တိုကျို၊ဩဂုတ် ၂၀
ဂျပန်နိုင်ငံသည် ပြည်တွင်းပြည်ပက ဆန့်ကျင် နေကြသော်လည်း မကြာမီအချိန်အတွင်း ဆူနာမီဒဏ်သင့်ဖူကူရှီးမားနျူစက်ရုံမှရေဒီယိုသတ္တိကြွရေများကို ပစိဖိတ်သမုဒ္ဒရာအတွင်းစွန့်ထုတ်မည်ဖြစ်သည်ဟုသိရသည်။
မစ္စတာကီရှီဒါသည် အဆိုပါအစီအစဉ်အားအကောင်အထည်မဖော်မီ ဖူကူရှီးမားသို့သွားကာ စွန့်ထုတ်မည့်ရေသည်အဏ္ဏဝါဂေဟစနစ်အားမထိခိုက်နိုင်ကြောင်း အလေးပေး ဖေါ်ပြ ရန်သွားရောက်မည်ဖြစ်သည်ဟုဆိုသည်။
အဆိုပါအစီအစဉ်အား လွန်ခဲ့သည့်နှစ်နှစ်ကတည်းကစတင်ရန်လုပ်ခဲ့သော်လည်း ဂျပန်ငါးဖမ်းလုပ်ငန်းအဖွဲ့အစည်းက အပြင်းအထန်ကန့်ကွက်ခဲ့ပြီး တောင်ကိုရီးယားနှင့်တရုတ်တို့ကလည်း ဆန့်ကျင်ခဲ့ကြကာ နိုင်ငံရေးနှင့်သံတမန်ရေးရာပြဿနာများအထိပါဖြစ်ပေါ်ခဲ့သည်။
ဂျပန်အစိုးရနှင့်စက်ရုံအော်ပရေတာဖြစ်သည့် Tokyo Electric Power Company (TEPCO) ကမူ စက်ရုံဖျက်သိမ်းနိုင်ရန်နှင့်မတော်တဆမှုကြောင့်အများအပြားယိုစိမ့်ခြင်းမှကာကွယ်နိုင်ရန် ရေဆိုးများကိုယခုကဲ့သို့နည်းနည်းခြင်းစွန့်ထုတ်မှသာအဆင်ပြေမည်ဖြစ်သည်ဟုဆိုသည်။
ဂျပန်သည် ယခုအစီအစဉ်အတွက် နိုင်ငံတကာအဏုမြူစွမ်းအင်အေဂျင်စီထံမှခွင့်ပြုချက်အား ဇူလိုင်လကရရှိခဲ့ပြီး TEPCO အနေဖြင့် နိုင်ငံတကာစံချိန်စံညွှန်းများနှင့်အညီ ရေဆိုးစွန့်ထုတ်မှုကိုပြုလုပ်ရမည်ဖြစ်သည်။
ဂျပန်၊တောင်ကိုရီးယားနှင့်အမေရိကန်တို့သည် တရုတ်နှင့်မြောက်ကိုရီးယား၏ခြိမ်းခြောက်မှုကိုရင်ဆိုင်ရန် သုံးနိုင်ငံဆက်ဆံရေးကိုမြှင့်တင်နေချိန်ဖြစ်သဖြင့် ဂျပန်၏ယခုအစီအစဉ်အား တောင်ကိုရီးယားသမ္မတယွန်းဆော့ယော်ဦးဆောင်သည့်အစိုးရကထောက်ခံပေးခဲ့သော်လည်း တောင်ကိုရီးယားပြည်တွင်း၌မူ သမ္မတယွန်းဆော့ယော်အပေါ်ဝေဖန်မှုများမြင့်တက်ခဲ့သည်။
ဂျပန်နိုင်ငံရှိဖူကူရှီးမားနျူဓာတ်အားပေးစက်ရုံသည် ၂၀၁၁ ခုနှစ်က ဆူနာမီဒဏ်ကိုအပြင်းအထန်ခံခဲ့ရပြီး စက်ရုံ၏အအေးပေးစနစ်အားထိခိုက်ခဲ့သဖြင့် အဆိုပါစက်ရုံမှရေများအား စည်ပေါင်းထောင်ချီဖြင့်သိမ်းဆည်းထားခဲ့ရာမှ ၂၀၂၄ ခုနှစ်အစောပိုင်းတွင်အများဆုံးထိန်းသိမ်းနိုင်မှုပမာဏသို့ရောက်ရှိမည်ဖြစ်သောကြောင့် စွန့်ထုတ်ရန်စီစဉ်ခြင်းဖြစ်သည်ဟုလည်းသိရသည်။
Source : AP
