ဒီနေ့မနက်အစောပိုင်း ကစားခဲ့တဲ့ ယူရို ၂၀၂၄ ၁၆ သင့်အဆင့် ရှုံးထွက်ပွဲစဉ်တွေမှာတော့ ပြင်သစ်အသင်းနဲ့ ပေါ်တူဂီအသင်းတို့ ပြိုင်ဘက်တွေကို အနိုင်ရပြီး ကွာတာဖိုင်နယ်ကို အသီးသီး တက်ရောက်သွားကြပါပြီ။
ပြင်သစ်အသင်းက ဘယ်ဂျီယံနဲ့ တွေ့ခဲ့တာဖြစ်ပြီး ဒုတိယပိုင်း ၈၅ မိနစ်မှာ သွင်းယူခဲ့တဲ့ တိုက်စစ်မှူး မူအာနီရဲ့ တစ်လုံးတည်းသောဂိုးနဲ့ ကပ်အနိုင်ရခဲ့ပါတယ်။ ဒီဘရိုင်း၊ လူကာကူ၊ ဒိုကူတို့ပါဝင်တဲ့ ဘယ်ဂျီယံကလည်း ဂိုးရဖို့ကြိုးပမ်းခဲ့ပေမယ့် ပြင်သစ်ဂိုးသမား ကာကွယ်နေခဲ့လို့ ဂိုးရဖို့ ခက်ခဲခဲ့တာဖြစ်ပါတယ်။ ပြင်သစ်ဖက်မှာလည်း အမ်ဘတ်ပေ၊ သူရမ်၊ ဂရဇ်မန်း၊ တက်ချူအာမန်နီတို့ရဲ့ တိုးအားတွေ၊ ကန်ချက်တွေနဲ့ ဂိုးဂရဖို့ကြိုးပမ်းခဲ့ပြီး ပွဲဟာအကြိတ်အနယ်ရှိခဲ့တာတွေ့ရပါတယ်။
တစ်ဖက်က ပေါ်တူဂီနဲ့ ဆလိုဗေးနီးယားတို့ပွဲမှာတော့ ဆလိုဗေးနီးယားက ခံစစ်ပိတ်ကာ တန်ပြန်တိုက်စစ်နဲ့ ကစားခဲ့တာကိုတွေ့ရပါတယ်။ စီရော်နယ်ဒို ဦးဆောင်တဲ့ ပေါ်တူဂီကလည်း ဘရူနိုဖာနန်ဒက်၊ ဗာနာဒိုဆေးဗားတို့ရဲ့ ထိုးဖောက်ကန်သွင်းမှုတွေနဲ့ တိုက်စစ်မြှင့်ကစားခဲ့ပေမယ့် ဆလိုဗေးနီးယား ဂိုးသမား အကောင်းဆုံးကာကွယ်နေခဲ့လို့ ဂိုးရဖို့ ခက်ခဲ့ပါတယ်။ မိနစ် ၉၀ ပြည့်တဲ့အထိ နှစ်ဖက်လုံး ဂိုးမသွင်းနိုင်ခဲ့တာကြောင့် အချိန်ပို ဆက်ကစားခဲ့ရပါတယ်။
အချိန်ပို ပထမပိုင်းမှာ ပေါ်တူဂီတို့ ပင်နယ်တီရခဲ့တာကို ရော်နယ်ဒို ကန်သွင်းခဲ့ပေမယ့် ဆလိုဗေးနီးယားဂိုးသမား အိုဘလက် ပုတ်ထုတ်ကာကွယ်သွားခဲ့လို့ အခွင့်အရေး နစ်နာခဲ့ရပါတယ်။ ဆလိုဗေးနီးယားတို့ဟာလည်း ပေါ်တူဂီ နောက်ခံလူ ပီပီရဲ့ အမှားကတဆင့် ဂိုးသမားနဲ့ တစ်ယောက်ချင်းတွေ့ကာ အပိုင်းကန်သွင်းခွင့်ရခဲ့သေးပေမယ့် ဂိုးသမား ကော်စတာ ကာကွယ်သွားနိုင်ခဲ့တာဖြစ်ပါတယ်။ ဒီလိုနဲ့ မိနစ် ၁၂၀ ပြည့်တဲ့အထိ ဂိုးမသွင်းနိုင်ခဲ့တာကြောင့် ပင်နယ်တီ အဆုံးအဖြတ် ခံယူခဲ့ရပါတယ်။
ယင်းမှာ ဆလိုဗေးနီးယားတို့ဘက်က ကန်တဲ့ ပင်နယ်တီ သုံးလုံးကို ပေါ်တူဂီဂိုးသမား ဒီယေဂို ကော်စတာ အံ့အားသင့်ဖွယ် လက်စွမ်းနဲ့ ကာကွယ်ပြသွားခဲ့ပါတယ်။ ပေါ်တူဂီဖက်က ရော်နယ်ဒို၊ ဘရူနို ဖာနန်ဒက်နဲ့ ဗာနာဒိုဆေးဗားတို့ ဂိုးဝင်အောင် ကန်နိုင်ခဲ့တာကြောင့် အဆုံးမှာ ပေါ်တူဂီတို့ ၃-၀ နဲ့နိုင်ပြီး ကွာတားတက်ခဲ့ပါတယ်။
ပင်နယ်တီ သုံးလုံးဆက် ကာကွယ်ခဲ့တဲ့ ဂိုးသမား ကော်စတာဟာ ယူရိုပြိုင်ပွဲသမိုင်းတလျှောက် ပထမဆုံး ဂိုးသမားအဖြစ် မှတ်တမ်းဝင်ခဲ့တယ်လို့သိရပါတယ်။
ဒီနေ့ပွဲနိုင်ခဲ့ကြတဲ့ ပြင်သစ်နဲ့ ပေါ်တူဂီတို့နှစ်သင်းဟာ ကွာတားမှာ ထိပ်တိုက်ဆုံတွေ့ရမှာလည်းဖြစ်ပါတယ်။
