုပ်စုဝင်သေနတ်များကို ဒေသန္တာရလုံခြုံရေးအဖွဲ့များ၊ သောင်းကျန်းသူဆန့်ကျင်ရေးအဖွဲ့အစည်း(မူရင်းအသုံးအနှုန်းဖြစ်ပါသည်) ပြည်သူ့စစ်အဖွဲ့အစည်းများကိုသာ ကိုင်ဆောင်ခွင့်ပြုမည်ဟု ဖော်ပြထားသည်။
လိုင်စင်၊ ပါမစ်ဖြင့် ကိုင်ဆောင်ခွင့်ပြုသည့် သေနတ်များတွင် အဝေးကြည့်မှန်ပြောင်း(Telescopic Sight)၊အထူးပြုလုပ်ထားသော ချိန်ဆိုဒ်အမျိုးမျိုး(Types of Modified Sights)၊အသံတိတ်စေသောကိရိယာ(Silencer) ကိရိယာများ တပ်ဆင်အသုံးပြုခြင်းကို လုံးဝခွင့်မပြုကြောင်း သိရသည်။
လိုင်စင်ဖြင့် လက်နက်ကိုင်ဆောင်သူများသည် နိုင်ငံတော်၏ လုံခြုံတည်ငြိမ်ရေးကို အနှောင့်အယှက်ပြုနိုင်သူများ၊ ဥပဒေအရ အရေးယူခြင်းခံရဖူးသူများ၊ စိတ်ပေါ့သွပ်သူများ မဖြစ်ရဟုလည်း ကန့်သတ်တားမြစ်ထားသည်။
လိုင်စင်/ ပါမစ်ဖြင့် သေနတ်ကိုင်ဆောင်လိုပါက ပြည်သူ့ဝန်ထမ်း မဟုတ်သူများသည် သက်ဆိုင်ရာ ရပ်ကွက်/ကျေးရွာအုပ်စု စီမံအုပ်ချုပ်ရေးအဖွဲ့နှင့် သက်ဆိုင်ရာရဲစခန်းတို့မှ (၁) လအတွင်း ရယူထားသည့် ထောက်ခံချက် မူရင်းပါရှိရမည်ဖြစ်သည်။
ပြည်သူ့ဝန်ထမ်းများဖြစ်ပါက သက်ဆိုင်ရာဝန်ထမ်းအဖွဲ့အစည်း အကြီးအကဲ၏ ထောက်ခံချက်၊ တပ်မတော်သားများဖြစ်ပါက ကာကွယ်ရေးဦးစီးချုပ်ရုံး(ကြည်း)၏ထောက်ခံချက်ပါရှိရမည်ဖြစ်ကြောင်း သိရသည်။
လက်ရှိကာလတွင် တိုင်းပြည်အတွင်း တစ်ဘက်နှင့်တစ်ဘက် စိတ်သဘောထားကွဲလွဲခြင်း၊ ရန်လိုမုန်းထားမှုများ ရှိနေခြင်းနှင့် အငြိုးအတေးများ ဖြစ်ပေါ်နေချိန်တွင် အဆိုပါ လက်နက်ခဲယမ်းကိုင်ဆောင်ခွင့်မူအရ လက်နက်ကိုင်ဆောင်ခွင့်ပြုခြင်းမှာ ပဋိပက္ခများ ပိုမိုကြီးထွားလာစေနိုင်သလို ဖြစ်နေကြောင်း သုံးသပ်မှုများလည်း ရှိနေသည်။
” နိုင်ငံတကာမှာလည်း သေနတ်ကိုင်ဆောင်ခွင့်ဆိုတာရှိပါတယ်၊ရောင်းဝယ်ခွင့် ၊ရောင်းချခွင့်လည်း ရှိတယ်။ ဒါပေမဲ့ အခြေအနေတွေက မတူဘူးလေ။ တည်ငြိမ်အေးချမ်းပြီး ဒီမိုကရေစီ ထွန်းကားတဲ့ နိုင်ငံတွေမှာတောင် ပစ်ခတ်မှုတွေ၊ လုပ်ကြံသတ်ဖြတ်မှုတွေ ၊အကြမ်းဖက်မှုတွေ၊ ဓားပြမှုတွေ၊ အနုကြမ်းစီးတာတွေ နေ့စဉ်နဲ့အမျှ ဖြစ်နေတာကိုကြည့်ပါ” ဟု အမေရိကန်နိုင်ငံ လော့အိန်ဂျလိမြို့တွင် နေထိုင်နေပြီး လိုင်စင်ဖြင့် သေနတ်ကိုင်ဆောင်ထားသည့် မြန်မာနိုင်ငံသားတစ်ဦး( အမေရိကန်နိုင်ငံသား ခံယူထားသူ)က သုံးသပ်ပြသည်။
“ပုဂ္ဂလိကတစ်ဦးချင်းကိုင်တာထက်စာရင် လုံခြုံရေးနဲ့ဆိုင်တဲ့ပုဂ္ဂလိကအဖွဲ့အစည်းတွေက တရား၀င်လက်နက်ကိုင်ဆောင်ခွင့်ရသွားရင် ဘဏ်တွေ စက်ရုံတွေလုံခြုံရေးယူတဲ့အခါ အချိုးအစားတစ်ခုက လက်နက်နဲ့စောင့်ရှောက်ခွင့် ရသွားနိုင်တာကြောင့် ဘဏ်ဓားပြတိုက်ခံရတာမျိုးတွေ လျော့ပါးလာနိုင်ပါတယ်။လုံခြုံရေးခြိမ်းခြောက်ခံနေရတဲ့နေရာတွေအတွက် balance ဖြစ်သွားနိုင်တာပေါ့”ဟု လုံခြုံရေးကုမ္မဏီတခုကပြောသည်။
“လက်နက်ကိုင်ပြီး ကျင့်၀တ်နားမလည်တဲ့သူလက်ထဲရောက်သွားရင်တော့ အန္တရယ်ဖြစ်နိုင်လို့ လက်နက်ကျွမ်းကျင်မှုသင်တန်း၊ ကိုင်ဆောင်သူကျင့်၀တ်တွေကို လေ့ကျင့်ပြီးမှ လက်နက်ကိုင်သင့်ပါတယ်”ဟု အငြိမ်းစားတပ်မတော်သားတစ်ဦးက အကြံပြုသည်။
ဇန်နဝါရီ (၃၁) ရက် က ထုတ်ပြန်လိုက်သည့် လက်နက်ခဲယမ်းကိုင်ဆောင်ခွင့်နှင့် လက်နက်လိုင်စင်ပုံစံအမှတ် (၁၆) စာအုပ်အပြည့်အစုံကို အများပြည်သူ ဖတ်ရှုလေ့လာနိုင်ရန် ပြန်လည်ဖော်ပြပေးလိုက်ပါသည်။
လူကြီးမင်းတို့အနေဖြင့် ယခု အမိန့်နှင့်ပတ်သက်၍ ကျိုးကြောင်းဆီလျှော်သော သဘောထားများကို လွတ်လပ်စွာ မှတ်ချက်ပေးကြရန်လည်း ဖိတ်ခေါ်အပ်ပါသည်။
