ဧရာ၀တီမြစ်ရေသည် ကချင်ပြည်နယ်၊ မြစ်ကြီးနားမြို့တွင် ယနေ့ ဇူလိုင်လ (၂) ရက်တွင်လည်း စိုးရိမ်ရေအမှတ်အထက် (၄)ပေခွဲခန့် ဆက်ရှိနေကာ နောက်(၂)ရက်အတွင်း စိုးရိမ်ရေမှတ်အောက်သို့ ပြန်လည်ကျဆင်းနိုင်ကြောင်း မိုးလေဝသနှင့် ဇလဗေသညွှန်ကြားမှုဦးစီးဌာနက ထုတ်ပြန်အသိပေးထားသည်။
မိုးသည်းထန်စွာ ရွာသွန်းမှုကြောင့် ဧရာဝတီမြစ်ရေ စိုးရိမ်ရေမှတ်ထက် ကျော်လွန်ကာ မြစ်ကြီးနားမြို့ရှိ လူနေရပ်ကွက်များအတွင်း ရေဝင်နစ်မြုပ်မှုများ ဖြစ်ပေါ်နေသည့်အတွက် အိမ်ထောင်စု (၂၀၀၀) ဝန်းကျင် ဘေးလွတ်ရာသို့ ယာယီတိမ်းရှောင်နေကြရသည့်အခြေအနေဖြစ်သည်။
လက်ရှိတွင် ယာယီရေဘေးကယ်ဆယ်ရေးစခန်းများဖွင့်လှစ်ကာ ပိတ်မိနေသူများအား အရေးပေါ်ကူညီကယ်ဆယ်ရေးလုပ်ငန်းများ ဆောင်ရွက်နေရဆဲဖြစ်ကြောင်း ဒေသတွင်း သတင်းရင်းမြစ်များထံမှ သိရသည်။
မိုးလေဝသနှင့် ဇလဗေဒညွှန်ကြားမှု ဦးစီးဌာနက ယနေ့နံနက်ပိုင်း ထုတ်ပြန်ချက်အရ ချင်းတွင်းမြစ်ရေသည်လည်း ခန္တီးမြို့၏ စိုးရိမ်ရေမှတ်အထက်သို့ (၅) ပေခွဲခန့်သို့ရောက်ရှိနေကာ နောက်(၁)ရက်အတွင်း (၄) ပေခန့် မြင့်တက်လာနိုင်သေးသည်ဟု မိုး/ဇလက ထုတ်ပြန်ထားသည်။
ထို့ပြင် ချင်းတွင်းမြစ်ရေသည် ဟုမ္မလင်းမြို့၏ စိုးရိမ်ရေအမှတ် ပေဝက်ခန့်သို့ရောက်ရှိနေပြီး တစ်ရက်အတွင်း (၄) ပေခန့်မြင့်တက်လာမည်ဟု မိုး/ဇလက ဆိုသည်။
ထို့ကဲ့သို့ မြစ်ရေတက်နေမှုများကြောင့် ခန္တီးမြို့နှင့် ဟုမ္မလင်းမြိူ့နယ်များ အတွင်းရှိ အနိမ့်ပိုင်း ရပ်ကွက်များနှင့် မြစ်ကမ်းပါး အနီးနေထိုင်သူများအနေဖြင့် အထူးသတိပြုနေထိုင်ကြရန် မိုး/ဇလက သတိပေးထားသည်။
