လက်ရှိတွင် တစ်နိုင်ငံလုံးအတိုင်းအတာအနေဖြင့် လျှပ်စစ်ဓာတ်အား ၁၅၀၀မဂ္ဂါဝပ် ခန့်သာဖြန့်ဖြူးပေးနိုင်ကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှ သိရသည်။
ယခင်က တစ်နိုင်ငံလုံးအတိုင်းအတာအနေဖြင့် လျှပ်စစ်ဓာတ်အား ၃၀၀၀မဂ္ဂါဝပ် ခန့်ဖြန့်ဖြူးပေးနေရာမှ လက်ရှိတွင် ရာသီဥတုပူပြင်းလာသည့်အတွက် ရေအားလျှပ်စစ်မှ ရေများခန်းခြောက်ခြင်းနှင့် သဘာဝဓာတ်ငွေ့စွမ်းအင်သုံး လျှပ်စစ်ဓာတ်အားပေးစက်ရုံအချို့ပြုပြင်နေမှုများရှိနေသည့်အတွက် ယခင်ထက် ထက်ဝက်လောက်သာ လျှပ်စစ်ဓာတ်အားကို ဖြန့်ဖြူးပေးနိုင်တော့ကြောင်း သိရသည်။
“ ဘာကြောင့် မီးခဏခဏပျက်နေလဲဆိုရင် လောပိတကနေလည်း ဓာတ်အားမပို့လွှတ်နိုင်ဘူး။ ပြီးတော့ ရွှေသဘာဝဓာတ်ငွေ့ပိုက်လိုင်းကို ပြုပြင်နေတာတွေကြောင့်လည်းပါတယ်။ အရင်ပေးနေတာထက် ထက်ဝက်လောက်ကို ကျွန်တော်တို့က ချိန်ညှိပြီးပေးနေရတာ။ရေအားလျှပ်စစ်တွေကလည်း ရေတွေက လော့ကျလာပြီ။ နွေရာသီပူပြင်းတာက တစ်ကြောင်းပေါ့။ ၂၀၂၅ ကျမှ စီမံကိန်းတွေထဲမှ လျှပ်စစ်မီးပြည်ပြည့်ဝဝဖြစ်လာမယ်လို့ မျှော်မှန်းထားတယ်” ဟု ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှ တာဝန်ရှိသူတစ်ဦးက ပေါ်ပြူလာနယူးစ်သို့ ပြောသည်။
လက်ရှိတွင် မြန်မာနိုင်ငံတစ်ဝန်းလုံးကို အလှည့်ကျမီးပေးစနစ်ဖြင့် လျှပ်စစ်မီးဖြန့်ဝေနေပြီး ရန်ကုန်မြို့တွင် အုပ်စု A နှင့် B ကို နံနက် ၉ နာရီမှ ညနေ ၅ နာရီအထိ အလှည့်ကျ ဝန်အားလျှော့၍ လျှပ်စစ်မီးပေးနေပြီး ညနေ ၅ နာရီမှ နောက်တစ်နေ့ နံနက် ၉ နာရီအထိ ဓာတ်အားအပြည့် ပေးထားကြောင်း၊ စက်မှုဇုန်များကိုမူ နံနက် ၉ နာရီမှ ညနေ ၅ နာရီအထိသာ လျှပ်စစ်မီးပေးထားကြောင်း သိရသည်။
ယင်းအပြင် ဦးစားပေးအဆင့် အုပ်စု A တွင် မြို့နယ် ၁၆ မြို့နယ်ကို ကြေညာထားပြီး ရန်ကင်း၊ တာမွေ၊ သင်္ဃန်းကျွန်း၊ တောင်ဥက္ကလာ၊ ကျောက်တံတား၊ ပန်းဘဲတန်း၊ လသာ၊ လမ်းမတော်၊ ဒဂုံ၊ အလုံ၊ ကြည့်မြင်တိုင်၊ စမ်းချောင်း၊ မရမ်းကုန်း၊ လှိုင်၊ ကမာရွတ်၊ ဗဟန်းမြို့နယ်တို့ ပါဝင်သည်။
