ကရင်ပြည်နယ်တွင် တစ်ပိုင်တစ်နိုင် စီးပွားဖြစ် စိုက်ပျိုးသည့် မြန်မာ့ဆေးရွက်ကြီး ဒေသအခေါ် ဓားလှီးဆေးများကို ထိုင်းနိုင်ငံမှ ဈေးကောင်းပေးနေ၍ စိုက်ပျိုးတောင်သူများ တွက်ခြေကိုက်လျက်ရှိကြောင်း သိရသည်။
မြန်မာ့ဆေးရွက်ကြီး စိုက်ပျိုးရာတွင် တစ်ဧကလျှင် အထွက်နှုန်း ၃၂၄ ပိဿာအထိ ထွက်ရှိကာ မြဝတီခရိုင်၊ စုကလိဒေသ ပေါက်ဈေးအနေဖြင့် တစ်ကီလိုလျှင် ထိုင်းဘတ်ငွေ ၂၅၀ အထိ ဈေးကောင်းရရှိကြောင်း သိရသည်။
ဆေးရွက်ကြီးပင်များကို စိုက်ပျိုးရာတွင် မြစ်နား၊ ချောင်းနား၊ ကမ်းနားများရှိ သဲနုန် မြေများပေါ်တွင် အစေ့ချစိုက်ပျိုးခြင်းဖြစ်ပြီး အပင်သက်တမ်း ခြောက်လမှ ခုနစ်လအကြာတွင် ခူးဆွတ်လှီးဖြတ် အခြောက်ခံပြီးဈေးကွက်သို့ တင်ပို့ရောင်းချကြကြောင်း သိရသည်။
မြန်မာ့ဆေးရွက်ကြီးကို ထိုင်းနိုင်ငံမှ ဆေးဝါးထုတ်လုပ်သည့် နေရာများ နှင့် ဓာတ်မြေဩဇာထုတ်လုပ်သည့်နေရာများတွင် သုံးစွဲကြကြောင်းသိရသည်။
“ဒီနှစ်မှာတော့ အရင်နှစ်ထက် ဈေးပိုရပါတယ်။ အရင်နှစ်ကတော့ လုပ်အားခနုတ်ပြီး တစ်ကီလိုဈေး ဘတ် ၂၀၀ ရတယ်။ အခုနှစ်ကတော့ အလုပ်သမားခနုတ်ပြီး တစ်ကီလို ထိုင်းဘတ် ၂၅၀ ရလို့ တော်တော်အဆင်ပြေပါတယ်”ဟု ဆေးရွက်ကြီးစိုက် တောင်သူတစ်ဦးက ပြောသည်။
အလုပ်သမားခအနေဖြင့် အမျိုးသမီးတစ်ဦး ထိုင်းဘတ် ၁၅၀၊ အမျိုးသားတစ်ဦး ထိုင်းဘတ် ၂၀၀ ထိပေးရပြီး ခူးဆွတ်ချိန်နှင့် လှီးဖြတ်အခြောက်ခံချိန်များတွင် လူငှားပြီး လုပ်ကိုင်ဆောင်ရွက်ကာ အလုပ်သမားခနုတ်ပြီး ဘတ် ၅၀၀,၀၀၀ ခန့် အမြတ်ကျန်ကြောင်း သိရသည်။
