ပါရီ၊ဖေဖော်ဝါရီ ၂၇
ရုရှားသမ္မတဗလာဒီမာပူတင်က ရုရှားအနေဖြင့်ယူကရိန်းရှိ ၎င်း၏သမိုင်းဝင်နယ်မြေများအတွက်သာ တိုက်ပွဲဝင်နေခြင်းဖြစ်ကြောင်းပြောကြားခဲ့သည်။သမ္မတပူတင်သည် ဖေဖော်ဝါရီလ ၂၁ ရက်နေ့က မော်စကိုမြို့၌ကျင်းပခဲ့သည့် ယူကရိန်းထိုးစစ်အားထောက်ခံသည့်လူထုစုဝေးပွဲ၌ ယခုကဲ့သို့ ပြောကြားခဲ့ခြင်းဖြစ်သည်။
“လွန်ခဲ့တဲ့တစ်နှစ်တုန်းက ကျွန်တော်တို့နိုင်ငံရဲ့ နယ်မြေလုံခြုံရေးကိုကာကွယ်ဖို့၊ သမိုင်းဝင်နယ်မြေကပြည်သူတွေကိုကာကွယ်ဖို့၊ ၂၀၁၄ ခုနှစ်က ခရိုင်းမီးယားကိုသိမ်းပြီး ယူကရိန်းမှာကျင့်သုံးနေတဲ့ နာဇီလက်သစ်အစိုးရရဲ့ ခြိမ်းခြောက်မှုတွေကိုဖယ်ရှားဖို့ အထူးစစ်ဆင်ရေးကိုစဖို့ဆုံးဖြတ်ခဲ့တာပါ” ဟု၎င်းကပြောကြားခဲ့သည်။
၎င်းသည်ယူကရိန်းသို့အနောက်နိုင်ငံများ၏ ဝင်ရောက်စွက်ဖက်မှုကိုရည်ညွှန်းပြောကြားခဲ့ခြင်းဖြစ်သည်။ ယင်းနောက်၎င်း၏အထူးစစ်ဆင်ရေးမတိုင်မီ ကိဗ်သည် အနောက်အုပ်စုနှင့် လေကြောင်းရန်ကာကွယ်ရေးညှိနှိုင်းမှုများ၊စစ်လေယာဉ်များ၊အခြားလက်နက်ကိရိယာများပါ တောင်းဆိုခဲ့ကြောင်းပြောကြားခဲ့သည်။
ထို့ကြောင့်အမေရိကနှင့်နေတိုးတို့သည် ၎င်းတို့၏စစ်အခြေစိုက်စခန်းများနှင့်လျှို့ဝှက်ဓာတုဓာတ်ခွဲခန်းများကိုပါ ရုရှားနယ်စပ်၌လာရောက်ခြေကုပ်ယူနေသည်ဟုလည်း ပူတင်ကပြောကြားခဲ့သည်။
“တစ်ခုသိထားဖို့ကအခုကျွန်တော်တို့က ယူကရိန်းပြည်သူတွေနဲ့တိုက်ခိုက်နေတာမဟုတ်ပါဘူး၊ တကယ်တော့ယူကရိန်းပြည်သူတွေဟာ အနောက်အုပ်စုရဲ့နိုင်ငံရေး၊စစ်ရေးနဲ့စီးပွားရေးအရ ချုပ်ကိုင်မှုတွေရဲ့ဓားစာခံတွေပါ” ဟုလည်းဆိုခဲ့သည်။
ထို့နောက်သမ္မတပူတင်က ယူကရိန်းနှင့်ရုရှားတို့သည်တစ်နိုင်ငံတည်းဖြစ်ပြီး အခိုင်အမာစုစည်းထားသော ပြည်ထောင်စုကြီးဖြစ်သဖြင့် ရုရှားအနေဖြင့် ဖြစ်ပေါ်လာမည့်စိန်ခေါ်မှုတိုင်းကို ရင်ဆိုင်မည်ဖြစ်ကြောင်းပြောကြားခဲ့ပြီး ၎င်းတို့၏ခွန်အားနှင့် မိမိကိုယ်ကို ယုံကြည်မှုရှိသည်ဟုလည်းပြောကြားခဲ့သည်။
နောက်ဆုံးတွင်ယူကရိန်းရှေ့တန်း၌တိုက်ပွဲဝင်နေသည့်တပ်မတော်သားများအပြင် ကဏ္ဍအသီးသီးမှပါဝင်ကူညီသူများနှင့် စုဝေးပွဲလာရောက်သူများကိုပါကျေးဇူးတင်ရှိကြောင်းပြောကြားခဲ့သည်။
Source :AFP
