ဝိသမလောဘသမားများမှ သတင်းမှားများဖန်တီးကာ စျေးကစားနေမှုများရှိနေသဖြင့် ကုန်စျေးနှုန်းများမြင့်တက်နေရခြင်းဖြစ်သည်ဟု နစက ဥက္ကဋ္ဌကဆိုသည်။
နေပြည်တော်၌ သြဂုတ် ၂၅ ရက်နံနက်ပိုင်းကပြုလုပ်သည့် ပြည်ထောင်စုသမ္မတမြန်မာနိုင်ငံတော် စီးပွားရေးရာကော်မတီအစည်းအဝေး အမှတ်စဥ် (၇/၂၀၂၃)သို့ နစက ဥက္ကဋ္ဌတက်ရောက်၍ အမှာစကားပြောကြားရာ၌ ထည့်သွင်းပြောကြားခဲ့ခြင်းဖြစ်သည်။
မိမိတို့ရသင့်ရထိုက်သည့် နိုင်ငံခြားငွေများကိုမရရှိအောင် နည်းအမျိုးမျိုးဖြင့်တားဆီးကာ စီး ပွားရေးအကျပ်အတည်းဖြစ်အောင်ဆောင်ရွက်ခဲ့မှုများရှိ၍ ဝင်ငွေ၊ ထွက်ငွေမျှတမှုရှိစေရန် နိုင်ငံနှင့်ပြည်သူလူထုအတွက် အရေးကြီးသည့် ကုန်စည်တင်သွင်းခြင်းနှင့်လုပ်ငန်းများကို ဦးစားပေးဆောင်ရွက်ခဲ့သည်ဟု ဆိုသည်။
“အဲဒီအခြေအနေအပေါ်မှာ သတင်းမှားတွေ ဖန် တီးခဲ့ပြီး ကုန်ဈေးနှုန်းတွေကို ဆွဲတင်ခဲ့ကြတယ်၊ နောက်ပြီး ကုန်ဈေးနှုန်းများမြင့်တက်စေဖို့ တချို့ဝိသမလောဘသမားတွေရဲ့ ဈေးကစားနေတာတွေလည်းရှိတယ်၊ ဒါကို တာဝန်ရှိသူတွေက ကြပ်မတ်ဆောင်ရွက်ရပါမယ်”ဟု နစက ဥက္ကဋ္ဌကပြောသည်။
ငွေကြေးဈေးကွက်ကို အဓိကကစားနေကြသူများမှာ ပြည်တွင်းကျပ်ငွေ၊နိုင်ငံခြားငွေနှင့်ရွှေကိုင်ထားကြသူများဖြစ်ပြီး နိုင်ငံခြားငွေကိုင်ထားသူများက ၎င်းတို့၏ နိုင်ငံခြားငွေတန်ဖိုးတက်စေရန်၊မြန်မာကျပ်ငွေကိုင်ထားသူများက ရွှေဝယ်၍ ရွှေဈေးတက်ရန်ဆောင်ရွက်နေကြသည်ဟု ဆိုသည်။
ထို့ကြောင့် နိုင်ငံခြားငွေများနှင့်ရွှေဈေးနှုန်းများ တည်ငြိမ်မှုရှိစေရန် မိမိတို့ကော်မတီအနေဖြင့် စနစ် တကျသုံးသပ်ကိုင်တွယ်ဆောင်ရွက်ရမည်ဟု မှာကြားသည်။
ထို့ပြင် မော်တော်ယာဉ်များ၏ ဈေးနှုန်းမှာလည်း ထိုက်သင့်သည့် ဈေးထက်များပြားနေသည်ကို တွေ့ရကာ ငွေကိုင်ထားသူများသည် တိုင်းပြည်နှင့်ပြည်သူလူထုကိုတိုက်ရိုက်အကျိုးရှိမည့် စိုက်ပျိုးမွေးမြူရေးနှင့်ကုန်ထုတ်လုပ်မှုလုပ်ငန်းများအပေါ် ရင်းနှီးမြှုပ်နှံခြင်းထက် ငွေရလွယ်ပြီးအမြတ်များများရနိုင်မည့် လုပ်ငန်းများကိုသာ လုပ်ကိုင်လိုခြင်းကို နည်းမှန်လမ်းမှန်ဖြစ်အောင် ပြုပြင်ဆောင်ရွက်ရမည်ဟု ဆိုသည်။
မိမိတို့ကော်မတီအနေဖြင့် နိုင်ငံ့စီးပွားမြှင့်တင်ရန် မဖြစ်မနေဆောင်ရွက်ရမည်ဖြစ်ကာ နိုင်ငံ၏ အခြေအနေအရပ်ရပ်ကိုသုံးသပ်၍ ဆောင်ရွက်သင့်သည်များကို အမြန်ဆုံးအကောင်အထည်ဖော် ဆောင်ရွက်နိုင်ရန်လိုပြီး Quick Win ဖြစ်မည့်လုပ် ငန်းများကို ဦးစားပေးဆောင်ရွက်နိုင်ရမည်ဟု မှာကြားသည်။
