ရန်ကုန် – မော်လမြိုင် သွားကားလမ်းတွင် ယနေ့အောက်တိုဘာ (၂၃) ရက်နံနက်ပိုင်းက မိုင်းပေါက်ကွဲမှုဖြစ်ပွားကာ ဘုရားဖူးကားတစ်စီး ထိမှန်ခဲ့ကြောင်း ဒေသခံ လူမှုကူညီရေးအသင်းများမှ သိရသည်။
ယနေ့နံနက် (၆) နာရီကျော်ခန့်က ရန်ကုန် – မော်လမြိုင်သွားကားလမ်း၏ မိုင်တိုင်အမှတ် ၁၃၂/၅ နှင့် ၁၃၂/၆ ကြားတွင် လက်နက်ကိုင်အဖွဲ့ဝင်များ ထောင်ထားသည့် လက်လုပ်မိုင်းပေါက်ကွဲခဲ့ရာ အခင်းဖြစ်ချိန် ဖြတ်သန်းသွားသည့် ဘုရားဖူးကားတစ်စီးအား ထိမှန်ခဲ့ခြင်း ဖြစ်သည်။
ထိုသို့ ထိမှန်ခဲ့မှုကြောင့် ဘုရားဖူးကားမောင်းနှင်သူတွင် မိုင်းစထိမှန်ဒဏ်ရာများ(စိုးရိမ်ရ)နှင့် လိုက်ပါလာသူ အမျိုးသမီးတစ်ဦးတွင် မိုင်းစထိမှန်ဒဏ်ရာများ(မစိုးရိမ်ရ)ရရှိခဲ့ကြသဖြင့် လူမှုကူညီရေးအသင်းဝင်များက ဆေးရုံသို့ပို့ဆောင်ပေးခဲ့ကြောင်း သိရသည်။
ထို့ပြင် မိုင်းစများထိမှန်ခဲ့သဖြင့် ဘုရားဖူးကား၏ ရှေ့မှန်ကွဲ၊ ကားဘေးဘက်တွင် ပေါက်ထွက်ပျက်ဆီးမှုများဖြစ်ပေါ်ခဲ့သဖြင့် ပြစ်မှုကျူးလွန်သူများအား ဖမ်းဆီးရမိရေးအတွက် လုံခြုံရေးအဖွဲ့ဝင်များက စုံစမ်းစစ်ဆေးလျက်ရှိကြောင်း သိရသည်။
