ယခု ဘဏ္ဍာနှစ်အတွင်း ပြည်ပသို့ မြန်မာ့သတ္ထုတွင်းထွက်ပစ္စည်းတင်ပို့မှုမှာ ယမန်နှစ်ကာလတူထက် ကန်ဒေါ်လာသန်း ၅၀ ကျော် လျော့ကျနေကြောင်း စီးပွားရေးနှင့် ကူးသန်း ရောင်းဝယ်ရေးဝန်ကြီးဌာနမှ ထုတ်ပြန်ထားသည့် ကုန်သွယ်မှုအချက်အလက်များအရ သိရသည်။
၂၀၂၃-၂၄ ဘဏ္ဍာနှစ် ဧပြီလမှ ဖေဖော်ဝါရီ (၁၆) ရက်အထိ ဆယ်လကျော်ကာလအတွင်း ပြည်ပနိုင်ငံများသို့ မြန်မာ့သတ္ထုတွင်းထွက် ပစ္စည်းများတင်ပို့မှုမှ အမေရိကန်ဒေါ်လာ ၂၃၈ ဒသမ ၄၅၀ သန်းရရှိခဲ့ပြီး ၂၀၂၂-၂၃ ဘဏ္ဍာနှစ် ကာလတူစာရင်းတွင် အမေရိကန်ဒေါ်လာ ၂၉၄ ဒသမ ၅၇၄ သန်းရရှိခဲ့ကြောင်း သိရသည်။
မြန်မာ့သတ္ထုတွင်းထွက် ပစ္စည်းများကို ပြည်ပနိုင်ငံများသို့ တင်ပို့ရာတွင် ကဏ္ဍအလိုက်တင်ပို့မှုအနေဖြင့် နိုင်ငံပိုင်တင်ပို့ရောင်းချမှုမှ ကန်ဒေါ်လာ ၃၂ ဒသမ ၆၄၆ သန်းနှင့် ပုဂ္ဂလိကပိုင် တင်ပို့ရောင်းချမှုမှ ကန်ဒေါ်လာ ၂၀၅ ဒသမ ၈၀၄ သန်း ရရှိခဲ့ကြောင်း သိရ သည်။
ပြည်ပနိုင်ငံများသို့ တင်ပို့ရောင်းချလျက်ရှိသည့် မြန်မာ့သတ္ထုတွင်းထွက်ပစ္စည်းများမှာ ကျောက်စိမ်း၊ စိန်၊ ရွှေ၊ ပုလဲ၊ ခဲ၊ ခဲမဖြူ၊ အဖြိုက်နက်၊ ကြေးနီ၊ ငွေ၊ ကျောက်မီးသွေး၊ သွပ်နှင့် အခြားတွင်းထွက်သတ္ထုများပါဝင်ကြောင်း သိရသည်။
