ဦးဖြိုးမင်းသိန်း အပါအဝင် (၄) ဦးကို ပါတီဝင်အဖြစ်မှ ထုတ်ပယ်ကြောင်း ယမန်နေ့ မတ်လ (၃) ရက် ရက်စွဲဖြင့် ထုတ်ပြန်ခဲ့သည့် NLD ပါတီ ဗဟိုအလုပ်အဖွဲ့၏ ထုတ်ပြန်ချက်သည် တရားမဝင်ကြောင်းနှင့် အဆိုပါ CWC အဖွဲ့သည်ပင် တရားဝင်မဟုတ်ကြောင်း ပါတီမှ ထုတ်ပယ်ကြောင်းကြေငြာခံခဲ့ရသည့် ဦးတိုးလွင်က ပြောသည်။
ပါတီမူဝါဒများနှင့် ပြည်သူလူထု၏ဆန္ဒကို ဆန့်ကျင်ကာ စစ်တပ်နှင့်ပူးပေါင်းသည်ဆိုသည့် စွပ်စွဲချက်ဖြင့် ရန်ကုန်တိုင်းဒေသကြီး ဝန်ကြီးချုပ်ဟောင်း ဦးဖြိုးမင်းသိန်း ၊ လွှတ်တော်ကိုယ်စားလှယ်ဟောင်း ဒေါ်စန္ဒာမင်း အပါအဝင် (၄) ဦးကို ပါတီတာဝန်များရပ်ဆိုင်းသည့်အပြင် ပါတီဝင်အဖြစ်မှ ထုတ်ပယ်ကြောင်း NLD ပါတီ ဗဟိုအလုပ်အဖွဲ့မှ စာထုတ်ခဲ့ခြင်း ဖြစ်သည်။
အဆိုပါ ထုတ်ပြန်စာနှင့် ပတ်သက်၍ NLD ပါတီ ဗဟိုကော်မတီဝင်တစ်ဦးဖြစ်သည့် ဦးတိုးလွင်က၎င်း၏ လူမှုကွန်ရက်စာမျက်နှာမှတဆင့် တုန့်ပြန်ရေးသားလာခြင်းဖြစ်သည်။
“NLD ဗဟိုအလုပ်မှုဆောင်အဖွဲ့အစည်းအဝေးကို မကျင်းပနိုင်ပဲနဲ့ NLD ဗဟိုကော်မတီ အစည်းအဝေးကို မကျင်းပနိုင်ပဲနဲ့ So-called NLD CWC ကနေ ကျနော်တို့ကို ထုတ်ပယ်လို့ မရပါဘူး။ ပြည်ပအခြေစိုက်တရားမဝင်တဲ့ So- called NLD CWC အဖွဲ့ကနေ ပါတီရဲ့အမြင့်ဆုံးတာဝန်ရှိသူတွေဖြစ်တဲ့ တရားဝင်တည်ရှိနေကြတဲ့ ဗဟိုကော်မတီအဖွဲ့ဝင်တွေကို ထုတ်ပယ်လို့ လုံးဝမရပါဘူး” ဟု ဦးတိုးလွင်က ပြောသည်။
NLD ပါတီ ဗဟိုအလုပ်အဖွဲ့ကို ၂၀၂၁ ခုနှစ် ဖေဖေါ်ဝါရီ (၁) ရက်နောက်ပိုင်း နိုင်ငံရေးအပြောင်းအလဲများကြောင့် ပြည်ပသို့ ထွက်ပြေးတိမ်းရှောင်နေရသည့် ပါတီ ဗဟိုအလုပ်အမှုဆောင်အဖွဲ့ဝင် ဦးအောင်ကြည်ညွန့် ဦးဆောင်ဖွဲ့စည်းထားခြင်းဖြစ်ပြီး ယင်းအဖွဲ့အား တရားမဝင်ကြောင်း ပါတီဥက္ကဋ္ဌ ဒေါ်အောင်ဆန်းစုကြည်က ၂၀၂၁ ခုနှစ် နိုဝင်ဘာလ (၈)ရက်က သူမ၏ရှေ့နေများမှတဆင့် ပြောကြားထားပြီးကြောင်းလည်း ဦးတိုးလွင်က ဆိုသည်။
ထို့အပြင် NLD ပါတီ၏ ပါတီစည်းကမ်းထိန်းသိမ်းရေးအဖွဲ့အဆင့်ဆင့် ဖွဲ့စည်းပုံနှင့် လုပ်ထုံးလုပ်နည်းများအရ CWC အဖွဲ့တွင် ပါဝင်သူ (၇)ဦးနှင့် ဒေါ်မေဝင်းမြင့်တို့သည် NLD ပါတီဝင်အဖြစ်မှ အလိုအလျောက်ပျက်ပြယ်ပြီးသားသူများဖြစ်ကြောင်းလည်း ၎င်းက ဆိုသည်။
ယမန်နေ့က ထုတ်ပြန်သည့် ဗဟိုအလုပ်ကော်မတီ၏ ထုတ်ပြန်ချက်တွင် ဖော်ပြထားချက်အရ ဥက္ကဋ္ဌ ဒေါ်အောင်ဆန်းစုကြည်အပေါ် မဟုတ်မမှန် သက်သေထွက်ဆိုသူနှင့် ပြည်သူလူထု၏ ဆန္ဒကို ကျောခိုင်းပြီး ပါတီမူဝါဒများကို ဆန့်ကျင်လုပ်ဆောင်နေသူများ၊ စစ်တပ်အလိုကျ ကိုယ်ကျိုးရှာဆောင်ရွက်နေသူများကို အရေးယူပေးရန် တောင်းဆိုမှုများရှိသည့်အတွက် ယခုကဲ့သို့ ဆုံးဖြတ်ခဲ့ခြင်း ဖြစ်ကြောင်းဖော်ပြထားသည်။
“သူတို့ဘာသာ သူတို့ တိုင်းပြည်အပြင်ဖက်မှာ ဖွဲ့ထားကြတဲ့အဖွဲ့မှာ ပါဝင်တဲ့သူ အားလုံးဟာ ထိုင်းနိုင်ငံ မဲဆောက်နဲ့ အမေရိကားကို အကုန်ရောက်နေကြတဲ့ သူတွေချည်းပါပဲ။ NLD ရဲ့ ဖွဲ့စည်းပုံစည်းမျဉ်းနဲ့ လုပ်ထုံးလုပ်နည်းအရဆိုရင် အဲဒီလို တိုင်းပြည်အပြင်ဖက် ထွက်သွားကြသူတွေဟာ NLD ပါတီဝင်အဖြစ်တောင် တရားမဝင်တော့ပါဘူး။ သူတို့တွေဟာ NLD ပါတီဝင်တွေလို့တောင် မပြောနိုင်တော့ပါဘူး” ဟု ဦးတိုးလွင်က ဗဟိုအလုပ်အမူဆောင်အဖွဲ့အား ရည်ညွှန်းပြောဆိုထားသည်။
ထို့အပြင် ၂၀၂၁ ခုနှစ်နောက်ပိုင်း NLD ပါတီ၏ အကွဲအပြဲများနှင့် အဖြစ်အပျက်များ အားလုံးကို အပိုင်းလိုက် ထပ်မံရေးသား ဖော်ပြသွားမည်ဟုလည်း ၎င်းကဆိုသည်။
