နိုင်ငံကူးလက်မှတ် ပြုလုပ်သူများပြား၍ ဝက်ဘ်ဆိုဒ်လင့်သို့ ဝင်မရသူများရှိနေ၊ပြန်ပြင်ဖို့ ယ​နေ့တရက်နားမည်

Online Booking စနစ်ဖြင့်နိုင်ငံကူးလက်မှတ် ပြုလုပ်သူများပြား၍ ဝက်ဘ်ဆိုဒ်လင့်သို့ ဝင်မရသူများရှိနေကြောင်း သိရသည်။အချို့ကလည်းလွယ်ကူ​စွာတင်နိုင်ခဲ့​ကြောင်း​ပြောသည်။

နှစ်လကျော်ကြာပြီးမှ နိုင်ငံကူးလက်မှတ်ပြုလုပ်ခွင့်ကို ပြန်လည်ခွင့်ပြုပေးခဲ့ခြင်းကြောင့် ပြည်ပတွင် သွားရောက်အလုပ်လုပ်ကိုင်သူများအပါအဝင် လျှောက်ထားသူများပြားနေခြင်းဖြစ်သည်။

ပတ်စ်ပို့ရုံးပြန်လည်ဖွင့်လှစ်သည့် ဖေဖော်ဝါရီလ ၂၄ ရက် ညနေ ၃ ခွဲဝန်းကျင်မှာတင် ရက်ချိန်းရသူ လူ ၈၅၂၉ နီးပါးရှိနေကြောင်း သိရသည်။

“ ပတ်စ်ပို့ရုံးပြန်ဖွင့်တဲ့နေ့မှာတော့ လျှောက်တဲ့သူက အင်မတန်များတယ်။ လျှောက်တဲ့သူတွေ များလိုလားမသိဘူး။နိုင်ငံကူးလက်မှတ်ထုတ်ပေးရေးရုံး ဝက်ဘ်ဆိုက်ကို တော်တော်နဲ့ဝင်မရဘူး။ ညနေပိုင်းလောက်ကျတော့ ဝင်လို့ရသွားတယ်”ဟု နိုင်ငံကူးလက်မှတ်ပြုလုပ်သူတစ်ဦးက ပြောသည်။

သို့ရာတွင် အချို့သောလျှောက်ထားသူများမှ ငွေပေးချေပြီးသော်လည်း ရရှိမည့်ရက်ချိန်းအတွက် နေ့စွဲနှင့်အချိန်ကို လျှောက်ထားသူထံ အကြောင်းပြန်ကြားချက်များ စနစ်မှထုတ်ပေးမှုကို လက်ခံမရရှိခဲ့သည့်ဖြစ်စဉ်များ ရှိခဲ့ကြောင်း၊ ယင်းကြောင့် ရက်ချိန်းအချက်အလက်များကို ပြန်လည်ကြည့်ရှု့နိုင်ရန် Website ၏ Home Page ရှိ ရက်ချိန်းစစ်ဆေးရန် ခလုတ်ကိုနှိပ်၍ လျှောက်ထားသူ၏ အမည်နှင့်နိုင်ငံသားစိစစ်ရေးကတ်အမှတ်တို့ကို ဖြည့်သွင်း၍  ပြန်လည်ကြည့်ရှုနိုင်ကြောင်း အသိပေးထားသည်။

ယင်းအပြင် Online Appointment System စနစ်ကို လိုအပ်ချက်အနည်းငယ်ရှိသည့်အတွက် ပြင်ဆင်မွမ်းမံမှုများ ပြုလုပ်ရန်ရှိပြီး ရက်ချိန်းအသစ်လျှောက်ထားခြင်းအား တစ်ရက်ရပ်နားထားမည် ဖြစ်ကာ ရက်ချိန်းအသစ်လျှောက်ထားခြင်းကို ဖေဖော်ဝါရီလ ၂၆ ရက်နေ့တွင် ပြန်လည်ဖွင့်လှစ်မည်ဖြစ်ကြောင်းသိရသည်။

ပတ်ပို့စ်စာအုပ်တွင်ပါမည့် ​မိမိနာမည်စာလုံးပေါင်းအမှန်ဖြင့် ဘွတ်ကင်ရ​အောင်အရင်ယူပြီးမှသာ၊ တွဲရက်ဖြည့်ရသည့်ဖိုင်ကို ​ဒေါင်းလုပ်လုပ်ပြီး ​အေး​အေး​ဆေး​ဆေးဖြည့်ဖို့ ကြိုးစားကြည့်ခဲ့သူတစ်ဦးကအကြံပြုသည်။

ရန်ကုန်တွင် Online Appointment System ဖြင့် ရက်ချိန်းရယူရာတွင်လည်း လျှောက်ထားခ ၃၅၀၀၀ ကျပ်ကို အွန်လိုင်းပေးချေမှုစနစ်ဖြင့် တစ်ပါတည်းပေးသွင်းရမည်ဖြစ်ကြောင်း အသိပေးထားသည်။

ပြီးခဲ့သည့် ၂၀၂၂ ခုနှစ် ဒီဇင်ဘာလကုန်မှစပြီး နိုင်ငံကူးလက်မှတ်လျှောက်ထားခြင်းကို ရပ်ဆိုင်းခဲ့ကြောင်း၊ယင်းအပြင် အလုပ်သမားညွှန်ကြားမှုဦးစီးဌာန၏ ခွင့်ပြုပြီး အလုပ်ခေါ်စာနှင့်စေလွှတ်မည့် အလုပ်သမားများအပါအဝင် နိုင်ငံကူးလက်မှတ်ပြုလုပ်ခွင့်ကို ဇန်နဝါရီ ၁၇ ရက်က ယာယီရပ်ဆိုင်းခဲ့ခြင်းဖြစ်သည်။