ယနေ့ဇွန်လ (၁) ရက် နံနက်တွင် ဖွင့်လှစ်သည့် (၅၁) ကြိမ်မြောက် ကျပ် (၁၀၀၀) တန် အောင်ဘာလေထီဖွင့်ပွဲတွင် ဆုကြေးငွေ အမြင့်ဆုံးဖြစ်သည့် ကျပ် သိန်း (၅၀၀၀) အထူးဆုကြီးကို ဆုလာဘ်ပိုင် ရတနာထီဆိုင်ကြီးမှ ဆွတ်ခူးရရှိခဲ့ကြောင်း သိရသည်။
ထို့အပြင် နောက်ထပ် အထူးဆုတစ်ခုဖြစ်သည့် ကျပ်သိန်း (၁၀၀၀) ဆုကို ရတနာမိုးထီဆိုင်မှ ဆွတ်ခူးရရှိခဲ့ကြောင်း အောင်ဘာလေ သိန်းဆုဌာနခွဲမှ စုံစမ်းသိရသည်။
ကျပ် (၁၀၀၀) တန် အောင်ဘာလေထီဖွင့်ပွဲအတွက် ထီစာအုပ်ရောင်းရသည့် အရေအတွက်မှ ရောင်းရငွေ ၇၀ ရာခိုင်နှုန်းကို ကျပ်သိန်း (၅၀၀၀) ဆု (၁) ဆု၊ ကျပ်သိန်း (၁၀၀၀) ဆု (၁) ဆုနှင့် ဆုတစ်ဆုချင်းစနစ်ဖြစ်သည့် ကျပ်သိန်း(၅၀၀)၊ ကျပ်သိန်း (၂၀၀)၊ ကျပ်သိန်း(၁၀၀)၊ ကျပ်သိန်း (၅၀) ၊ ကျပ်သိန်း(၂၀) ၊ ကျပ်သိန်း (၁၀) နှင့် ဝေဝေဆာဆာ ပဒေသာစုမဲများ ဖြစ်သည့် ကျပ် (၃) သိန်း၊ ကျပ် (၂) သိန်း၊ကျပ် (၁)သိန်း၊ ကျပ် (၅) သောင်းနှင့် ကျပ် (၁)သောင်းဆုတို့ကို ချီးမြှင့်ပေးခြင်း ဖြစ်သည်။
ယင်းအပြင် ဘဏ္ဍာသိမ်း ရငွေထဲမှ ကျပ် (၁၀) သိန်း၊ ကျပ် (၃) သိန်း၊ ကျပ် (၂) သိန်း ဆုတို့ကို အသီးသီးချီးမြှင့်ပေးသွားမည်ဖြစ်ကြောင်းလည်း သိရသည်။
ယခုဖွင့်လှစ်လိုက်သည့် (၅၁) ကြိမ်မြောက် အောင်ဘာလေ ထီဖွင့်ပွဲတွင် အမြင့်ဆုံး ဆုကြေးဖြစ်သည့် ကျပ်သိန်း (၅၀၀၀) အထူးဆုကြီးအား ဆုလာဘ်ပိုင်နှင့် ထီမင်းထီးမင်း ထီဆိုင်ပင်ရင်းဆိုင်မှ ဆွတ်ခူးရရှိသွားသူမှာ နေပြည်တော်တွင် နေထိုင်သည့် အစိုးရ ဝန်ထမ်းတစ်ဦးဖြစ်ကြောင်း နီးစပ်သူများထံမှ စုံစမ်း သိရသည်။
အဆိုပါ ဆုလာဘ်ပိုင် ထီဆိုင်မှာ (၁၅) ကြိမ်မြောက် ကျပ် (၁၀၀၀) တန် ထီဖွင့်ပွဲတွင်လည်း အမြင့်ဆုံး ထီဆုကြေးဖြစ်သည့် ကျပ်သိန်း(၁၅၀၀၀) အထူးဆုကြီးနှင့် အခြားထီဆုကြီးများကို ထိုက်တန်စွာ ကံထူးဆွတ်ခူးခဲ့ကြောင်း သိရသည်။
ဆုလာဘ်ပိုင်နှင့် ထီမင်းထီးမင်း ထီဆိုင်ပင်ရင်းသည် နေပြည်တော်၊ လက်လုပ်တောင်၌ (၉) ကြိမ်မြောက်မှစ၍ အဓိဌာန်ပြုဖွင့်လှစ်ခဲ့ခြင်းဖြစ်ကြောင်းလည်း သိရသည်။
