ပေကျင်း၊ မေ ၁၈
တရုတ်အာဏာပိုင်များသည် ဟာသကုမ္ပဏီတစ်ခုကို ၎င်း၏ ဝန်ထမ်းတစ်ဦးက ပြည်သူ့ လွတ်မြောက်ရေး တပ်မတော် (PLA) နှင့် ပတ်သက်၍ ပြက်လုံး ထုတ်ခဲ့သောကြောင့် မေလ ၁၇ ရက် ဗုဒ္ဓဟူးနေ့တွင် ယွမ်သန်းနှင့်ချီ၍ ဒဏ်ရိုက်ခဲ့ကြောင်း သိရသည်။
တရုတ်လူရွှင်တော် လီဟောင်ရှီ သည် ပြီးခဲ့သည့်အပတ် စနေနေ့က ကျင်းပခဲ့သော ပေကျင်းမြို့ရှိ ရှိုးပွဲတစ်ခုတွင် PLA ၏ ဆောင်ပုဒ်ကို ပြက်လုံးတစ်ခုအတွင်း သွယ်ဝိုက်၍ အသုံးပြုခဲ့ကြောင်း တရုတ်ဆိုရှယ်မီဒီယာဖြစ်သည့် ဝေးဘော် ၌ တင်ထားသော အသံဖိုင်အရ သိရသည်။
လီသည် ပရိသတ်များအား ရှဉ့်တစ်ကောင်ကို လိုက်ဖမ်းနေသည့် သူ၏ အိမ်မွေးခွေးများအကြောင်း ပြောပြနေချိန်တွင် “လုပ်ပုံကိုင်ပုံ ကောင်းတယ်၊ တိုက်ပွဲတွေမှာ အနိုင်ရနိုင်တယ်” ဟူသော PLA ၏ ဆောင်ပုဒ်ကို အသုံးပြုခဲ့သည်။ ထိုလုပ်ရပ်သည် စစ်တပ်၏ လုပ်ဆောင်ပုံများအား အိမ်မွေးခွေးများ၏ အမူအရာများနှင့် ခိုင်းနှိုင်းသလို ဖြစ်သွားခဲ့သည်။
ထို့ကြောင့် လီ၏ မိခင်ကုမ္ပဏီဖြစ်သော ရှောင်းဂေါ် ကာချာ မီဒီယာကို ဥပဒေ ချိုးဖောက်မှု၊ စစ်တပ်အပေါ် အထင်မြင်သေးစေမှုတို့ဖြင့် ယွမ် ၁၄ ဒသမ ၇ သန်း (ဒေါ်လာ ၂ ဒသမ ၁၃ သန်း) ဒဏ်ရိုက်ခဲ့သည့်အပြင် ပေကျင်းနှင့် ရှန်ဟိုင်းမြို့တို့၌ ကျင်းပသွားမည့် ၎င်းကုမ္ပဏီ၏ ရှိုးပွဲများ အားလုံးကိုလည်း အချိန်အကန့်သတ်မရှိ ရပ်ဆိုင်းစေခဲ့သည်။
ထို့ပြင် လီကိုလည်း ဥပဒေနှင့်အညီ စုံစမ်းစစ်ဆေးမှုများ ပြုလုပ်နေကြောင်း ပေကျင်းရဲတပ်ဖွဲ့က ဗုဒ္ဓဟူးနေ့ညပိုင်းတွင် ဝေးဘော် အက်ပ်ပေါ်၌ ပြောကြားခဲ့သည်။
Source: CNA
