(၃၃) ကြိမ်မြောက် ဗီယက်နမ်နိုင်ငံ နိုင်ငံတကာကုန်စည်ပြပွဲတွင် မြန်မာနိုင်ငံအပါဝင် နိုင်ငံပေါင်း (၁၆) နိုင်ငံကျော်မှ စီးပွားရေး လုပ်ငန်း (၄၈၀) ကျော် ပါဝင်ပြသခဲ့ကြသည်။
ဧပြီ(၃) ရက် နံနက်(၉) နာရီအချိန်ခန့်က ဟနွိုင်းမြို့ နိုင်ငံတကာကုန်စည်ပြပွဲ ဗဟိုဌာန (ICE) တွင် ကျင်းပသည့် (၃၃) ကြိမ်မြောက် ဗီယက်နမ် နိုင်ငံတကာကုန်စည်ပြပွဲ ဖွင့်ပွဲအ ခမ်းအနားသို့ ဟနွိုင်းမြို့ရှိ မြန်မာသံရုံးယာယီတာဝန်ခံ/ သံ အမတ် ဦးစိုးကိုကိုလည်း တက်ရောက်ခဲ့ကြောင်း သိရသည်။
အဆိုပါ ပြပွဲကို ဗီယက်နမ်နိုင်ငံ စက်မှုနှင့် ကုန်သွယ်ရေးဝန် ကြီးဌာန၊ ဗီယက်နမ်ကုန်သွယ်ရေး မြှင့်တင်ရေး အေဂျင်စီ (VIETRADE) မှ ကြီးမှူးကျင်းပခြင်းဖြစ်သည်။
(၃၃) ကြိမ်မြောက် ဗီယက်နမ်ကုန်စည်ပြပွဲတွင် ပြခန်းပေါင်း (၆၀၀) ခန့် ဖွင့်လှစ်ပြသခဲ့ပြီး မြန်မာနိုင်ငံမှ 1-2-1 Public Co.,Ltd ၊ New A1 Family Co.,Ltd ၊ Golden Myanmar Honey Co.,Ltd နှင့် Shwe Zee Kwat Food Manufactur ing & International Export Co.,Ltd စသည့်ကုမ္ပဏီများမှ ပါဝင်ပြသခဲ့ကြောင်း သိရသည်။
ကုန်စည်ပြပွဲသို့ တရုတ်နိုင်ငံ၊ အိန္ဒိယနိုင်ငံ၊ တောင်ကိုရီးယား၊ လာအို၊ ကမ္ဘောဒီးယား၊ ရုရှားဖက်ဒရေးရှင်းနိုင်ငံတို့ ပါဝင်ပြသခဲ့ကြောင်း သိရသည်။
တရုတ်သည် ဗီယက်နမ်၏ အကြီးဆုံးကုန်သွယ်ဖက်နှင့် ဒုတိယအကြီးဆုံး ပို့ကုန်ဈေးကွက်အဖြစ် တည်ရှိနေပြီး ပြခန်းပေါင်း ၁၀၀ကျော်လာရောက်ဖွင့်လှစ်ခဲ့သည် ။
၂၀၂၃ ခုနှစ်ကစ၍ ဗီယက်နမ်-အိန္ဒိယ ဘက်စုံမဟာဗျူဟာ မိတ်ဖက်ဆက်ဆံရေး ခိုင်မာလာပြီးနောက်တွင်အိန္ဒိယပြခန်းများလည်းပါဝင်ပြသလာပြီဖြစ်သည်။
ဖွင့်ပွဲအခမ်းအနားသို့ ဗီယက်နမ်နိုင်ငံ စက်မှုနှင့် ကုန်သွယ်ရေးဝန်ကြီးဌာန၊ ဝန်ကြီး Mr. Nguyen Hong Dien နှင့်အတူ အစိုးရအဖွဲ့ဝင်များ၊ ဗီယက်နမ်နိုင်ငံအခြေစိုက် နိုင်ငံခြားသံ ရုံးအသီးသီးမှ သံအမတ်ကြီးများ၊ ကုန်သွယ်ရေးဆိုင်ရာ အ ကြံပေးများနှင့် စီးပွားရေးလုပ်ငန်းရှင်များလည်း တက်ရောက်ခဲ့ကြကြောင်း သိရသည်။