ရန်ကုန်တိုင်းဒေသကြီး၊ ကျောက်တန်းမြို့နယ်ရှိ ဇွဲဘာကမ်းခြေနှင့် သံတဲကမ်းခြေသို့ ပြီးခဲ့သည့် ဖေဖော်ဝါရီလပိုင်းမှစတင်ကာ ခရီးသွားလည်ပတ်မှုမြင့်တက်နေကြောင်း ဒေသခံများ၏ ပြောပြချက်အရ သိရသည်။
” အစကတော့ လူသိပ်မလာဘူး။ နောက်ပိုင်းတဖြည်းဖြည်းနဲ့ လာတဲ့ ခရီးသွားကများလာတယ်။ ရန်ကုန်ထဲက လူတွေအများဆုံးလာကြတာများတယ်။ ပီလခတ်ဘုရားကျောင်းကိုသွားပြီးရင် ကမ်းခြေဘက်ကိုလာကြတယ်။ အထူးသဖြင့် ပိတ်ရက်တွေဆို လူပိုများတယ်”ဟု အဆိုပါကမ်းခြေရှိ ဈေးရောင်းချသူ တစ်ဦးကပြောသည်။
သံတဲကမ်းခြေသို့ ဇွဲဘာ ကုန်းတန်းမှ မိနစ်နှစ်ဆယ်မောင်းဝင်ရပြီး အဆိုပါ ကမ်းခြေ၏ ထူခြားချက်သည် ကမ်းခြေတွင်ရှိသည့် အုတ်တိုင်ကြီးတစ်ခုဖြစ်ပြီး ယခင်က အုတ်တိုင်ကြီးကို အစွဲပြု၍ ကျောက်တိုင်ကမ်းခြေဟုခေါ်ဆိုကြကြောင်း သိရသည်။
” တချို့တွေက ခရီးဝေးတွေ မသွားနိုင်တော့ ဒီကမ်းခြေကို အသွားများလာကြတယ်။ ခရီးတို ပက်ကေ့လေးတွေ စီစဉ်ပေးရတယ်။ ပိတ်ရက်တွေဆို အော်ဒါအပြည့်ပဲ”ဟု ပြည်တွင်းခရီးသွားလုပ်ကိုင်နေသူတစ်ဦးက ပြောသည်။
အဆိုပါ သံတဲကမ်းခြေသို့ ကျောက်တန်းမြို့မှ မှော်ဝန်းမြစ်ကို ဖြတ်ပြီး တစ်ဘက်ကမ်းသို့ကူး၍ လည်ပတ်ရခြင်းဖြစ်ပြီး ယင်းခရီးစဉ်တွင် ရွှေဂူကြီးစေတီ၊ ကျောက်တိုင်ကမ်းခြေ၊ သက်တမ်းနှစ်ရာကျော်ရှိ မီးပြတိုက်ကြီး၊ ရေလယ်တွင်တည်ထားကြသည့် ဘုရားစေတီများ၊ ရွာဓလေ့ ရွာအလှများကို ခံစားရမည်ဖြစ်ကြောင်း သိရသည်။
