ဘီလာရုစ်သမ္မတ အလက်ဇန္ဒား လူကာရှန်ကို သည် နိုင်ငံများအား ရုရှားနှင့် ဘီလာရုစ် ပြည်ထောင်စုထံ ပူးပေါင်း ပါဝင်လာပါက နျူကလီးယားလက်နက်များ ပံ့ပိုးပေးသွားမည်ဟု အင်တာဗျူးတစ်ခုတွင် ကမ်းလှမ်းခဲ့ကြောင်း သိရသည်။
အဆိုပါ ပြောကြားချက်သည် ရုရှားက ၎င်း၏ နျူလက်နက်များကို ဘီလာရုစ် ပိုင်နက်သို့ စတင်ပြောင်းရွှေ့နေပြီဟူသော သတင်းများ ထွက်ပေါ်လာပြီးနောက် ရက်ပိုင်းအကြာတွင် ပေါ်ပေါက်လာခြင်းဖြစ်သည်။
“ဒါက အရမ်းရိုးရှင်းပါတယ်။ နိုင်ငံတွေဟာ ရုရှားနဲ့ ဘီလာရုစ် ပြည်ထောင်စုနဲ့ ပူးပေါင်းသင့်ပါတယ်။ အဲလိုလုပ်တာနဲ့ ပူးပေါင်းတဲ့ နိုင်ငံတိုင်း နျူလက်နက်တွေ ရလိမ့်မယ်” ဟု လူကာရှန်ကို က ရုရှား သတင်းစာဆရာ ပါဗဲ ဇာရူဘင်နှင့် ပြုလုပ်ခဲ့သည့် အင်တာဗျူး၌ ကာဇက်စတန် နိုင်ငံနှင့် ပတ်သက်၍ မေးခွန်းများ ဖြေကြားနေစဉ် ပြောကြားခဲ့သည်။
ထိုအင်တာဗျူးကို ပြီးခဲ့သည့်အပတ် ကြာသပတေးနေ့ကတည်းက ရိုက်ကူးခဲ့သော်လည်း တနင်္ဂနွေနေ့ရောက်မှ နိုင်ငံပိုင် ရုရှား ၁ ချန်နယ်တွင် ထုတ်လွှတ်လာခဲ့သည်။
လူကာရှန်ကို သည် ၎င်း၏ ပြည်ထောင်စုထဲသို့ မည်သည့်နိုင်ငံများ ဝင်ရောက်နိုင်သည်ကို ရှင်းရှင်းလင်းလင်း ပြောကြားထားခြင်း မရှိသေးသကဲ့သို့ အခြားအသေးစိတ် အချက်အလက်များကိုလည်း ထုတ်ဖော်ပြောဆိုခြင်းမျိုး မရှိခဲ့ပေ။
Source: WION
