ကချင်ပြည်နယ်၊ ဖားကန့်မြို့နယ်၊ ဆိပ်မူကျေးရွာတွင် မီးပြတ်နေချိန်၌ ထရန်စဖော်မာ ပုံးပေါ်သို့တက်ကာ မီးကြိုးဖြတ်ခိုးသည့် အမျိုးသားတစ်ဦး ဓာတ်လိုက်သေဆုံးသွားသည့်ဖြစ်စဉ် စက်တင်ဘာ (၃) ရက် နံနက်ပိုင်းက ဖြစ်ပွားခဲ့ကြောင်း သိရသည်။
“မီးပြတ်နေတဲ့အချိန် မီးကြိုးဖြတ်ခိုးတာမှာ ဓာတ်လိုက်သေဆုံးသွားတာပါ။ လျှပ်စစ်မိန်းကြိုးကို ဖြတ်ခိုးတာဖြစ်နိုင်တယ်။ မီးပြတ်နေပေမယ့် လျှပ်စစ်မိန်းကြိုးမှာက လျှပ်စစ်ဓာတ်အား ရှိနေတယ်လေ။ ထရန်စဖော်မာ ပုံးပေါ်မှာပဲ မှောက်ရက်ကြီး သေဆုံးသွားတာ။ ဘယ်ကလဲ၊ နာမည်ဘယ်သူလဲ ၊ ဆိုတာမသိရသေးပါဘူး”ဟု ဒေသခံတစ်ဦးက ပြောသည်။
သေဆုံးသူ၏ ရုပ်အလောင်းအား သင်္ခါလူမှုကူညီရေးအသင်းမှ ဖားကန့်မြို့နယ် ပြည်သူ့ဆေးရုံသို့ ပို့ဆောင်ပေးခဲ့ကြပြီး တာဝန်ရှိသူများမှလည်း စစ်ဆေးမှုများပြုလုပ်လျက်ရှိကြောင်း သိရသည်။