မြန်မာနိုင်ငံမှထွက်ရှိသည့် ထုတ်ကုန်များကို ရုရှားနိုင်ငံသို့ တင်ပို့နိုင်ရေးနှင့် စပ်လျဉ်း၍ Online Business Matching ကျင်းပပြုလုပ်ခဲ့ကြောင်း စီးပွားရေးနှင့်ကူးသန်းရောင်းဝယ် ရေးဝန်ကြီးဌာန၊ ကုန်သွယ်မှုဖွံ့ဖြိုးရေးဌာနခွဲမှ သိရသည်။
မြန်မာကုန်သွယ်မှု မြှင့်တင်ရေးအဖွဲ့နှင့် ရန်ကုန်မြို့ရှိ ရုရှားကုန်သွယ်ရေး ကိုယ်စားလှယ်ရုံးတို့ ညှိနှိုင်းကာ Agricultural Products Export from Myanmar to Russia ခေါင်းစဉ်ဖြင့် မြန်မာ – ရုရှား Online Business Matching ကို ၂၀၂၄ ခုနှစ်၊ ဖေဖော်ဝါရီလ ၉ ရက်နေ့၊ နေ့လယ် (၂) နာရီတွင် ကျင်းပပြုလုပ်ခဲ့ခြင်း ဖြစ်သည်။
အဆိုပါဆွေးနွေးပွဲ ကို နှစ်နိုင်ငံကုန်သည်လုပ်ငန်းရှင်များအကြား ပထမဆုံးအကြိမ် မြန်မာနိုင်ငံမှ ဦးဆောင်ကျင်းပနိုင်ခဲ့ခြင်းဖြစ်ပြီး နှစ်နိုင်ငံကုန်သည်များအကြား ကုန်သွယ်မှု ပူးပေါင်းဆောင်ရွက်ရေးဆိုင်ရာ ကိစ္စရပ်များနှင့် နှစ်နိုင်ငံကုန်သွယ်ရေးကိုယ်စားလှယ် အဖွဲ့များ စေလွှတ်နိုင်ရေး ဆက်လက်ဆောင်ရွက်သွားမည်ဖြစ်ကြောင်း သိရသည်။
အဆိုပါ Online Business Matching သို့ မြန်မာနိုင်ငံဘက်မှ မြန်မာကုန်သွယ်မှုမြှင့်တင်ရေးအဖွဲ့မှ ညွှန်ကြားရေးမှူးချုပ် ဒေါ်နော်မူတာကပေါ နှင့် တာဝန်ရှိသူများ၊ ပြည်ထောင်စု သမ္မတမြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်းချုပ် (UMFCCI)၊ မြန်မာနိုင်ငံဆန်စပါးအသင်းချုပ်၊ မြန်မာနိုင်ငံပဲမျိုးစုံ၊ ပြောင်းနှင့်နှမ်းကုန်သည်များအသင်း ၊ မြန်မာနိုင်ငံ ရေထွက် ပစ္စည်းထုတ်လုပ်သူများနှင့် ပို့ကုန်လုပ်ငန်းရှင်များအသင်း၊ မြန်မာနိုင်ငံ သစ်သီးဝလံ၊ ပန်းမန်နှင့် ဟင်းသီး ဟင်းရွက်စိုက်ပျိုးထုတ်လုပ်တင်ပို့ရောင်းချသူများအသင်း၊ မြန်မာနိုင်ငံ ရော်ဘာစိုက်ပျိုးထုတ်လုပ်သူ များအသင်း၊ မြန်မာနိုင်ငံကော်ဖီအသင်းတို့မှ ကိုယ်စားလှယ်များ ပါဝင်တက်ရောက်ကြပြီး ရုရှားနိုင်ငံဘက်မှ ရုရှားကုန်သွယ်ရေးကိုယ်စားလှယ် Mr. Vladimir S. Kazadaev က ဦးဆောင်၍ ရုရှားနိုင်ငံရှိ စိုက်ပျိုးရေးလုပ်ငန်း ကုမ္ပဏီများ Virtual စနစ်ဖြင့် ပါဝင်တက်ရောက်ခဲ့ကြကြောင်း သိရသည်။