တရုတ်ပြည်ရောက် မြန်မာနိုင်ငံသားများ ကန့်သတ်နယ်မြေကျော်လွန်သွားရောက်သည့်အတွက် နေရပ်ပြန်လိုပါက အထောက်အထားအစုံအလင်နှင့်တကွ အနည်းဆုံးဒဏ်ကြေးငွေကျပ် ၁၀၀ ပေးဆောင်၍ ပြန်နိုင်ကြောင်း လူသားချင်းစာနာထောက်ထားမှုအကူအညီပေးအပ်ရေးကွန်ယက်မှ သိရသည်။
၆ ညအိပ် ၇ ရက်သက်တမ်းရှိသည့် တစ်ခါသုံး border pass ကိုင်ဆောင်သူများနှင့် စာအုပ်အနီကိုင်ဆောင်ထားသူများသည် ရွှေလီမြို့နယ်အတွင်းသာ သွားရောက်လည်ပတ်ခွင့်ရှိပြီး အချို့မှာ ဥပဒေချိုးဖောက်၍ တရုတ်ပြည်မကြီးအထိ သွားရောက်သူများရှိနေကြောင်းသိရသည်။
“စာရွက်စာတမ်းပြည့်စုံတယ်ဆိုရင် မလိုဘူး။ အခုကျွန်တော်တို့သွားတယ်။ သွားလို့ရှိရင် ၆ ညအိပ် ၇ ရက်ဆိုတာက နန်းတော်ဂိတ်ကနေဝင်သွားရင် ရွှေလီမြို့နယ်အတွင်းမှာပဲ သွားခွင့်ရှိတာလေ။ ရွှေလီမြို့နယ်ကိုကျော်ပြီး ဟိုဘက်တရုတ်ပြည်ထဲကိုသွားတဲ့အချိန်မှာ ပွင့်ပွင့်လင်းလင်းပြောရရင် မသွားရတဲ့နေရာကိုသွားတာပေါ့။ ကန့်သတ်နယ်မြေကိုကျော်သွားတာပေါ့။ အခုနယ်စပ်ကူးတဲ့လက်မှတ်က စာအုပ်အနီပဲဖြစ်ဖြစ် တစ်ခါသုံးပဲဖြစ်ဖြစ် ၆ ညအိပ် ၇ ရက်ပဲသွားလို့ရတယ်။ ဒါပေမယ့်သူက ရွှေလီမြို့နယ်အတွင်းကိုပဲ သွားရတာ။ အဲဒါကို ကျွန်တော်တို့လူတွေက ဟိုဘက်ပြည်မကြီးအထိသွားတော့ တရုတ်ပြည်ရဲ့ ဥပဒေကိုချိုးဖောက်တာပေါ့နော်။ နယ်စပ်ဖြတ်ကျော်တယ်ဆိုပြီးတော့မှ အဲ့လိုအရေးယူတာ။ အဓိကတော့ ထောင် တစ်နှစ်ချမယ်။ ဒဏ်ငွေ ၅၀၀ ပေါ့။ ဒီဘက်က ညှိနှိုင်းတောင်းဆိုတော့ အနည်းဆုံးတစ်ရာဆောင်လို့ရတယ်။ ဒါကလည်းအထောက်အထားရှိတဲ့သူမှ ရတာပါ”ဟု လူသားချင်းစာနာထောက်ထားမှုအကူအညီပေးအပ်ရေးကွန်ယက်မှ တာဝန်ရှိသူတစ်ဦးဖြစ်သည့် ကိုဌေး(နန်းတော်ဂိတ်) ကပြောသည်။
ယင်းအပြင် စာရွက်စာတမ်း မပြည့်စုံသူများမှာ ၇ ရက်ခန့်ကြာမြင့်မည်ပြီး အနည်းဆုံး ဒဏ်ငွေယွမ်တစ်ရာနှင့် တရုတ်ပြည်သို့ဝင်ရောက်ခွင့် တစ်နှစ်ပိတ်မည်ဖြစ်ကာ တရားမဝင်ပြန်လည်ဝင်ရောက်လာပါက ထောင်ဒဏ် (၅) နှစ်ကျခံရမည်ဖြစ်ကြောင်း သိရသည်။
လက်ရှိတွင် နေရပ်ပြန်လိုသူများအနေဖြင့် သက်ဆိုင်ရာ နယ်မြေရဲစခန်းတွင် သွားရောက်သတင်းပို့ရမည်ဖြစ်ပြီး သက်ဆိုင်ရာရဲစခန်းမှထောက်ခံစာယူ၍ ကျယ်ဂေါင် ရဲစခန်းနားမှ နိုင်ငံခြားသားများပြန်လည်ထွက်ခွာနိုင်ရေးဌာနသို့ ထပ်မံသတင်းပို့ရမည်ဖြစ်ကြောင်းသိရသည်။
