ဗီယက်နမ်နိုင်ငံ၊ဒါနန်းမြို့၌ကျင်းပလျက်ရှိသည့် (၁၆)ကြိမ်မြောက် အာဆီယံပြန်ကြားရေးဝန်ကြီးများအစည်းအဝေးနှင့်ဆက်စပ်အစည်းအဝေးများတက်ရောက်နေသည့် ပြည်ထောင်စုဝန်ကြီးဦးမောင်မောင်အုန်းသည် တရုတ်ပြန်ကြားရေးဝန်ကြီး၊ဗီယက်နမ်ပြန်ကြားရေးဝန်ကြီးတို့နှင့်သီးခြားစီတွေ့ဆုံဆွေးနွေးမှုများပြုလုပ်ခဲ့သည်။
တရုတ်နိုင်ငံ၊နိုင်ငံတော်ကောင်စီပြန်ကြားရေးဌာန ဝန်ကြီး Deputy Head of the Publicity Department of the CPC Central Committee ဖြစ်သူ H.E. Mr. Sun Yeli ၊ ဗီယက်နမ်နိုင်ငံ ပြန်ကြားရေးနှင့်ဆက်သွယ်ရေးဝန်ကြီးဌာန ဝန်ကြီး H.E.Nguyen Manh Hung တို့နှင့် စက်တင်ဘာ ၂၂ ရက်ညနေပိုင်းက ဒါနန်းမြို့ရှိ Furama Resort ၌သီးခြားစီတွေ့ဆုံဆွေးနွေးခဲ့ခြင်းဖြစ်သည်။
တရုတ်ပြန်ကြားရေးဌာနဝန်ကြီးနှင့်တွေ့ဆုံစဥ် မြန်မာ-တရုတ် နှစ်နိုင်ငံကြားမဟာဗျူဟာမြောက် ဘက်စုံ၊ကဏ္ဍစုံပူးပေါင်းဆောင်ရွက်ရေး၊နှစ်နိုင်ငံ၏ အမျိုးသားအကျိုးစီးပွားကို တိုးတက်မြင့်မားစေရန် ဆောင်ရွက်နေမှုများတွင် ပြန်ကြားရေးဆိုင်ရာကဏ္ဍပေါင်းစုံ (ရုပ်မြင်သံကြား၊ရေဒီယို၊ ပုံနှိပ်မီဒီယာ၊အွန်လိုင်းမီဒီယာ၊အပြန်အလှန် လေ့လာရေးခရီးစဉ်များ၊အပြန်အလှန်ချစ်ကြည်ရေးခရီးစဉ်များ)တွင် လက်ရှိ ပူးပေါင်းဆောင်ရွက်နေမှုများအပြင် ထပ်မံတိုးမြှင့်ဆောင်ရွက်ရေးတို့အား ဆွေးနွေးခဲ့ကြသည်။
ထို့ပြက် တရုတ်နိုင်ငံသို့ကမ်းလှမ်းထားသည့် တရုတ်-မြန်မာ စီးပွားရေးစင်္ကြံအောက်စီမံကိန်းများ၊ တရုတ်နိုင်ငံမှထောက်ပံ့မည့် ယွမ် ၄ ဘီလီယံအောက်စီမံကိန်းများ၊မဲခေါင်လန်ချန်း စီမံကိန်းများ၊အာဆီယံ-တရုတ်ဗဟိုဌာနသို့ ကမ်းလှမ်းထားသည့် စီမံကိန်း၊တရုတ်အကူအညီဖြင့်ဆောင်ရွက်ရန်ကမ်းလှမ်းထားသည့် စီမံကိန်းများနှင့်နှစ်နိုင်ငံကြား ချစ်ကြည်ရေးကိုပိုမိုတိုးမြှင့်ပေးနိုင်မည့် နိုင်ငံတကာအနုပညာဗဟိုဌာန(Art Center) စီမံကိန်းများ၊ရှေးဟောင်းရုပ်ရှင်ရုံကို Red Carpet Theater အဖြစ်ဆောင်ရွက်မည့်စီမံကိန်း၊လူထုအခြေပြုဗဟိုဌာန(Community Centres)စီမံကိန်းများကမ်းလှမ်းထားမှုတို့ကိုလည်း ဆွေးနွေးခဲ့ကြသည်။
ထို့ပြင် ဗီယက်နမ်ပြန်ကြားရေးနှင့်ဆက်သွယ်ရေးဝန်ကြီးနှင့်တွေ့ဆုံစဥ် နှစ်နိုင်ငံကြား ချစ်ကြည်ရင်းနှီးမှုနှင့်ပူးပေါင်းဆောင်ရွက်မှု ပိုမိုတိုးမြှင့်ရေး၊နှစ်နိုင်ငံအကြား လက်မှတ်ရေးထိုးထားသည့် ပြန်ကြားရေးကဏ္ဍပူးပေါင်းဆောင်ရွက်ရေး နားလည်မှုစာချွန်လွှာပါ ပူးပေါင်းဆောင်ရွက်မှုကဏ္ဍဖြစ်သည့် သတင်းနှင့်သတင်းအချက်အလက် ဖလှယ်ခြင်း၊ရုပ်မြင်သံကြားနှင့်ရေဒီယိုထုတ်လွှင့်ခြင်း၊ပုံနှိပ်ရေးနှင့်စာအုပ်ထုတ်ဝေခြင်း၊သတင်းကဏ္ဍတွင် လူ့စွမ်းအားအရင်းအမြစ် ဖွံ့ဖြိုးတိုးတက်မှုနှင့်သင်တန်းများဖွင့်လှစ်ခြင်းတို့၌ ဆက်လက်ပူးပေါင်းဆောင်ရွက်နိုင်ရေးတို့ကို ညှိနှိုင်းဆွေးနွေးခဲ့ကြသည်။
