မအူပင်ဦးစိန်ဝင်း ဦးဆောင်သည့် NUDP ပါတီအနေဖြင့် ပြည်ထောင်စုအဆင့် ပါတီတစ်ခုအနေဖြင့် ရပ်တည်သွားနိုင်ရန်အတွက် ရင်ဘတ်ချင်းတူသူများနှင့် ပူးပေါင်းသွားမည်ဖြစ်ပြီး လက်ရှိတွင် ဆွေးနွေးချိတ်ဆက်မှုများ လုပ်ဆောင်နေကြောင်း သိရသည်။
“ကျွန်တော်ကတော့ ကြိုးစားနေဆဲရှိပါသေးတယ်။ တိုင်းအဆင့်ကျတော့လည်း ကျွန်တော်က မလုပ်ချင်ဘူးပေါ့ဗျာ။ အဲဒီတော့ ပြည်ထောင်စုအဆင့်အထိလုပ်ဖို့ အခြားကိုယ်လို ရင်ဘတ်ချင်းတူ၊ နှလုံးသားချင်းတူ၊ အသိချင်းတူ ၊ ဉာဏ်ချင်းတူတဲ့ ပါတီမျိုးကို လိုက်ပြီးချိတ်နေတာပေါ့ဗျာ” ဟု ၎င်းက ဆိုသည်။
ပြီးခဲ့သည့် လကုန်ပိုင်းက ပြဌာန်းလိုက်သည့် နိုင်ငံရေးပါတီ မှတ်ပုံတင်ဥပဒေသစ်အရ နိုင်ငံရေးပါတီများအနေဖြင့် (၂) လအတွင်း ပါတီမှတ်ပုံတင် ပြန်လည်လျှောက်ထားရမည်ဖြစ်ပြီး ပြည်ထောင်စုအဆင့် ရပ်တည်မည့် ပါတီများအနေဖြင့် ပါတီဝင်အင်အား (၁) သိန်းစည်းရုံးရမည်ဖြစ်သည်။
ဥပဒေသစ်ပါ ကန့်သတ်ချက်များအရ ယခင် ပြည်ထောင်စုပါတီအဖြစ်ရပ်တည်ခဲ့သည့် ပါတီငယ်များမှာ ဆက်လက်ရပ်တည်ရန် အခက်အခဲရှိနေသည့်အတွက် အခြားပါတီများနှင့် မဟာမိတ်ဖွဲ့ ပူးပေါင်းရမည့် အခြေအနေမျိုးရင်ဆိုင်နေရခြင်း ဖြစ်သည်။
ယင်းအခြေအနေမျိုးတွင် NUDP ပါတီအနေဖြင့် မည်သည့်ပုံစံဖြင့်ပူးပေါင်းရန်စဉ်းစားထားသည်ကို သိရှိလိုကြောင်း ပေါ်ပြူလာနယူး(စ်) ၏ မေးမြန်းမှုကို ဦးစိန်ဝင်းက ယခုလို ရှင်းပြသည်။
“ပေါင်းတာကို စည်ကာချဲ့ပြီး ပြောနေရင် ပြီးမှာမဟုတ်ဘူး။အဲဒီတော့ ကျွန်တော်တို့က အလွယ်ကူဆုံးနည်းလမ်းကိုပဲ သုံးမယ်။ ဆိုလိုတဲ့သဘောက သူ့အောက်ကနေမယ် ။ ကိုယ့်ပါတီက ပုံရိပ်ကောင်းရင် ကိုယ်နဲ့တွဲလုပ်ပေါ့ဗျာ။ အဲဒီသဘောပါ” ဟု ၎င်းကဆိုသည်။
ပြီးခဲ့သည့် ဇန်နဝါရီ (၃၁) ရက်က ထုတ်ပြန်ခဲ့သည့် နိုင်ငံရေးပါတီများ မှတ်ပုံတင်ခြင်းနည်းဥပဒေအရ ပါတီ (၂) သို့မဟုတ် (၂) ခုထက်ပိုသော ပါတီများအနေဖြင့် ပူးပေါင်းကာ ပါတီတစ်ခုအနေဖြင့် ရပ်တည်နိုင်ကြောင်း ပြဌာန်းပါရှိသည်။
အသစ်ပြဌာန်းထားသည့် နိုင်ငံရေးပါတီများ မှတ်ပုံတင်ခြင်း ဥပဒေအရ ယခင်ရှိပြီးသားပါတီများအနေဖြင့် (၂) လအတွင်း မှတ်ပုံပြန်မတင်ပါက နိုင်ငံရေးပါတီအဖြစ်မှ အလိုအလျှောက် ပျက်ပြယ်မည်ဖြစ်ကြောင်း သိရသည်။
ဦးစိန်ဝင်း ဦးဆောင်သည့် NUDP ပါတီ ပြီးခဲ့သည့် ဇန်နဝါရီလအတွင်းက အမည်ပြောင်းထားခြင်းဖြစ်ပြီး ပြီးခဲ့သည့် ၂၀၁၈ ခုနှစ်က အမျိုးသာားညီညွတ်သောဒီမိုကရက်တစ်ပါတီ NUD အမည်ဖြင့် မှတ်ပုံတင်ခဲ့သည့် ပြည်ထောင်စုအဆင့် ပါတီတစ်ခု ဖြစ်သည်။
