မြန်မာနိုင်ငံတေးသီချင်းမူပိုင်ထုတ်လုပ်သူများအသင်း၏ ခွင့်ပြုချက်မရဘဲ တေးသီချင်းများအား ကိုယ်ကျိုးအသုံးပြုသူများကို ဥပဒေအရအရေးယူသွားမည်

မြန်မာနိုင်ငံတေးသီချင်းမူပိုင်ထုတ်လုပ်သူများအသင်း၏ ခွင့်ပြုချက်မရဘဲ တေးသီချင်းများအား ကိုယ်ကျိုးအတွက်အသုံးပြုမှုများရှိနေသဖြင့် အသိပေးကြေညာခဲ့ခြင်းဖြစ်သည်။

ယခုအခါတွင် မြန်မာနိုင်ငံတေးသီချင်းမူပိုင်ထုတ် လုပ်သူများအသင်း၏ အဖွဲ့ဝင်များမှ ထုတ်လုပ်သည့် တေးသီချင်းများ၊အရုပ်/အသံ ဖော်ပြပါရှိသော Audio CD, MTV, VCD, DVD(Karaoke)များကို Online စနစ်၊ Offline စနစ်၊အခကြေးငွေ၊အခ မဲ့၊ Download ရယူ၍အသုံးပြုနိုင်ရန် ဈေးကွက်အတွင်းရောင်းချလျက်ရှိသည့် Karaoke စက်များ၊ Mobile Application များ၊ Digital Platform များ၊ Internet Website များဖြင့် အခကြေးငွေရ ယူကာ စီးပွားဖြစ်ရောင်းချလျက်ရှိသည်။

တေးစီးရီးသာထွက်ပြီး MTV Karaoke, Music Video တရားဝင်ထွက်ရှိခြင်းမရှိသည့် တေးသီချင်းများကိုလည်း နည်းပညာအသုံးပြု၍ Karaoke အဖြစ် သီဆိုအသုံးပြုနိုင်ရန် စာသားရေးထိုးဖော်ပြထားသည့်(Lyric Video)များ၊ လှုပ်ရှားပုံရိပ်များ၊ထည့်သွင်းဖန်တီးထားသော Animation Video များဖန်တီးကာ ဖြန့်ဖြူးရောင်းချလျက်ရှိသည်ကိုလည်း တွေ့​နေရသည်။

ထိုသို့ လုပ်ဆောင်ရာတွင် ခွင့်ပြုချက်ရယူခြင်းမရှိဘဲ လုပ်ဆောင်ခြင်းဖြစ်၍ တေးထုတ်လုပ်သူများ ၏ ရင်းနှီးမြှုပ်နှံမှုဆိုင်ရာအကျိုးစီးပွားများ၊မူပိုင် ခွင့်ဆိုင်ရာအကျိုးစီးပွားများ ထိခိုက် သည်ဟု အသိပေးထားသည်။

ထို့ကြောင့် မြန်မာနိုင်ငံတေးသီချင်းမူပိုင်ထုတ် လုပ်သူများအသင်းမှ အသင်းဝင်ထုတ်လုပ်သူတို့ ၏ တေးသီချင်းများပါဝင်ပါက ကြေညာပါသည့်နေ့မှရက်ပေါင်း ၃၀ အတွင်းဆက်သွယ်၍ သတ်မှတ် ထားသည့် နည်းလမ်းများနှင့်အညီခွင့်ပြု ချက်ရယူတောင်းခံအသုံးပြုရမည်ဟု အသိပေးခဲ့သည်။

သတ်မှတ်ထားသည့်နေ့ရက်ကျော်လွန်သည်အထိ ဆက်သွယ်ဆောင်ရွက်ခြင်းမရှိဘဲ ခွင့်ပြုချက်မဲ့ ဆက်လက်အသုံးပြုပါက ထုတ်လုပ်သူတို့၏ အကျိုးစီးပွားနစ်နာမှုများ၊အနုပညာပစ္စည်းအလွဲသုံးမှုများအတွက် ဥပဒေနှင့်အညီ အရေးယူသွားမည်ဟု အသိပေးခဲ့သည်။

မြန်မာနိုင်ငံတေးသီချင်းမူပိုင်ထုတ်လုပ်သူများအသင်းအား Audio CD, MTV, VCD, DVD(Karaoke) များတွင်ပါဝင်သည့် အရုပ်အသံပူးတွဲဖော်ပြထားသည့် တေးသီချင်းများအားအလွဲသုံး၍ ကိုယ် ကျိုးစီးပွားအတွက် အသုံးပြုမှုများကိုကာကွယ်စောင့်ရှောက်ရန်ရည်ရွယ်၍ တေးထုတ်လုပ်ရေး ၂၈ ခုဖြင့် ၂၀၂၀ ပြည့်နှစ်တွင်စတင်ဖွဲ့စည်းခဲ့ခြင်းဖြစ်သည်။