ဝန်ကြီးချုပ်ထဝီဆင်းကိုယ်တိုင် မဲဆောက်မြို့သို့ လာရောက်မည်ဟု သတင်းများထွက်ခဲ့သော်လည်း ဝန်ကြီးချုပ်ကို ယ်တိုင်လာရောက်ခြင်းမရှိဘဲ ဒုတိယဝန်ကြီးချုပ် Mr. Panpree Phitthanukorn ကိုသာ မဲဆောက်မြို့သို့ လွှတ်ခဲ့ကြောင်း သိရသည်။
ထိုင်းဒုတိယဝန်ကြီးချုပ်လည်းဖြစ် နိုင်ငံခြားရေးဝန်ကြီးလည်းဖြစ်သည့် Mr. Phitthanukorn သည် ယနေ့ ဧပြီ (၂၃) ရက် နေ့လယ်ပိုင်းတွင် မဲဆောက်မြို့သို့ ရောက်ရှိလာကြောင်း ထိုင်းသတင်းဌာနများ၏ ဖော်ပြချက်အရ သိရသည်။
ထိုင်း – မြန်မာ နယ်စပ် မြဝတီမြို့ စစ်ရေးတင်းမာမှုကြောင့် စစ်ဘေးရှောင်ပြည်သူ ထောင်နှင့်ချီကာ မဲဆောက်ဘက်ခြမ်းသို့ တိမ်းရှောင်လာရသည့် အခြေအနေနှင့် ပတ်သက်၍ ထိုင်းအစိုးရက အာရုံစိုက် စောင့်ကြည့်နေသည့်အပြင် လိုအပ်သည့် ကူညီမှုများပေးနိုင်ရန် ပြင်ဆင်မှုများလည်းလုပ် ဆောင်ထားသည့်အနေအထားဖြစ်သည်။
ယင်းကဲ့သို့ စစ်ရေးတင်းမာနေမှုကြောင့် ထိုင်းနိုင်ငံ နယ်စပ်ဒေသလုံခြုံရေးအတွက်လည်း ထိုင်းအစိုးရနှင့် စစ်တပ်က စောင့်ကြည့်လျက်ရှိနေပြီး အစိုးရအဖွဲ့ ထိပ်ပိုင်းတာဝန်ရှိသူ များ ကိုယ်တိုင် မဲဆောက်မြို့သို့ လာရောက်ကြည့်ရှုခဲ့ခြင်းလည်း ဖြစ်သည်။
ထိုင်းဒုတိယဝန်ကြီးချုပ်နှင့်အတူ ကာကွယ်ရေးဝန်ကြီးလည်း လိုက်ပါလာပြီး နှစ်နိုင်ငံနယ်စပ် လုံခြုံရေးနှင့် တည်ငြိမ်အေးချမ်းရေးအပါအဝင် စစ်ဘေးရှောင်အရေး ဆွေးနွေးမှုများ လုပ်ဆောင်သွားမည့် အခြေအနေရှိနေခြင်းလည်း ဖြစ်သည်။
ဒုတိယဝန်ကြီးချုပ်သည် မဲဆောက်မြို့ရှိ သက်ဆိုင်ရာအဖွဲ့အစည်းများနှင့် တွေ့ဆုံပြီး နှစ်နိုင်ငံ ကုန်သွယ် ရေးအခြေ အနေနှင့် မဲဆောက်မြို့သို့ ခိုလှုံလာသော စစ်ဘေးရှောင်အ ရေးကိစ္စများအား ဆွေးနွေးသွားရန်ရှိကြောင်း ထိုင်းအခြေ စိုက်သတင်းဌာနများ၏ ဖော်ပြချက်အရ သိရသည်။
ပြီးခဲ့သည့် ရက်ပိုင်းအတွင်းက ထိုင်း – မြန်မာ အမှတ်(၂) ချ စ်ကြည်ရေး တံတားနှင့် မြဝတီမြို့ရှိ ရပ်ကွက်အချို့တွင် တိုက်ပွဲများ ပြင်းထန်ခဲ့သည့်အတွက် ဒေသခံ (၃၀၀၀) ဝန်း ကျင် မဲဆောက်ဘက်ခြမ်းသို့ ထွက်ပြေး တိမ်းရှောင်ခဲ့ရပြီး မြဝတီဘက်ခြမ်း သောင်ရင်းမြစ် ကမ်းနံဘေးတွင်လည်း စစ်ဘေးရှောင်ဒေသခံ ထောင်နှင့်ချီကာ တိမ်းရှောင် ခဲ့ရသည့်အခြေအနေဖြစ်သည်။
လက်ရှိတွင် တိုက်ပွဲများ ပြန်လည် ငြိမ်သက်သွားပြီဖြစ်သ ည့်အတွက် မဲဆောက်သို့ ရောက်ရှိနေသည့် စစ်ဘေးရှောင်ဒေသခံများ နေရပ်ပြန်ကြသဖြင့် မဲဆောက်မြို့ရှိ စစ်ရှောင်စခန်းများတွင် မြဝတီဒေသခံစစ်ဘေးရှောင် (၇၀၀) ဝန်းကျင်သာ ရှိတော့ကြောင်း မဲဆောက်ရှိ စစ်ဘေးရှောင်အရေး ဆောင်ရွက်ပေးနေသည့် မြန်မာအသိုင်းအဝိုင်းထံမှ သိရသည်။
ထိုင်းဒုတိယ ဝန်ကြီးချုပ် မဲဆောက်မြို့သို့ လာရောက်ခဲ့သည့်အတွက် ဝန်ကြီးချုပ်ထဝီဆင်း၏ ခရီးစဉ် အထမြောက်နိုင်ခြင်းရှိမရှိနှင့် ပတ်သက်၍ အသေးစိပ်မသိရှိရသေးကြောင်းလည်း မဲဆောက်ရှိ သတင်းရင်းမြစ်များထံမှ သိရသည်။
ဓာတ်ပုံ -BBC
