ပုဂံဒေသပိုမိုတိုးတက်လာရေးအတွက် ပုဂံရှေးဟောင်းယဥ်ကျေးမှုနယ်မြေအား ပြည်ပခရီးသွားများကိုဆွဲဆောင်နိုင်ရေးအတွက် ဆောင်ရွက်သွားရေးနှင့်ပတ်သက်၍ နစက ဥက္ကဋ္ဌမှပြောကြားခဲ့သည်။
မန္တလေးတိုင်း၊ညောင်ဦးခရိုင်အတွင်း သဘာဝဘေးအန္တရာယ်ထိခိုက်မှုနှင့်ပတ်သက်သည့် အစည်းအဝေးအား မေ ၁၆ ရက်ကကျင်းပရာ နစက ဥက္ကဋ္ဌတက်ရောက်၍ အမှာစကားပြောကြားရာ၌ထည့်သွင်းပြောကြားခဲ့ခြင်းဖြစ်သည်။
အစားအစာများနှင့်ပတ်သက်၍ ဒေသအစားအစာများဖြင့်ပြည်တွင်း၊ ပြည်ပခရီးသွားများကို ဆွဲဆောင်နိုင်ရန်ကြိုးစားဆောင်ရွက်ရမည်ဖြစ်ပြီး ပုဂံဒေသတွင် ပုန်းရည်ကြီးများထွက်ရှိ၍ ပုန်းရည်ကြီးကိုအခြေခံသည့် အဆင့်မြင့်ဒေသအစားအစာများကို ကြံဆဆောင်ရွက်ဖို့တိုက်တွန်းခဲ့သည်။
“ပုဂံရှေးဟောင်းယဉ်ကျေးမှုနယ်မြေမှာ ပြည်ပခရီးသွားတွေကိုဆွဲဆောင်နိုင်ဖို့ဆောင်ရွက်သွားမယ်ဆိုရင် ပုဂံဒေသဟာ အခုထက်ပိုမိုတိုးတက်လာမှာပါ”ဟု နစက ဥက္ကဋ္ဌကဆိုသည်။
ထို့ပြင် ခရီးသွားများစနစ်တကျရှိစေရန် ဆောင်ရွက်ရမည်ဖြစ်ပြီး ခရီးသွားလုပ်ငန်းများကြောင့် ရှေးဟောင်းပစ္စည်းများလျော့နည်းပပျောက်မှုမရှိစေရန် ပစ္စည်းလုံခြုံမှုများရှိရေးအလေးထားရန် မှာကြားခဲ့သည်။
“တန်ဖိုးဖြတ်မရတဲ့ ရှေးဟောင်းအနုပညာလက်ရာတွေ ပျက်စီးမှုမရှိအောင် ထိန်းသိမ်းဆောင်ရွက်ရပါမယ်၊ ဈေးဆိုင်တွေစနစ်တကျရှိစေဖို့ကိုလည်း တာဝန်ရှိသူတွေက ကြပ်မတ်ဆောင်ရွက်ရပါမယ်”ဟု နစက ဥက္ကဋ္ဌကပြောသည်။
ရောင်းချလျက်ရှိသည့်ပစ္စည်းများအား ပုဂံဒေသမှထုတ်လုပ်သည့် ပစ္စည်းများဖြစ်စေရေးအတွက် (One Region One Product)ဖြစ်စေရန် ဆောင်ရွက်ရမည်ဖြစ်ပြီး နိုင်ငံတကာဧည့်သည်များအနေဖြင့် မြန်မာနိုင်ငံရှိ ဈေးဆိုင်များကိုကြည့်၍ မြန်မာတို့၏ ပုံရိပ်ကိုထင်ဟပ်စေနိုင်သဖြင့် စည်းကမ်းတကျရှိနေရန်လိုသည်ဟု မှာကြားခဲ့သည်။
လမ်းများပေါ်တွင် သဲများကြောင့်ဖုန်ထမှုမဖြစ်စေရန် အဓိကကျသည့်လမ်းများအား နိုင်လွန်ကတ္တရာလမ်းများခင်းရန်နှင့်လမ်းများချောမွေ့စေရန်ဆောင်ရွက်ရမည်ဖြစ်ပြီး လမ်းသွယ်များကိုလည်း ချောမွေ့စေရန်အမြဲပြင်ဆင်ထိန်းသိမ်းရမည်ဟု နစက ဥက္ကဋ္ဌကမှာကြားခဲ့သည်။
