စစ်ကိုင်းတိုင်း၏ ကျောက်မျက်စျေးကွက်မှာ ကိုဗစ်(၁၉)ရောဂါကာလမတိုင်ခင်နှင့်နှိုင်းယှဥ်ပါက ကျဆင်းလျက်ရှိသည်ဟု စစ်ကိုင်းတိုင်းကျောက်မျက်လုပ်ငန်းရှင်များအသင်း ဥက္ကဋ္ဌဦးအောင်ကြီးထံမှ သိရသည်။
“စစ်ကိုင်းတိုင်းရဲ့ ကျောက်မျက်စျေးကွက်ကကျနေတယ်။ ကျဆင်းရတဲ့အကြောင်းရင်းကလည်း ပြည်တွင်းမှာကုန်ကြမ်းရှားပါးနေတာရယ်၊ ကျောက်မျက်တူးဖော်ခွင့်တွေ ရပ်ဆိုင်းထားတာတွေရယ်ကြောင့်ပါ”ဟု ဦးအောင်ကြီးကဆိုသည်။
ကျောက်မျက်ကုန်ကြမ်းရှားပါးမှုအား ထိုက်သင့်သလောက်ပြေလည်နိုင်စေရန် အစိုးရမှပြုလုပ်ပေးလျက်ရှိသည့် ကျောက်မျက်ရတနာပြပွဲများ၌ ထိုက်သင့်သလောက်ဝယ်ယူရရှိနိုင်သော်လည်း ကိုဗစ်(၁၉) ရောဂါကာမတိုင်ခင်နှင့်နှိုင်းယှဥ်ပါက များစွာလျော့နည်းသွားသည်ဟု သိရသည်။
“ကိုဗစ်ကာလမတိုင်ခင်ကတော့ ကျောက်မျက်စျေးကွက်က လက်ရှိကာလထက် အများကြီးသာတယ် သာတဲ့အကြောင်းရင်းကလည်း ပြည်ပနိုင်ငံတွေကို လွတ်လွတ်လပ်လပ်နဲ့သွားလာလို့ရသလို ပြည်ပနိုင်ငံတွေရဲ့ကျောက်မျက်စျေးကွက်ကလည်း မြင့်တက်နေတဲ့အချိန်ဖြစ်နေတာကြောင့် အများကြီးအဆင်ပြေတယ်”ဟု ဦးအောင်ကြီးကပြောသည်။
လက်ရှိအချိန်၌ ကျောက်မျက်စျေးကွက်တွင် ပြည်ပဝယ်လိုအား လျော့နည်းနေကာ ပြည်တွင်းဝယ်လိုအားမှာလည်း အနည်းငယ်ကျဆင်းနေပြီး ကျောက်စိမ်းအချောထည်များအား နိုင်ငံတော်သို့အခွန်ပေးဆောင်၍ရောင်းချရသည့် လုပ်ငန်းကိုလည်း ယာယီရပ်ဆိုင်းထားသည်ဟု သိရသည်။
စစ်ကိုင်းတိုင်းအတွင်း၌ တရားဝင်ကျောက်မျက်စျေးမရှိသေးသဖြင့် ကျောက်မျက်ရတနာများအား ရောင်းချရာတွင် လမ်းမများပေါ်နှင့်နေအိမ်ခြံဝိုင်းများအတွင်း၌သာ နေ့စဥ် ရောင်းချနေရပြီး အရောင်း အဝယ် ပြုလုပ်သူနည်းပါးလျက်ရှိကြောင်း သိရသည်။
“စစ်ကိုင်းမှာက ကျောက်ပုတီးတွေအများဆုံးအ ရောင်းအဝယ်လုပ်ကြတာပေါ့၊ အရင်ကထက်စာရင်တော့ အရောင်းအဝယ်ကျဆင်းသွားတယ်၊ နောက်ပြီး အဲ့လိုရောင်းတဲ့အခါမှာလည်း နေရာသတ်မှတ်ချက်တော့မရှိတော့ အဆင်ပြေသလိုရောင်းရတယ်၊ အဲဒီတော့တစ်နေရာနဲ့တစ်နေရာ အရည်အသွေးတူရင်တောင် စျေးနှုန်းကွာဟချက်တွေရှိတယ်၊ တစ်နေရာထဲမှာပဲ သတ်သတ်မှတ်မှတ်ရောင်းချနိုင်ရင် စျေးနှုန်းကွာဟချက်သိပ်မရှိတော့ဘူးပေါ့”ဟု ဦးအောင်ကြီးကပြောသည်။
စစ်ကိုင်းတိုင်းကျောက်မျက်လုပ်ငန်းရှင်များအ သင်းမှကြီးမှူး၍ ကျောက်မျက်ကဏ္ဍတွေ့ဆုံဆွေး နွေးပွဲအား ဖေဖော်ဝါရီ ၁၉ ရက်က မန္တလေးမြို့၌ ပြုလုပ်ခဲ့ရာ မြန်မာနိုင်ငံကျောက်မျက်လုပ်ငန်းရှင်များအသင်းမှအမှုဆောင် ၃ ဦးလည်းတက်ရောက်ခဲ့ကြသည်။
