လက်ရှိကာလအတွင်း ပြည်တွင်းဆန်ဈေးကွက်အတွင်း၌ ဈေးနှုန်းအမြင့်ပိုင်းတွင် ငြိမ်သက်နေပြီး စပါးဈေးနှုန်းမှာ မြင့်တက်နေကြောင်း ဆန်/စပါး လုပ်ငန်းရှင်များထံမှသိရသည်။
ပြီးခဲ့သည့် လများအတွင်းက သိသိသာသာမြင့်တက်လာသည့် ဆန်ဈေးနှုန်းများမှာ လက်ရှိတွင် အမြင့်ဈေးဖြင့်သာ ငြိမ်နေပြီး သိသိသာသာ အပြောင်းအလဲဖြစ်ပေါ်
ခြ င်းမရှိကြောင်း ဆန်ဈေးကွက်အတွင်းမှ သိရသည်။
လက်ရှိတွင် ရွှေဘိုပေါ်ဆန်း (၁) အိတ်လျှင် (၁) သိန်းကျပ် ဝန်းကျင်တွင် အထိရှိနေပြီး ရက် (၉၀) ဆန် တစ်အိတ်လျှင် (၇၂၀၀၀)ကျပ်ဝန်းကျင်၌ လည်းကောင်း ၊ သီးထပ်ဆန်တစ်အိတ်လျင် (၆၅၀၀၀) ကျပ် ဝန်းကျင်၌ လည်းကောင်း အသီးသီး ဈေးပေါက်နေခြင်းဖြစ်သည်။
အဆိုပါဈေးနှုန်းများမှာ လွန်ခဲ့သည့် လအနည်းငယ်အတွင်းက ပြည်တွင်းဈေးကွက်၌ ဖြစ်ပေါ်ခဲ့သည့် ဈေးနှုန်းများနှင့် သိသိသာသာ အပြောင်းအလဲမရှိသော်လည်း ပြန်လည်ကျဆင်းခြင်း မရှိသေးခြင်းလည်း ဖြစ်သည်။
ယင်းကဲ့သို့ ပြည်တွင် ဆန်ဈေးနှုန်း မြင့်တက်နေရခြင်းနှင့် အမြင့်ပိုင်းတွင် ရပ်တန့်နေရခြင်းမှာ လျှပ်စစ်မီးပျက်တောက်မှုကြောင့် ဆန်/စပါး ကြိတ်ခွဲမှုအပိုင်းတွင် အခက်အခဲများ ရှိနေခြင်းနှင့်လည်း သက်ဆိုင်ကြောင်း ဆန်/စပါး လုပ်ငန်းရှင်အချို့က သုံးသပ်ကြသည်။
ယင်းကဲ့သို့ ဆန်စက်များ၏ ကြိတ်ခွဲထုတ်လုပ်မှုမှာ ပုံမှန်အောက်လျော့နည်းလာခြင်းအပြင် ဈေးကွက်သို့ ဆန်အဝင်လျော့လာခြင်းနှင့် ပြည်တွင်းပြည်ပဈေးကွက်ဝယ်လို အားရှိနေခြင်းတို့ကြောင့် ဈေးတက်ခြင်းဖြစ်ကြောင်း စားသုံးသူရေးရာဦးစီးဌာနမှ ထုတ်ပြန်ထားသည့် အချက်အလက်အရ သိရသည်။
လက်ရှိ ဧရာဝတီတိုင်းဈေးကွက်၌ ပုသိမ် ပေါ်ဆန်းစပါး တင်း ၁၀၀ ကို ၂၁၂၉၀၀၀ ကျပ် ပေါက်ဈေးရှိပြီး တင်း ၁၀၀ ကို ၅၃၀၀၀ ကျပ်အထိ ဈေးမြင့်တက်လာကြောင်း သိရသည်။
အခြား မြောင်းမြ၊ ဒေးဒရဲ၊ ဖျာပုံ၊ မအူပင်တို့ရှိ ပထမ တန်းစား စပါးတင်း ၁၀၀ ကို အနိမ့်ဆုံး ၂၀၀၀၀ မှ အမြင့်ဆုံး ၄၀၀၀၀ အထိ ဈေးမြင့်တက်လာပြီး တင်း ၁၀၀ ကို ၁၇၇၀၀၀ မှ သိန်း ၂၀ ကျော်ထိ ပေါက်ဈေးရှိနေကြောင်း သိရသည်။
