ပြီးခဲ့သည့်လက ရုရှားတွင် မအောင်မြင်သည့် ပုန်ကန်မှုကို ဦးဆောင်ခဲ့သော်လည်း တက်ကြွစွာ လှုပ်ရှားနေဆဲဖြစ်သည့် ဝက်ဂနာတပ်ဖွဲ့ပိုင်ရှင် ပရီဂိုဇင် က နိုင်ဂျာနိုင်ငံတွင် စစ်တပ်အာဏာသိမ်းမှုကို သတင်းကောင်းအဖြစ် ချီးကျူးပြီး ဝက်ဂနာတိုက်ခိုက်ရေးသမားများ၏ ဝန်ဆောင်မှုများကိုလည်း ကမ်းလှမ်းခဲ့သည်။
ပရီဂိုဇင်သည် ယင်းအာဏာသိမ်းမှုတွင် ပါဝင်ပတ်သက်မှုမရှိကြောင်း ထုတ်ဖော်ပြောဆိုခဲ့သော်လည်း သူသည် အနောက်နိုင်ငံကိုလိုနီနယ်ချဲ့သမားများအောက်မှ လွတ်မြောက်လာသည့် နိုင်ဂျာကိုမူ သူ၏တပ်ဖွဲ့များနှင့် ကူညီလိုသည့် သဘောရကြောင်း ပရီဂိုဇင် နှင့်ဆက်စပ်နေသည့် တယ်လီဂရမ်ချယ်နယ်များတွင် ပြောဆိုနေကြသည်။
“နိုင်ဂျာမှာ ဖြစ်ပျက်ခဲ့တာက သူတို့ရဲ့ ကိုလိုနီနယ်ချဲ့သမားတွေနဲ့ နိုင်ဂျာပြည်သူတွေရဲ့ တိုက်ပွဲကလွဲလို့ တခြား ဘာမှမဟုတ်ပါဘူး” ဟု ကြာသပတေးနေ့ညနေတွင် လွှင့်တင်ထားသည့် သတင်းစကားတွင် ဖော်ပြထားသည်။ တယ်လီဂရမ်မှ အဆိုပါအသံ သတင်းစကားအားပြောသူသည် ရုရှားဘာသာဖြင့် ပြောဆိုခဲ့ခြင်းဖြစ်သော်လည်း ပရီဂိုဇင်ပြောကြားခြင်းဟုမူ အတည်ပြု၍မရနိုင်ချေ။
“ဒီနေ့တော့ ဒါဟာ သူတို့ရဲ့ လွတ်လပ်ရေးကို ထိထိရောက်ရောက် ရယူနိုင်နေပါပြီ။ ကျန်တာတွေက နိုင်ဂျာနိုင်ငံသားတွေအပေါ် သံသယကင်းကင်းနဲ့ ထိရောက်တဲ့ အုပ်ချုပ်မှုဖြစ်လိမ့်မယ်၊ ဒါပေမယ့် အဓိကကတော့ ကိုလိုနီနယ်ချဲ့သမားတွေကို ဖယ်ရှားလိုက်ပါပြီ” ဟု လည်း ယင်း အသံသတင်းစကားတွင် ဆိုထားသည်။
နိုင်ဂျာနိုင်ငံတွင် ဗုဒ္ဓဟူးနေ့ ညနေက စစ်တပ်မှအာဏာသိမ်းလိုက်ပြီဖြစ်ကြောင်း ကြေညာခဲ့ပြီး သမ္မတ မိုဟာမက် ဘဇိုမ်အား သမ္မတအိမ်တော်တွင် ထိန်းသိမ်းထားကာ နိုင်ငံကို မည်သူက ဦးဆောင်မည်ဆိုခြင်းကိုမူ ယခုအချိန်အထိ အတိအကျ မသိရသေးချေ။
ကမ္ဘာ့အဆင်းရဲဆုံးနိုင်ငံဖြစ်သော်လည်း ကမ္ဘာတွင် အကြီးဆုံး ယူရေနီယံသတ္တုသိုက်အချို့ကို ရှိနေသည့် နိုင်ဂျာ နိုင်ငံသည် ၁၉၆၀ တွင် ကိုလိုနီအုပ်စိုးသူဟောင်း ပြင်သစ်ထံမှ အပြည့်အဝ လွတ်လပ်ရေးရရှိခဲ့ကြေညာခဲ့သည်။
ရုရှားတွင် လက်နက်ကိုင်ပုန်ကန်မှုတစ်ရပ်ကို ပြီးခဲ့သည့်လအတွင်းက ဦးဆောင်ခဲ့သော ဝက်ဂနာတပ်ဖွဲ့ပိုင်ရှင် ပရီဂိုဇင်ကို မကြာသေးမီက စိန့်ပီတာစဘတ်တွင် ပြုလုပ်သည့် ထိပ်သီးအစည်းအဝေးတစ်ခုတွင် မြင်တွေ့ခဲ့ရသည်။
