ရွှေဆိုင်များအနေဖြင့် သတ်မှတ်ဈေးနှုန်းအတိုင်းရောင်းချရန်နှင့် နေ့စဉ်ဖွင့်လှစ်၍ အရောင်းအဝယ်ပြုလုပ်ရန် YGEA က အသိပေးထုတ်ပြန်ထားသည်။
ရန်ကုန်တိုင်းဒေသကြီး ရွှေလုပ်ငန်းရှင်များအသင်းမှ နေ့စဉ်ရောင်းချရမည့် ရွှေဈေးနှုန်းကို တစ်နေ့ (၃)ကြိမ် သတင်းထုတ်ပြန်ပေးလျက်ရှိပြီး ရွှေရောင်းချသည့်အခါတွင် သတ်မှတ်သည့် ဈေးနှုန်းအတိုင်း ရောင်းချရန် အသိပေးထားသည်။
ထို့ပြင် ရွှေဆိုင်များအနေဖြင့်လည်း နေ့စဉ်ဖွင့်လှစ်၍ အရောင်းအဝယ်ပြုလုပ်ကြရန် အသိပေးထားပြီး ရွှေနှင့်ငွေကြေးဈေးကွက် စောင့်ကြည့်၊ ထိန်းသိမ်း၊ ကြပ်မတ်ရေးလုပ်ငန်းကော်မတီနှင့် သက်ဆိုင်ရာဌာနဆိုင်ရာများအနေဖြင့် ကြပ်မတ်ထိန်းသိမ်းဆောင်ရွက်လျက်ရှိကြောင်း သိရသည်။
ရွှေဈေးနှုန်းတည်ငြိမ်ရေးအတွက် ရွှေဆိုင်များအနေဖြင့် နေ့စဉ်ရွှေဆိုင်များအား ဖွင့်လှစ်ခြင်း၊ သတ်မှတ်ဈေးနှုန်းဖြင့် ရောင်းချခြင်းများကို ဆောင်ရွက်ပေးရန် အသိပေးထားပြီး သက်ဆိုင်ရာမှ လာရောက်စစ်ဆေးသည့်အခါတွင် ညွှန်ကြားချက်များကို လိုက်နာဆောင်ရွက်ခြင်းမရှိပါက ထိရောက်စွာ အရေးယူဆောင်ရွက်မည်ဖြစ်ကြောင်း ကြိုတင်အသိပေးထားသည်။
ပြီးခဲ့သည့် ရက်ပိုင်းအတွင်း ရွေဈေးသည် (၅၈)သိန်းကျော်အထိ စံချိန်တင်မြင့်တက်ခဲ့ပြီး သက်ဆိုင်ရာအဖွဲ့အစည်းများမှ စုံစမ်းစစ်ဆေးမှုများပြုလုပ်ပြီးနောက်ပိုင်း ရွှေဈေး သည် ဈေးကွက်အတွင်း (၅၂) သိန်းကျော်သာ ရှိတော့ကြောင်း သိရသည်။
ပြီးခဲ့သည့် မတ်လအတွင်း ပြည်တွင်းရွှေဈေး ကျပ် (၄၁) သိန်းကျော်သာရှိရာမှ ဧပြီလတွင် ကျပ် (၄၅) သိန်းကျော်သို့ မြင့်တက်ခဲ့ပြီး မေလအလယ်မှ စတင်ကာ ကျပ်သိန်း (၅၀) ကျော်သို့ ဆက်လက်မြင့်တက်ခဲ့ခြင်းဖြစ်သည်။
