ဆိုးလ်၊မတ် ၁၄
တောင်ကိုရီးယားနှင့်အမေရိကတို့၏ စစ်ရေးလေ့ကျင့်မှုအပြီး၌ မြောက်ကိုရီးယားခေါင်းဆောင်ကင်မ်သည် တင့်ကားအသစ် တစ်မျိုး ပါဝင်သည့် စစ်ရေးပြကို ဦးဆောင်ပြုလုပ်ပြသခဲ့ကြောင်း နိုင်ငံပိုင်မီဒီယာ KCNA က မတ်လ (၁၄)ရက်နေ့တွင်ဖော်ပြခဲ့သည်။
ယခုပြသခဲ့သော ပင်မတိုက်ပွဲဝင်တင့်ကားအမျိုးအစားသစ်၏ ထူးခြားသောစွမ်းအားကို အောင်မြင်စွာပြသနိုင်ခဲ့သည့်အတွက် အလွန်ကျေနပ်မိကြောင်း ကင်မ်က ပြောကြားခဲ့သည်။
ယခုလေ့ကျင့်ရေးပွဲသည် တင့်ကားအဖွဲ့သားများ၏ တိုက်ခိုက်ရေးစွမ်းရည်ကို စမ်းသပ် စစ်ဆေးရန်နှင့် မတူညီသောနည်းဗျူဟာမစ်ရှင်များတွင် တိုက်ခိုက်ရေးလုပ်ဆောင်မှုများနှင့် အကျွမ်းတဝင်ရှိစေရန်ရည်ရွယ်ကြောင်း ကို လည်း၎င်းကဆိုခဲ့သည်။
ကြာသပတေးနေ့ကပြီးဆုံးသွားသော တောင်ကိုရီးယားနှင့်အမေရိကတို့ ပါဝင်သည့် ပူးတွဲစစ်ရေးလေ့ကျင့်မှု ပြီးဆုံးချိန်၌ ပြုံယမ်း၏ ယခုလေ့ကျင့်ရေးတိုက်ပွဲ ဖြစ်ပေါ်လာခြင်းဖြစ်သည်။
Freedom Shield စစ်ရေးလေ့ကျင့်မှုဟု လူသိများသော အဆိုပါစစ်ရေးလေ့ကျင့်မှုသည် ၂၀၁၈ ကချုပ်ဆိုခဲ့ပြီး နိုဝင်ဘာလက ပြုံယမ်းဘက်မှရုတ်သိမ်းခဲ့သည့် ကိုရီးယားနှစ်နိုင်ငံ စစ်ဘက်ဆိုင်ရာ သဘောတူညီချက်အား ဖျက်သိမ်းလိုက်ပြီးနောက် ပထမဆုံး ပြုလုပ်သည့် စစ်ရေးလေ့ကျင့်မှုလည်းဖြစ်သည်။
မြောက်ကိုရီးယားသည် တောင်ကိုရီးယားနှင့်အမေရိကတို့၏ အဆိုပါစစ်ရေးလေ့ကျင့်မှုများအား စစ်ကြိုအစမ်းလေ့ကျင့်မှုအဖြစ် ကာလရှည်ကြာရှုံ့ချခဲ့ပြီး ဆိုးလ်ကမူ အဆိုပါစစ်ရေးလေ့ကျင့်မှုများကို ကာကွယ်ရေးသက်သက်အဖြစ်သာလုပ်ဆောင်ခြင်းဖြစ်ကြောင်းဆိုခဲ့သည်။
Source : ရိုက်တာ/အက်ဖ်အိတ်ခ်ျ
