ဖေဖေါ်ဝါရီလ (၁၁) ရက်က ထိုင်းနိုင်ငံ၊ တပ်ခ်ခရိုင်တွင်ဖြစ်ပွားခဲ့သည့် ထိုင်းနိုင်ငံသား မိသားစုဝင် (၅) ဦး သတ်ဖြတ်ခံရမှုနှင့် ပတ်သက်၍ ထိုင်းနိုင်ငံသားများအနေဖြင့် မြန်မာရွှေ့ပြောင်းလုပ်သားများအပေါ် အမြင်လွှဲမှားမှုများ ရှိလာနိုင်သည့်အတွက် သတိထားနေထိုင်ကြရန် ပညာရေးနှင့်ဖွံ့ဖြိုးတိုးတက်ရေးဖောင်ဒေးရှင်း(FED)မှ အမှုဆောင်ဒါရိုက်တာ ဦးထူးချစ်က တိုက်တွန်းထားသည်။
ထိုင်းနိုင်ငံ တပ်ခ်ခရိုင်တွင် ထိုင်းနိုင်ငံသား အလုပ်ရှင်က လုပ်အားခလိမ်လည်သည်ဟု စွတ်စွဲချက်ဖြင့် ထိုင်းအလုပ်ရှင်နှင့် မိသားစုဝင်(၅) ဦးကို မြန်မာရွှေ့ပြောင်းလုပ်သား (၃) ဦးက ယမန်နေ့ ဖေဖေါ်ဝါရီ (၁၁) ရက်က သတ်ဖြတ်ခဲ့ခြင်း ဖြစ်သည်။
အဆိုပါ ဖြစ်စဉ်၏ နောက်ဆက်တွဲအနေဖြင့် ရိုးသားစွာလုပ်ကိုင်စားသောက်နေသည့် သန်းနှင့်ချီ မြန်မာရွှေ့ပြောင်းအလုပ်သမားတွေကို တစ်ချို့ထိုင်းလူမျိုးတွေအနေဖြင့် အမြင်လွဲမှား တိမ်းစောင်းမှုတွေ ဖြစ်လာနိုင်ကြောင်း၊ ထိုင်းနိုင်ငံတွင်းရှိ ဖမ်းဆီးမှုနှင့် တင်းကြပ်မှုတွေဖြစ်ပေါ်လာနိုင်ကြောင်း ဦးထူးချစ်က သတိပေးထားသည်။
ထို့အပြင် ထိုင်းနိုင်ငံတွင်း နေထိုင်လုပ်ကိုင်စားသောက်နေကြသည့် မြန်မာရွေ့ပြောင်းအလုပ်သမားများအနေဖြင့် သတိရှိရှိနေထိုင်ကြဖို့နှင့် ထိုင်းနိုင်ငံ၏ ထုတ်ပြန်ထားသည့် စည်းမျဉ်း/စည်းကမ်းများကိုလက်နာပြီး ထိုင်းနိုင်ငံ၏ တရားဥပဒေများကို လေးစားလိုက်နာကြရန်လည်း ၎င်းက တိုက်တွန်းထားသည်။
အဆိုပါ လူသတ်မှုဖြစ်စဉ်တွင် ထိုင်းနိုင်ငံသား အလုပ်ရှင်အပါအဝင် အလုပ်ရှင်၏ အမျိုးသမီးဖြစ်သူနှင့် (၃) လ သားအရွယ် ကလေးငယ် (၁) ဦး၊ (၇) နှစ်အရွယ် ကလေး (၁) ဦးနှင့် ( ၁၀ ) နှစ်အရွယ် ကလေး (၁) ဦးတို့ သေဆုံးခဲ့ကြောင်း သိရသည်။
အဆိုပါ ပြစ်မှုကျူးလွန်သူ မြန်မာရွှေ့ပြောင်းအလုပ်သမား (၃) ဦးသည် မြန်မာ – ထိုင်းနယ်စပ် မြဝတီဘက်သို့ ထွက်ပြေး တိမ်းရှောင်သွားခဲ့ကြောင်း သိရသည်။
