တနင်္သာရီတိုင်း၊ ထားဝယ်မြို့၊ တလိုင်းမရပ်၊ ဆိပ်ကမ်းသာလမ်း၊ ပြည်သူ့အပန်းဖြေရင်ပြင်ရှိ ထားဝယ်မြစ်ကမ်း၌ ထားဝယ်ရိုးရာ သပိတ်မျောပွဲအား ယနေ့ သီတင်းကျွတ်လပြည့်နေ့ အောက်တိုဘာ (၂၉) ရက် နံနက် (၄) နာရီခွဲက ကျင်းပခဲ့သည်။
အခမ်းအနားအား တနင်္သာရီတိုင်းဝန်ကြီးချုပ် ဦးမြတ်ကိုတက်ရောက်၍ သပိတ်မျှောပွဲ မုခ်ဦးအား ဖဲကြိုးဖြတ်ဖွင့်လှစ်ပေးပြီးနောက် အရှင်ဥပဂုတ္ထမထေရ်မြတ်အား သပိတ်မျှော၍ ဆွမ်းဆက်ကပ်ကုသိုလ်ပြုခဲ့သည်။
ထို့နောက် ထားဝယ်ရိုးရာသပိတ်မျောပွဲသို့ လာရောက်ကြသည့်ဒေသခံများက ထားဝယ်ရိုးရာ သပိတ်မျှောမုခ်ဦးမှ စတင်ပြီး အကွေ့များပါသော ၀င်္ကဘာကိုဖြတ်ကျော်ကာ စုပေါင်းသပိတ်မျှောခဲ့ကြသည်။
ထားဝယ်ရိုးရာ သပိတ်မျောပွဲသည် အရှင်ဥပဂုတ္တမထေရ်မြတ်အားရည်စူး၍ ထားဝယ်ရိုးရာ မြေသပိတ်အထဲတွင် ဆွမ်း၊ မုန့်၊ သစ်သီး၊ ပေါက်ပေါက်၊ မုန့်ဆီကြော်၊ ယိုအမျိုးမျိုးစသည့် လှူဖွယ်များထည့်ကာ တံခွန်၊ ကုက္ကားများ စိုက်ထူ၍ ဆီးမီးများထွန်းညှိပြီး သပိတ်မျှောခဲ့ခြင်းဖြစ်သည်။
ရာသီဥတုမိုးလေဝသကောင်းမွန်စေရန်၊ ဆန်ရေစပါးစီးပွားဥစ္စာပေါများ တိုးတက်စေရန်၊ မိုးဒဏ်၊ လေဒဏ်၊ သဘာဝဘေးရန်များနှင့် မကောင်းသော ဘေးဘယာကံကြမ္မာ အပေါင်းကင်းဝေးလွှတ်မြောက်စေရန် ဆုတောင်းပတ္တနာပြုသည့် ရည်ရွယ်ချက်ဖြင့် ကျင်းပခြင်းဖြစ်သည်။
