လူတွေဟာ ကိုယ်ချစ်ရတဲ့သူတွေအတွက် ဘာမဆိုလုပ်ပေးတတ်ကြတယ်ဆိုတာကို လူတိုင်းသိကြမှာပါ။ အခုလည်း တရုတ်ပြည်က အဘိုးအိုတစ်ဦးဟာ သူ့မြေးရဲ့ ကျန်းမာရေးအတွက် ပင်စင်စားဘဝကနေ အွန်လိုင်းပေါ်မှာ မိတ်ကပ်ပစ္စည်းရောင်းပြတဲ့ ဘလော့ဂါတစ်ဦး ဖြစ်လာခဲ့ပါတယ်။
ကျူ ယွင်းချန်း ဆိုတဲ့ အသက် ၇၂ နှစ်အရွယ် အဘိုးအိုဟာ အွန်လိုင်းပေါ်မှာ အသက်အရွယ်မလိုက်အောင် မိတ်ကပ်တွေ လိမ်းပြ၊ နှုတ်ခမ်းနီတွေ ဆိုးပြပြီး ကုမ္ပဏီတွေအတွက် သူတို့ရဲ့ ထုတ်ကုန်ပစ္စည်းတွေကို ကြေညာ ရောင်းချပေးနေပါတယ်။
ဒီအလုပ်ကို လုပ်ဖြစ်တာဟာ လွန်ခဲ့တဲ့ ခြောက်နှစ်လောက်က မြေးဖြစ်သူရဲ့ ကျန်းမာရေး စပြီး ဆိုးရွားလာတာကနေ စတင်ခဲ့တာပါ။ ကျူးရဲ့ မြေး ရှောင်း ကျင်းယန်ဟာ ရှားပါးတဲ့ ကျောရိုး ကြွက်သား ချည့်နဲ့တဲ့ ရောဂါကို ခံစားနေရပါတယ်။ ဆရာဝန်တွေကတောင် ၁၈ လပဲ အသက်ဆက်ရှင်နိုင်မယ်လို့ ခန့်မှန်းထားတာပါ။
ရှောင်း ဟာ ကံကောင်းပြီး အသက်ဆက်နိုင်ခဲ့ပေမယ့် အဲဒီလိုအသက်ဆက်နိုင်ဖို့ ငွေတွေအများကြီးလိုလာပါတယ်။ သူ့ရောဂါကုဖို့ အမေရိကနေ မှာယူရတဲ့ ဆေးဖိုးနဲ့တင် ယွမ် ၇ သိန်း (ဒေါ်လာ တစ်သိန်း) လောက် ကုန်ကျခဲ့တယ်။ သူ့ရဲ့ မိသားစုတွေကလည်း နေအိမ်တွေ ရောင်းချပြီး ရသမျှ ချေးငှားယူတာတောင် မလုံလောက်ခဲ့ဘူး။
အဲဒါကြောင့် အဘိုးအိုဟာ ပင်စင်ကြေးအပြင် ဝင်ငွေပိုရမယ့် လမ်းကြောင်းရှာရကနေ မိတ်ကပ်ပစ္စည်း အရောင်းပြတဲ့သူ ဖြစ်လာခဲ့ပါတယ်။ ဒါပေမယ့် ဒီလိုဖြစ်လာဖို့ ကျူးဟာ အတော်လေး ကြိုးစားခဲ့ရတယ်။ ခေတ်နောက်ကျသူပီပီ မိတ်ကပ်ပစ္စည်းတွေရဲ့အခေါ်အဝေါ်တွေ၊ အသုံးအနှုန်းတွေဟာ သူ့အတွက် တစိမ်းဆန်ခဲ့တယ်။ ဘယ်ကုမ္ပဏီကမှလည်း သူတို့ထုတ်ကုန်တွေကို သက်ကြီးရွယ်အို တစ်ယောက်ကို မကြေညာစေချင်ခဲ့ဘူး။ ဒါပေမယ့် လက်မလျှော့ခဲ့တဲ့ ကျူးဟာ နာမည်ကျော်လာခဲ့ပြီး ငွေလည်း ဝင်လာခဲ့ပါတယ်။
ဒါကြောင့်လဲ အခုတော့ မြေးလေး အသက်ဆက်နိုင်ဖို့အတွက် ပိုက်ဆံလောက်လောက် ရှာပေးနိုင်ခဲ့ပါပြီ။ ကျူးကတော့ သူဟာ ဒီအလုပ်လုပ်ရမှာကို မရှက်သလို ကြောက်လည်း မကြောက်ပါဘူးလို့ ပြောပါတယ်။ ဒီအလုပ်လုပ်လို့ သူ့မြေးလေးက သာမန်ကလေးတွေလို လမ်းလျှောက်ပြန်နိုင်ရင် သူစိတ်ပျော်ရပါတယ်လို့လည်း ကျူးက ပြောထားပါတယ်။
Source: Odditycentral
