ကရင်ပြည်နယ်၊ ဘားအံမြို့၊ ဘားအံ – သထုံသွားကားလမ်းပေါ်ရှိ ဘုရင့်ညီဂူအနီးမှ မိုင်းခွဲဖျက်ဆီးခံခဲ့ရသည့် တံတားအမှတ်(၁/၁၃)အား ဘားအံခရိုင်လမ်းဦးစီးဌာနမှ ပြန်လည်ပြင်ဆင်ပြီးဖြစ်ကြောင်း ဒေသခံများထံမှသိရသည်။
တံတားအမှတ်(၁/၁၃)၏ ပျက်စီးသွားသည့် အောက်ခြေတိုင်များ၊ တံတားလက်ရမ်းများ၊ အက်ကွဲကြောင်းများဖြစ်ပေါ်ခဲ့သည့် တံတားကြမ်းခင်းများအား ပြန်လည်ပြင်ဆင်ပြီးဖြစ်သဖြင့် ယနေ့ ဇူလိုင် ၂၃ ရက်မှ စတင်ကာ ဖြတ်သန်းသွားလာမည့် ကားများအား ယခင်အတိုင်းပုံမှန်ပြန်လည်ဖြတ်သန်းခွင့်ပြုနေကြောင်း သိရသည်။
“မိုင်း ခွဲခံရတဲ့နေ့က တံတားအခြေအနေကို သွားကြည့်တော့ အတော်အခြေအနေဆိုးတယ်။ အခု ပြင်ဆင်ပြီးသွားပြီဆိုတော့ စိတ်ချလက်ချဖြတ်လို့ရသွားပြီ။ သိရသလောက်တော့ အကြီးစားပြင်ဆင်တာလို့သိထားတယ်။ ပြင်ဆင်ဆဲကာလမှာ တံတားကိုတစ်ခြမ်းဖွင့်ထားပေးတယ် အဲဒီဖက်ကသွားပေါ့ ။ကုန်ကားတွေဆိုရင် တစ်စီးပြီးမှ နောက်ထပ်တစ်စီး ဖြတ်ရတာ”ဟု ဒေသခံတစ်ဦးကပြော သည်။
ဘားအံ – သထုံ သွားကားလမ်းပေါ် ဘုရင့်ညီဂူအနီးရှိ ပေ (၆၀) အရှည်ရှိသော တံတားအမှတ်(၁/၁၃) သည် ဇူလိုင် (၁၀) ရက်နံနက်ပိုင်းက မိုင်းခွဲဖျက်ဆီးခံခဲ့ရခြင်းဖြစ်ပြီး ယင်း တံတားသည် ဘားအံ-သထုံသွားကားလမ်းပိုင်း၌ အရှည်ဆုံးတံတားဖြစ်ကြောင်း သိရသည်။
