စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ စားသုံးသူရေးရာဦးစီးဌာန ညွှန်ကြားရေးမှူးချုပ်မှ အဖွဲ့ခေါင်းဆောင်အဖြစ်ပါဝင်သည့် ဆန်စပါးသိုလှောင်မှုလုပ်ငန်း မှတ်ပုံတင်ခြင်းဆိုင်ရာ အစိုးရ -ပုဂ္ဂလိက လုပ်ငန်းအဖွဲ့အား ဖွဲ့စည်းခဲ့သည်ဟု မေ ၉ ရက်က ထုတ်ပြန်ခဲ့သည်။
ယင်း အဖွဲ့အား ဆန်စပါးလုပ်ကိုင်နေသူများ ဝန်ထုပ်ဝန်ပိုးနှင့်အန္တရာယ်မဖြစ်စေဘဲ လုပ်ငန်းဆောင်ရွက်နိုင်ရန်၊အမြတ်များများရလိုမှုဖြင့် သမားရိုးကျ ရောင်းဝယ်ခြင်းမဟုတ်သော လုပ်ငန်းများကို ထိန်းကျောင်းနိုင်ရန်၊ဆန်စပါးသိုလှောင်မှုအခြေအနေအား စနစ်တကျဆောင်ရွက်နိုင်ရန်တို့အတွက် ဖွဲ့စည်းခဲ့ခြင်းဖြစ်သည်။
စားသုံးသူရေးရာဦးစီးဌာန၏ ညွှန်ကြားရေးမှူးချုပ်မှ အဖွဲ့ခေါင်းဆောင်၊မြန်မာနိုင်ငံဆန်စပါးအသင်းချုပ် ဥက္ကဋ္ဌမှ ဒု-အဖွဲ့ခေါင်းဆောင်၊ပြည်တွင်းကုန်သွယ်ရေးဖွံ့ဖြိုးမှုနှင့်သုတေသနဌာနခွဲ စားသုံးသူရေးရာဦးစီးဌာနမှ ညွှန်ကြားရေးမှူးက အတွင်းရေးမှူး၊မြန်မာနိုင်ငံဆန်စပါးအသင်းချုပ်၏ တွဲဖက်အထွေထွေအတွင်းရေးမှူးက တွဲဖက်အတွင်းရေးမှူးတို့အဖြစ်တာဝန်ယူပြီး အစိုးရ/ပုဂ္ဂလိ ကတို့မှ အဖွဲ့ဝင် ၇ ဦး(စုစုပေါင်း ၁၁ ဦး)ဖြင့် ဖွဲ့စည်းခဲ့ခြင်းဖြစ်သည်။
အဆိုပါ အဖွဲ့သည် လုပ်ငန်းတည်နေရာ တစ်နေရာတွင် ဆန်တန်ချိန်(၅၀)၊(၁၀၀၀ အိတ်)နှင့်စပါး တင်း(၅၀၀၀)အထက် သိုလှောင်မှုပမာဏအား မှတ်ပုံတင်ရန်သတ်မှတ်ခြင်း၊ပမာဏပြောင်းလဲခြင်းကို သတင်းပို့သည့်စနစ်အား ကြပ်မတ် အကောင်အထည်ဖော်ရမည်ဖြစ်သည်။
ထို့ပြင် မှတ်ပုံတင်လုပ်ငန်းများဆောင်ရွက်ရာတွင် လွယ်ကူလျင်မြန်ထိရောက်စွာဆောင်ရွက်နိုင်ရန် ICT နှင့် Digital နည်းပညာကိုအသုံးပြု၍ အွန်လိုင်းမှမှတ်ပုံတင်ခြင်းစနစ်ကို ကျင့်သုံးဆောင်ရွက်ရမည်ဖြစ်သည်။
မှတ်ပုံတင်လုပ်ငန်းထိရောက်စေရန် တိုင်း/ပြည်နယ်အလိုက် စားသုံးသူရေးရာဦးစီးဌာနမှတဆင့် ကြပ်မတ်ဆောင်ရွက်ကာ မှတ်ပုံတင်စနစ်အား အားလုံးလိုက်ပါကျင့်သုံးနိုင်ရေးအတွက် အသိပညာပေးလုပ်ငန်းများဆောင်ရွက်ကာ လိုက်နာကျင့်သုံးခြင်းမရှိပါက ဥပဒေနှင့်အညီထိန်းကျောင်းကြပ်မတ်အရေးယူမှုများ ပြုလုပ်သွားရမည်ဖြစ်ကြောင်း သိရသည်။
