ကာကွယ်ရေးဦးစီးချုပ်ရုံး(ကြည်း၊ရေ၊လေ)မိသားစုများ၏ ၂၀၂၃ ခုနှစ် စတုတ္ထအကြိမ် မိုးရာသီသစ်ပင်စိုက်ပျိုးပွဲအား စက်တင်ဘာ ၇ ရက်ကကျင်းပရာ တပ်မတော်တစ်ရပ်လုံးအနေဖြင့် သစ်ပင်ပေါင်း ၁၇၅၆၇၄ ပင်အားစိုက်ပျိုးခဲ့ကြကြောင်း သိရသည်။
သဘာဝပတ်ဝန်းကျင်အား ထိန်းသိမ်းနိုင်စေရန်နှင့်ရာသီဥတုကိုအထောက်အကူဖြစ်စေရန်၊အရိပ်အာဝါသရရှိစေရန်၊နိုင်ငံ့စီးပွားရေးအတွက် တစ်ဖက်တစ်လမ်းမှ အထောက်အကူဖြစ်စေရန်ရည်ရွယ်၍ သစ်ပင်စိုက်ပျိုးပွဲအားကျင်းပခြင်းဖြစ်ရာ နေပြည်တော်၊ဇေယျာသီရိမြို့နယ်၊ရေဆင်းဆည်အနီး၌ပြုလုပ်သည့် သစ်ပင်စိုက်ပျိုးပွဲသို့ နစက ဥက္ကဋ္ဌနှင့်ဇနီးတို့တက်ရောက်ခဲ့သည်။
ယခုအခါ သစ်ပင်သစ်တောများပြုန်းတီးမှုကြောင့် ကမ္ဘာကြီးတဖြည်းဖြည်းပိုမိုပူနွေးလာကာ မိုးခေါင်ရေရှားခြင်း၊ရေကြီးခြင်း၊မုန်တိုင်းကျရောက်ခြင်း၊မြေပြိုခြင်း၊ငလျင်လှုပ်ခြင်းသဘာဝဘေးများကို ရင်ဆိုင်တွေ့ကြုံခံစားနေကြရပြီး တောတွင်းတိရစ္ဆာန်များလည်း တစ်ဖြည်းဖြည်း မျိုးသုဉ်းလျော့ပါးလာခြင်းသည် သက်ရှိများနှင့် သဘာဝတရား၏ ဂေဟစနစ်များတစ်စတစ်စ ကွာဟလာသည့် ဆိုးရွားမှုများ၏အကျိုးဆက်များဖြစ်သည်ဟု ဆိုသည်။
“နိုင်ငံဖွံ့ဖြိုးတိုးတက်ဖို့အတွက် လိုအပ်သလောက်သာထုတ်ယူသုံးစွဲတာ ပြန်လည်စိုက်ပျိုးတာတွေကိုပြုလုပ်မှသာ ပြည်သူတွေရဲ့ လူမှုစီးပွားဘဝ ဖွံ့ဖြိုးတိုးတက်မှုနဲ့သဘာဝပတ်ဝန်းကျင်၊ဂေဟစနစ်ထိန်းသိမ်းတာတွေကို ဟန်ချက်ညီ ဆောင်ရွက်သွားနိုင်မှာဖြစ်ပါတယ်”ဟု နစက ဥက္ကဋ္ဌကပြောသည်။
ထို့နောက် နစက ဥက္ကဋ္ဌနှင့်ဇနီးတို့မှ ရတနာတန်းဝင်ကျွန်းပင်ကို ဦးဆောင်စိုက်ပျိုးပေးခဲ့ကြပြီး ရတနာတန်းဝင်ကျွန်းပင် ၁၇၆၄ ပင်၊ မန်ဂျန်ရှား ၈၈၂ ပင်၊ ပိတောက် ၈၈၂ ပင်(စုစုပေါင်း ၃၅၂၈ ပင်)တို့အား စုပေါင်းစိုက်ပျိုးနေမှုများကို ကြည့်ရှုအားပေးခဲ့ကြသည်။
၂၀၂၃ ခုနှစ် စတုတ္ထအကြိမ်မိုးရာသီသစ်ပင်စိုက်ပျိုးပွဲ၌ ရတနာတန်းဝင်ပင်၊စက်မှုကုန်ကြမ်းသီးနှံပင်၊နှစ်ရှည်စားသုံးသီးနှံပင်၊အရိပ်ရလေကာပင်များကို နေပြည်တော်တိုင်းစစ်ဌာနချုပ်၌ ၇၃၈၀ ပင်၊ မြောက်ပိုင်းတိုင်းစစ်ဌာနချုပ်၌ ၁၅၂၅၅ ပင်၊ အရှေ့မြောက်တိုင်းစစ်ဌာနချုပ်၌ ၂၀၁၃၅ ပင်၊ အရှေ့ပိုင်းတိုင်းစစ်ဌာနချုပ်၌ ၉၅၂၅ ပင်၊ အရှေ့အလယ်ပိုင်းတိုင်းစစ်ဌာနချုပ်၌ ၁၃၆၁၈ ပင်၊ တြိဂံဒေသတိုင်းစစ်ဌာနချုပ်၌ ၁၄၆၁၃ ပင်၊ အရှေ့တောင်တိုင်းစစ်ဌာန ချုပ်၌ ၅၄၄၅ ပင်၊ ကမ်းရိုးတန်းဒေသတိုင်းစစ်ဌာနချုပ်၌ ၁၃၅၂၉ ပင်၊ ရန်ကုန်တိုင်းစစ်ဌာနချုပ်၌ ၉ဝ၈၃ ပင်၊ အနောက်တောင်တိုင်းစစ်ဌာနချုပ်၌ ၁၃၂၃၀ ပင်၊ အနောက်ပိုင်းတိုင်းစစ်ဌာနချုပ်၌ ၁၀၉၆၄ ပင်၊ အနောက်မြောက်တိုင်းစစ်ဌာန ချုပ်၌ ၉၁၁၂ ပင်၊ အလယ်ပိုင်းတိုင်းစစ်ဌာနချုပ်၌ ၂၀၂၀၇ ပင်နှင့် တောင်ပိုင်းတိုင်းစစ်ဌာနချုပ်၌ ၁၀၀၅၀ ပင်(စုစုပေါင်း ၁၇၅၆၇၄ ပင်)စိုက်ပျိုးခဲ့ကြကြောင်း သိရသည်။