ပဲခူးတိုင်း၊အုတ်တွင်းမြို့နယ်၊ကျွဲပွဲမြို့၊တောင်ညိုလေးကျေးရွာတွင် အသက်(၁၆)နှစ်အရွယ်ရှိ မိန်းကလေးငယ်တစ်ဦးသည် ဖေဖော်ဝါရီ ၂၅ ရက်(ယနေ့) နေ့လည်ပိုင်းက အဆိပ်သောက်သေဆုံးခဲ့ကြောင်း ရင်ခုန်သံရှင်ရေးကူညီမှုအသင်းမှ သိရသည်။
ယနေ့နေ့လည် ၃ နာရီခွဲခန့်က ကျွဲပွဲမြို့၊တောင်ညိုလေးကျေးရွာနေ မရှိုင်းနဒီလှိုင်း(၁၆)နှစ်သည် အဆိပ်သောက်၍ သေကြောင်းကြံစည်ခဲ့ခြင်းဖြစ်သည်။
အဆိပ်သောက်၍ သေကြောင်းကြံစည်ခဲ့သည့် မိန်းကလေးအား အခင်းဖြစ်နေရာမှတဆင့် အုတ်တွင်းမြို့ပြည်သူ့ဆေးရုံသို့ သယ်ဆောင်လာခဲ့ရာ ဆေးရုံအရောက်တွင် သေဆုံးနေကြောင်း စစ်ဆေးသိရှိရသဖြင့် ရင်ခုန်သံရှင်ရေးကူညီမှုအသင်းမှ ရုပ်အလောင်းအား ကျွဲပွဲတိုက်နယ်ဆေးရုံ ရေခဲတိုက်သို့ပြန်လည်ပို့ဆောင်ပေးခဲ့ကြရသည်။
“အကြမ်းဖျဥ်းသိရသလောက်ဆိုရင် ကလေးမလေးရဲ့မိဘနှစ်ပါးက မနေ့ညတုန်းကရန်ဖြစ်ကြတယ်။ ဒီနေ့မနက်ကြတော့ ကလေးမလေးကို ပဲနှုတ်မလိုက်ခိုင်းဘူးတဲ့။ အဲဒါကြောင့် ကလေးမက အဆိပ်သောက်ပြီးသေကြောင်းကြံစည်ခဲ့တာလို့ သိထားပါတယ်”ဟု ရင်ခုန်သံရှင်ရေးကူညီမှုအသင်းမှ တာဝန်ရှိသူတစ်ဦးကပြောသည်။
ဖိစီးမှုများသည့်အချိန်တွင် လူငယ်အများစုသည် ခံနိုင်ရည်နည်းကြပြီးထွက်ပေါက်ကို သတ်သေသည့်နည်းရွေးနေကြခြင်းအပေါ် ဆွေးနွေးအကြံပြုခြင်းများ တွင်ကျယ်စွာလုပ်ဆောင်လုပ်သင့်သလို အနီးနေမိသားစု အသိုင်းအဝိုင်းများသည်လည်း စိတ်ပိုင်းဆိုင်ရာကြံ့ခိုင်ဖို့အပြန်အလှန်ဖေးမနိုင်အောင်သတိထားကြရမည်ဖြစ်သည်။
