ဦးကိုကိုကြီး ဦးဆောင်သည့် ပြည်သူ့ပါတီနှင့် မအူပင် ဦးစိန်ဝင်း ဦးဆောင်သည့် NUDP ပါတီတို့ နှစ်ပါတီ ပူးပေါင်းမှု လုပ်ဆောင်သွားမည်ဖြစ်ကြောင်း သိရသည်။
အဆိုပါ (၂)ပါတီ ပူးပေါင်းမည့် ကိစ္စနှင့်ပတ်သက်၍ NUDP ပါတီ ဥက္ကဋ္ဌ ဦးစိန်ဝင်းက ယမန်နေ့ ဖေဖေါ်ဝါရီ (၂၅) ရက် ညပိုင်းတွင် ၎င်း၏ လူမှုကွန်ရက်မှတဆင့် ထုတ်ဖော်ပြောကြားလာခြင်းဖြစ်သည်။
“မြန်မာနိုင်ငံ နှစ်ဆယ့်တစ်ရာစုမှာ NUDP ပါတီနှင့် PP ပြည်သူ့ပါတီတို့ ပါတီနှစ်ခုပူးပေါင်းတာ ပထမဆုံးဖြစ်သလို နိုင်ငံနဲ့ ပြည်သူ့အကျိုးအတွက် စွမ်းအားသစ်ဖြင့် ဆောင်ရွက်သွားမည်ဖြစ်ကြောင်း သစ္စာဓိဌာန်ပြုပါသည်” ဟု ဦးစိန်ဝင်းက ၎င်း၏ လူမှုကွန်ရက်မှတဆင့် အသိပေးပြောကြားခဲ့ခြင်း ဖြစ်သည်။
၂၀၂၃ ခုနှစ် နှစ်ဆန်းပိုင်းတွင် အသစ်ပြဌာန်းလိုက်သည့် နိုင်ငံရေးပါတီများ မှတ်ပုံတင်ခြင်း ဥပဒေသစ်အရ ယခင်က ပြည်ထောင်စုအဆင့် ရပ်တည်ခဲ့သည့် ပါတီငယ်များအနေဖြင့် ဆက်လက်ရပ်တည်နိုင်ရန် အကြပ်အတည်းနှင့် ရင်ဆိုင်နေရချိန်တွင် (၂) ပါတီ ပူးပေါင်းရေးကိစ္စအား တရားဝင် ထုတ်ဖော်ပြောဆိုလာခြင်းလည်း ဖြစ်သည်။
အဆိုပါ ပါတီပူးပေါင်းရေးကိစ္စနှင့် ပတ်သက်၍ သက်ဆိုင်သူများထံ ပေါ်ပြူလာနယူး(စ်) မှ ဆက်သွယ်မေးမြန်းခဲ့သော်လည်း လာမည့် ဖေဖေါ်ဝါရီ (၂၈) ရက်တွင် သတင်းစာရှင်းလင်းပွဲ ပြုလုပ်ကာ တရားဝင် ပြောကြားသွားမည်ဖြစ်သည့်အတွက်လက်ရှိတွင် မဖြေကြားနိုင်သေးကြောင်းသာ ပြန်လည်ပြောကြားခဲ့သည်။
ပြီးခဲ့သည့် သီတင်းပတ်အတွင်းက မအူပင်ဦးစိန်ဝင်းနှင့် ပေါ်ပြူလာနယူး(စ်)၏ အင်တာဗျူးတစ်ခုတွင် ၎င်း၏ ပါတီအနေဖြင့် ရင်ဘတ်ချင်းတူသူများနှင့် ပူးပေါင်းသွားရန် ပြောကြားထားပြီး အလွယ်ကူဆုံးနည်းလမ်းဖြင့် ပူးပေါင်းသွားမည်ဟု ပြောကြားထားသည်။
အသစ်ပြဌာန်းလိုက်သည့် နိုင်ငံရေးပါတီများ မှတ်ပုံတင်ခြင်း ဥပဒေအရ ယခင်ရှိပြီးသား ပါတီများအနေဖြင့် (၂) လအတွင်း မှတ်ပုံပြန်မတင်ပါက နိုင်ငံရေးပါတီအဖြစ်မှ အလိုအလျှောက် ပျက်ပြယ်မည်ဖြစ်ကြောင်း ပြဌာန်းထားပြီး လက်ရှိတွင် ပါတီအချို့မှာ ပါတီမှတ်ပုံတင် ပြန် လည်လျှောက်ထားမှုများလည်း ရှိနေသည်။
အဆိုပါ ၂၀၂၃ ခုနှစ် နိုင်ငံရေးပါတီ မှတ်ပုံတင်ခြင်း ဥပဒေအရ ပြည်ထောင်စုတစ်ဝန်းလုံးတွင် စည်းရုံးလှုပ်ရှားမည့် ပါတီများအနေဖြင့် ပါတီဝင် အင်အား (၁) သိန်း စည်းရုံးရမည်ဖြစ်ပြီး ပြည်ထောင်စုတဝန်းလုံးရှိ မဲဆန္ဒန ယယ် အားလုံး၏ ထက်ဝက်တွင် ဝင်ရောက်ယှဉ်ပြိုင်ရမည်ဖြစ်ကြောင်း ပြဌာန်းထားခြင်း ဖြစ်သည်။
ပြီးခဲ့သည့် ဇန်နဝါရီ (၃၁) ရက်က ထုတ်ပြန်ခဲ့သည့် နိုင်ငံရေးပါတီများ မှတ်ပုံတင်ခြင်း နည်းဥပဒေအရ ပါတီ (၂) ခုသို့မဟုတ် (၂) ခုထက်ပိုသော ပါတီများအနေဖြင့် ပူးပေါ င်းကာ ပါတီတစ်ခုအနေဖြင့် ရပ်တည်နိုင်ကြောင်း ပြဌာန်းထားပြီး ဖြစ်သည်။
ယခု ပြည်သူ့ပါတီနှင့် NUDP ပါတီ ပူးပေါင်းမှု ပတ်သက်၍ ဖေဖေါ်ဝါရီ (၂၇) ရက်နှင့် (၂၈) ရက်တို့တွင် ဆွေးနွေးမှုများ လုပ်ဆောင်သွားမည်ဖြစ်ပြီး (၂၈) ရက် မွန်းလွဲပိုင်းတွင် သတင်းစာရှင်းလင်းပွဲ ပြုလုပ်သွားမည်ဖြစ်ကြောင်း သိရသည်။
