အိန္ဒိယနိုင်ငံ၏ အသေးစားဖွံ့ဖြိုးမှုစီမံကိန်း ( Special Development Project- SDP) အစီအစဥ်အရ ပေးအပ်မည့် အကူအညီများရယူရန် အမေရိကန်ဒေါ်လာ (၂)သန်း အောက် ပမာဏဖြင့် ဆောင်ရွက်မည့် စီမံကိန်း (၁၅) ခုကို လျှောက်ထားခဲ့ကြောင်း ရင်းနှီးမြုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ဒုတိယဝန်ကြီး ဒေါက်တာ ဝါဝါမောင်က နိုင်ငံပိုင်သတင်းဌာနသို့ ပြောကြားထားသည်။
လျှောက်ထားရာတွင် ဝန်ကြီးဌာန (၅) ခုမှ စီမံကိန်း စုစုပေါင်း (၁၅) ခု လျှောက်ထားခဲ့ပြီး စီမံကိန်းလျှောက်ထားမှုဆိုင်ရာ စီမံချက်များကို သံတမန်လမ်းကြောင်းမှတဆင့် အိန္ဒိယအစိုးရထံ ပေးပို့ထားကြောင်း သိရသည်။
လက်ရှိအခြေအနေတွင် စိစစ်သုံးသပ်ဆဲဖြစ်ပြီး အိန္ဒိယက မြန်မာနိုင်ငံ၏ ကျန်းမာရေး၊ ပညာရေး၊ လူမှုအသိုက်အဝန်း တိုးတက်မှု ကဏ္ဍများတွင် အကောင်အထည်ဖော်မည့် စီမံကိန်းများကို အများဆုံး ကန်ဒေါ်လာ (၂) သန်းအောက် အကူအညီပေးမည့် စီမံကိန်းများ (Grant Projects) ဖြစ်ကြောင်း သိရသည်။
‘‘တချို့သော စီမံချက်လမ်းပိုင်းတွေကလည်း အိန္ဒိယနိုင်ငံက ဆောင်ရွက်နေတဲ့ စီမံကိန်းတချို့နဲ့ ဆက်နွယ်နေတာဖြစ်တဲ့အတွက် Special Development Project (SDP) ဖက်က မလျှောက်ဘဲ အခြား Channel ဖက်ကနေ တင်ပြတဲ့ အနေအထားတွေ ရှိပါတယ်’’ဟု ၎င်းက ဆက်လက်ပြောကြားခဲ့သည်။
စီမံကိန်း အဆိုပြုလွှာများအနေဖြင့် ကန်ဒေါ်လာ (၂) သန်းအောက်ကုန်ကျမည့် စီမံကိန်းများ ဖြစ်ရမည်ဖြစ်ပြီး အချိန်တိုအတွင်း စီမံကိန်းအကောင်အထည် ဖော်နိုင်ခြင်းရှိမရှိ၊ အကျိုးပြုမည့် လူဦးရေ, ရလဒ် အကျိုးသက်ရောက်မှု၊ကြောင်းကျိုးဆီလျော်မှု စသည်တို့ကို အဓိက အချက်များအဖြစ် ထည့်သွင်းစဥ်းစားစိစစ်ကာ ထောက်ပံ့သွားမည်ဖြစ်ကြောင်း သိရသည်။
MIFER အနေဖြင့် ဝန်ကြီး ဌာနများမှ ထပ်မံအဆိုပြုလာသည့် အကူအညီ စီမံကိန်းအသစ် (၁၉) ခု လက်ခံရရှိထားပြီး အများစုမှာ နည်းပညာ/သက်မွေးပညာ သင်တန်းကျောင်းများ အဆင့်မြှင့်တင်ခြင်း၊ သုတေသနနှင့် ဖွံဖြိုးမှု လုပ်ငန်းများ, ဒေသတစ်ခု ထုတ်ကုန်တစ်မျိုး MSME ဖွံ့ဖြိုးတိုးတက်ရေး လုပ်ငန်းများ၊ ရေဒီယို ထပ်ဆင့်အသံလွှင့်စက်ရုံများ အဆင့်မြှင့်တင်ခြင်း၊ ကျေးလက်လမ်းပိုင်းတည်ဆောက်ခြင်း စီမံကိန်းလုပ်ငန်းများ ပါဝင်ကြောင်း သိရသည်။
