လျှပ်စစ်မီးပြတ်တောက်မှုများကြောင့် CNG ဆိုင်များတွင် အချိန်ကြာမြင့်စွာ တန်းစီစောင့်ဆိုင်းနေရသည့်အပြင် ဂတ်စ်အလုံ
အလောက်မရရှိမှုတို့ကြောင့် အငှားယာဉ်မောင်းများနှင့် YBS ယာဉ်အချို့အနေဖြင့် အခက်အခဲများကြုံတွေ့နေရကြောင်း သိရသည်။
ယခုရက်ပိုင်းအတွင်း ရန်ကုန်အပါအဝင် တိုင်းနှင့် ပြည်နယ် အချို့တွင် လျှပ်စစ်မီးပြတ်တောက်မှုများ အချိန်ကြာမြင့်စွာ ဖြစ်ပေါ်နေခြင်းကြောင့် CNG အသုံးပြုသည့် ယာဉ်များ ဓာတ်ငွေ့ရရှိရန် အခက်ကြုံနေကြရခြင်းလည်း ဖြစ်သည်။
“ ဂတ်စ်က မရဘူး။ ဂတ်စ် တစ်ခါတစ်ခါ ရဖို့အရေးကို မနက် (၃) နာရီကတည်းက ထတန်းစီနေရတယ်။ ရတဲ့ဂတ်စ် ကျတော့လည်း pressure ကောင်းကောင်းမရဘူး။ အပြည့်မရဘူး။ တစ်ခေါက်နှစ်ခေါက်လောက် ပတ်မောင်းလိုက်ရင် ကုန်ပြီ။ ဂတ်စ်က ခဏခဏ တန်းစီနေရတယ်။ ကားမောင်းချိန်ကို မရှိဘူး။ တစ်ခါတန်းစီရင် (၄) နာရီလောက်ကြာတယ်” ဟု ရန်ကုန်မြို့တွင် နေထိုင်သည့် အငှားယာဉ်မောင်း ကိုအောင်ကျော်ဦးက ပြောသည်။
ယခင်က CNG က တစ်ခါဖြည့်ထားပြီးပါက နေ့တစ်ဝက်ဝန်းကျင်အထိ အမောင်းခံပြီး တစ်ရက်လျှင် နှစ်ကြိမ်သာဖြည့်ရကြောင်းလည်း ၎င်းက ရှင်းပြသည်။
ယခုလက်ရှိတွင် CNG ဂတ်စ်ဖြည့်ရန် အချိန်ကြာမြင့်စွာ တန်းစီရခြင်းနှင့် ဂတ်စ်အလုံအလောက် မရရှိခြင်းတို့ကြောင့် ကားပြေးဆွဲသည့် အချိန်နည်းသည့်အတွက် အုံနာခပြည့်မီရန်ပင် ကြိုးစားရှာဖွေနေကြရကြောင်း အငှားယာဉ်မောင်းများက ပြောသည်။
လက်ရှိတွင် CNG ဂတ်စ်ရရှိမှု အခက်အခဲကြောင့် အငှားယာဉ်မောင်းများ အခက်ကြုံနေသည့်အပြင် ရန်ကုန်မြို့တွင်းပြေးဆွဲနေသည့် YBS ယာဉ်လိုင်းများပါ ယာဉ်အစီးရေပြည့်ဝစွာ မထွက်နိုင်ကြောင်း YBS ယာဉ်လိုင်း အချို့မှ စုံစမ်းသိရသည်။
” ကျွန်တော်တို့ လိုင်းက တချို့ယာဉ်တွေ မထွက်တော့ဘူး ။ ဘာဖြစ်လို့လဲဆိုတော့ သင်္ကြန်နား နီးတာလည်း ပါတယ်။ အဓိကကတော့ CNG မရတာကြောင့်လည်း ပါတယ် ” ဟု ရွှေပြည်သာမြို့နယ် အခြေပြုကာ ရန်ကုန်မြို့ တွင်း ပြေးဆွဲနေသည့် YBS ယာဉ်လိုင်းတစ်ခုမှ ယာဉ်မောင်း တစ်ဦးက ပြောသည်။
လာမည့် သင်္ကြန်ရက်အတွင်း ရန်ကုန်အပါအဝင် မြို့ကြီး အချို့ရှိ CNG အရောင်းဆိုင် (၃၀) ကို ပိတ်ရက်မရှိ ဖွင့်လှစ်ရောင်းချပေးသွားမည်ဟု မော်တော်ယာဉ်သုံး သဘာဝ ဓာတ်ငွေ့ဌာန၏ ထုတ်ပြန်ကြေညာချက်အရ သိရသ ည်။