စတော့ရှယ်ယာများကို အွန်လိုင်းဖြင့်လည်း ရောင်းဝယ်နိုင်ပြီး ဝယ်သူနှင့် ရင်းနှီးမြှုပ်နှံသူတွေအနေဖြင့်မိမိတို့နေရာမှာတင် အစုရှယ်ယာများကို ရောင်းဝယ်မှု ပြုလုပ်နိုင်ကာ နိုင်ငံခြားသားများ ပါဝင်ရောင်းချရန် ခွင့်ပြုထားကြောင်းစီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး၊ မြန်မာနိုင်ငံ ငွေချေးသက်သေခံ လက်မှတ်လုပ်ငန်းကြီးကြပ်ရေးကော်မရှင် ဥက္ကဋ္ဌ ဦးမောင်မောင်ဝင်းက ပြောကြားခဲ့သည်။
ရန်ကုန်စတော့အိပ်ချိန်း၏ (၇)နှစ်ပြည့်အခမ်းအနားတွင် ၎င်းကထိုသို့ပြောကြားခဲ့ခြင်းဖြစ်သည်။
”YSX ရဲ့(၇)နှစ်တာဖြတ်သန်းခဲ့တဲ့ကာလမှာ တိုးတက်မှုအနေနဲ့ စာရင်းဝင်ကုမ္ပဏီ (၁)ခုနဲ့စတင်ခဲ့ပြီး စာရင်းဝင်ကုမ္ပဏီ (၇)ခု ၊ ငွေချေးသက်သေခံလက်မှတ် ကုမ္ပဏီ(၆)ခု ရှိခဲ့ပါတယ်။ မိမိတို့ နှစ်သက်ရာ စာရင်းဝင်ကုမ္ပဏီများရဲ့ အစု ရှယ်ယာများကို ဝယ်ယူနိုင်ပါတယ်။ Main Board ထက်အရွယ်အစားအားဖြင့် သေးငယ်တဲ့ အများပိုင်ကုမ္ပဏီများ အထူးသဖြင့် SME ၊ MSME လုပ်ငန်းတွေကို စာရင်းဝင်ကုမ္ပဏီ ရောက်ရှိလာအောင် Pre – Listing Boardကို တည်ထောင်ပြီးဖြစ်ပါတယ်။MSMEလုပ်ငန်းများလည်း ဝင်ရောက် ရောင်းဝယ်နိုင်ပြီဖြစ်ပါတယ်။စာရင်းဝင်ကုမ္ပဏီများကို နိုင်ငံတော်က Corporate Income Tax လျော့ပေးထားပါတယ်။နောင်မှာလည်း ငွေချေးစာချုပ် ဈေးကွက် (Corporate Bond Market) ကိုလည်း ထပ်မံဆောင်ရွက်သွားမှာ ဖြစ်ပါတယ်” ဟုပြောကြားခဲ့သည်။
မြန်မာ့အရင်းအနှီးစျေးကွက်တိုးတက်ဖွံဖြိုးလာစေရန်အတွက် ရန်ကုန်စတော့အိပ်ချိန်း(YSX) ကို ၂၀၁၅ခုနှစ် ဒီဇင်ဘာလ (၉)ရက်နေ့တွင် စတင်ဖွင့်လှစ်ခဲ့ပြီး ၂၀၁၆ မတ်လ (၂၅)ရက်နေ့တွင်စတော့ရှယ်ယာများ စတင်အရောင်းအဝယ်ပြုလုပ်ခဲ့ရာ ယမန်နေ့ ၂၀၂၃ခုနှစ် မတ်လ ၂၅ ရက်နေ့သည် (၇)နှစ်ပြည့်မြောက်သည့်နေ့ဖြစ်သည်။
မြန်မာနိုင်ငံတွင်၂၀၀၈ ခုနှစ်၌ Capital Market Development Committee ကို ဖွဲ့စည်းခဲ့ပြီး ၊၂၀၁၃ခုနှစ် ဇူလိုင်လတွင် ငွေချေးသက်သေခံလက်မှတ်များ လဲလှယ်ရောင်းဝယ်ရန် ငွေချေးသက်သေခံ လက်မှတ်လုပ်ငန်း ကြီးကြပ်ရေးကော်မရှင်ကိုလည်း ဖွဲ့စည်းခဲ့ကြောင်း၊ ယင်းအပြင် ငွေချေးသက်သေခံလက်မှတ်များ အခိုင်အမာရှိစေရန် အတွက်ဥပဒေ၊ နည်းဥပဒေများကိုလည်း ၂၀၁၅ခုနှစ်တွင် ပြဌာန်းခဲ့သည်။
