မန္တလေးတိုင်း၊ငါန်းဇွန်မြို့နယ်၊နတ်ကြီးကျေးရွာရှိ လဖက်ရည်ဆိုင်ပိုင်ရှင်မိသားစုဝင် ၄ ဦး စက်တင် ဘာ ၉ ရက်(ယနေ့)ညနေပိုင်းက ဓားဖြင့်ထိုးခုတ်ခံခဲ့ရ၍ ၃ ဦးသေဆုံးကာ ၁ ပြင်းထန်ဒဏ်ရာရရှိခဲ့ကြောင်း သိရသည်။
ယနေ့ညနေ ၄ နာရီခွဲခန့်က အမည်မသိအမျိုးသား ၇ ဦးသည် ငါန်းဇွန်မြို့နယ်၊နတ်ကြီးကျေးရွာ၏ ရွာလယ်တွင်ဖွင့်လှစ်ထားသည့် လဖက်ရည်ဆိုင်သို့ရောက်ရှိလာကာ ဆိုင်ပိုင်ရှင်ဦးမြင့်ခိုင်(၄၅)နှစ်၊၎င်း၏ဇနီးဖြစ်သူနှင့်သမီး ၂ ဦးတို့အား ဓားများဖြင့်ထိုးခုတ်ခဲ့ကြသည်။
“အခင်းဖြစ်ပြီးချိန်ကစပြီး ပြစ်မှုကျူးလွန်သွားတဲ့လူတွေကို ဖမ်းဆီးရမိဖို့အတွက် စုံစမ်းစစ်ဆေးတာတွေ ပိတ်ဆို့ရှာဖွေတာတွေလုပ်နေပါတယ်၊ အခင်းဖြစ်ချိန်ဆိုင်ထဲမှာလူတွေရှိနေပေမယ့် ဓားတွေနဲ့ဆိုတော့ကြောက်လန့်ပြီး ဝင်မတားရဲကြတာလို့ပြန်ကြားရတယ်”ဟု လုံခြုံရေးအဖွဲ့နှင့်နီးစပ်သူတစ်ဦးကပြောသည်။
ထိုသို့ ထိုးခုတ်ခံရမှုကြောင့် ဆိုင်ရှင်ဖြစ်သူ ဦးမြင့်ခိုင်၊ဇနီးဖြစ်သူ ဒေါ်မြင့်မြင့်ဌေး(၄၃)နှစ်နှင့် မမြတ်စုမွန်(၁၄)နှစ်တို့မှာ ထိုးသွင်းပြတ်ရှဒဏ်ရာများရရှိ၍ အခင်းဖြစ်နေ ရာ၌ သေဆုံးသွားခဲ့ကြကြောင်း သိရသည်။
ထို့ပြင် သမီးဖြစ်သူ မအိအိငြိမ်း(၁၇)နှစ်တွင်လည်း ထိုးသွင်းပြတ်ရှဒဏ်ရာများ(စိုးရိမ်ရ)ရရှိခဲ့သဖြင့် တိုက်နယ်ဆေးရုံမှတဆင့် မန္တလေးပြည်သူ့ဆေးရုံကြီးသို့ လွှဲပြောင်းပို့ဆောင်ပေးခဲ့ကြကြောင်း သိရသည်။
