အမျိုးသားအဆင့် ကာကွယ်ဆေးထိုးလုပ်ငန်းဆိုင်ရာ မဟာ ဗျူဟာရေးဆွဲရာတွင် အရည်အသွေးပြည့်ဝ၍ လက်တွေ့ အသုံးဝင်သော မဟာဗျူဟာအဖြစ် ရေးဆွဲရန် လိုအပ်ကြောင်း ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာ သက်ခိုင်ဝင်းက ပြောကြားသည်။
ကျန်းမာရေးဝန်ကြီးဌာန၊ ပြည်သူ့ကျန်းမာရေးဦးစီးဌာန ဗဟိုတိုးချဲ့ကာကွယ်ဆေးထိုး လုပ်ငန်းဌာနခွဲမှ ရေးဆွဲပြုစုလျက်ရှိသော အမျိုးသားအဆင့် ကာကွယ်ဆေးထိုးလုပ်ငန်းဆိုင်ရာ မဟာဗျူဟာ (၂၀၂၅-၂၀၂၉) National Immunization Strategy (NIS) (2025-2029) ရှင်းလင်းတင်ပြခြင်း အစည်းအဝေးကို ဇူလိုင် (၃)ရက်က ကျန်းမာရေးဝန်ကြီးဌာန၌ ကျင်းပစဉ် ပြည်ထောင်စုဝန်ကြီးက ပြောကြားခဲ့ခြင်းဖြစ်သည်။
အစည်းအဝေးတွင် ကျန်းမာရေးဝန်ကြီးဌာန ပြည်ထောင်စုဝန်ကြီးက ယခုရေးဆွဲလျက်ရှိသော National Immunization Strategy သည် မြန်မာနိုင်ငံ၏ ကာကွယ်ဆေးထိုး လုပ်ငန်းနှင့်ပတ်သက်၍ (၂၀၂၅) ခုနှစ်မှ (၂၀၂၉) ခုနှစ်အထိ (၅) နှစ်အတွင်း ဆက်လက်ဆောင်ရွက်မည့် လုပ်ငန်းများအတွက် အရေးကြီးသော လမ်းပြမြေပုံ တစ်ခုဖြစ်ကြောင်း၊ နောင်အနာဂတ် (၁၀)နှစ်တာအတွက် မျှော်မှန်းရလဒ်များ ရရှိစေရေး (၅)နှစ်တာ ဆောင်ရွက်ရမည့် လုပ်ငန်းများကို ရေးဆွဲပြုစုထားခြင်းဖြစ်ကြောင်း ပြောကြားသည်။
ထို့ပြင် ကာကွယ်ဆေးထိုးလုပ်ငန်းတွင် ပါဝင်ဆောင်ရွက်နေသူများ အားလုံးဆောင်ရွက်ရမည့် လုပ်ငန်းများနှင့် ပတ်သက်၍ နည်းဗျူဟာဆိုင်ရာ လမ်းညွှန်မှုအနေဖြင့် အသုံးပြုနိုင်ရန်အတွက်ဖြစ်ကြောင်း၊ အမျိုးသားအဆင့် ကာကွယ်ဆေးထိုးလုပ်ငန်းဆိုင်ရာ မဟာဗျူဟာရေးဆွဲရာတွင် ကာကွယ် ဆေးထိုးနှံ တိုက်ကျွေးခြင်း လုပ်ငန်းအတွက် လိုအပ်သော အရင်းအမြစ်များ၊ ကုန်ကျစရိတ်များကို ခန့်မှန်းတွက်ချက်ခြင်း၊ ကြုံတွေ့လာနိုင်သော အခက်အခဲများကို ဖြေရှင်းမည့် နည်းလမ်းများ ဖော်ထုတ်ခြင်းတို့ကို ထည့်သွင်းရေးဆွဲရန် လိုအပ်ကြောင်း ဆက်လက် ပြောကြားခဲ့သည်။
ထို့ပြင် ဝေးလံခက်ခဲသော (Hard to reach) ဒေသများအတွက် အထူးစီမံချက်များ ရေးဆွဲခြင်း၊ အစုအဝေးနှင့် နေထိုင်သောစုရပ်များနှင့် ကာကွယ်ဆေးထိုး လွမ်းခြုံမှုခက်ခဲသောဒေသများတွင် ကာကွယ်ဆေးထိုးလွှမ်းခြုံမှု မြင့်မားလာစေရန်ဆောင်ရွက်ရမည့်အချက်များ ထည့်သွင်းရေးဆွဲရန်လိုအပ်ကြောင်းလည်း ပြည်ထောင်စုဝန်ကြီးက ဆိုသည်။
ကာကွယ်ဆေးထိုးနှံ တိုက်ကျွေးရန် အကျုံးဝင်သူ တစ်ဦးတစ်ယောက်မျှ မကျန်ရှိစေရေးနှင့် တိကျ မှန်ကန်သောကိန်းဂဏန်း အချက်အလက်များ ရရှိစေရေး၊ ကာကွယ်ဆေး လိုအပ်ချက်များအတွက် ဦးစားပေး ဆောင်ရွက်စေရေး၊ ကာကွယ်ဆေးထိုးနှံခြင်းများကို ပဏာမကျန်းမာရေးစောင့်ရှောက်မှုနှင့် ပေါင်းစပ် ဆောင်ရွက်ခြင်းဖြင့် ကျန်းမာရေးစောင့်ရှောက်ပေးမှုများ တိုးတက်လာစေရေးတို့အတွက် လို အပ်သော စွမ်းအားစုများကို ခန့်မှန်းတွက်ချက်ပြီး ထည့်သွင်းဖော်ပြရန် လိုအပ်ကြောင်း ဝန်ကြီးက ဆိုသည်။
၎င်း National Immunization Strategy (2025-2029) (၅) နှစ် တာရေးဆွဲရာတွင် အရည်အသွေးပြည့်ဝ၍ လက်တွေ့ အသုံးဝင်သော မဟာဗျူဟာရေးဆွဲနိုင်ရေးအတွက် တက်ရောက်လာသူများအားလုံး ဝိုင်းဝန်းဆွေးနွေးအကြံပြုပေးရန်လည်း ပြောကြားခဲ့သည်။
ထို့နောက် ပြည်သူ့ကျန်းမာရေးဦးစီးဌာန တိုးချဲ့ကာကွယ်ဆေးထိုးလုပ်ငန်းဌာနခွဲမှ ညွှန်ကြားရေးမှူး ဒေါက်တာတင်သစ္စာလွင်က National Immunization Strategy (2025 -2029) ရေးဆွဲရသည့် ရည်ရွယ်ချက်များ၊ ကမ္ဘာ့ကျန်းမာရေးအဖွဲ့မှ အကြံပေး ပုဂ္ဂိုလ် Dr. David Sulaberidze က ရေးဆွဲထားသော National Immunization Strategy (20 25-2029) (မူကြမ်း) ကို ရှင်းလင်းတင်ပြပြီး တက်ရောက် လာသူများက ပြန်လည်ဆွေးနွေးကြသည်။
အစည်းအဝေးသို့ ကျန်းမာရေးဝန်ကြီးဌာနမှ ညွှန်ကြားရေးမှူးချုပ်များ၊ အမျိုးသားအဆင့် ကာကွယ်ဆေးထိုး လုပ်ငန်းဆိုင်ရာ နည်းပညာအကြံပေးအဖွဲ့နှင့် တိုးချဲ့ကာကွယ်ဆေးထိုးလုပ်ငန်းဆိုင်ရာစီမံခန့်ခွဲမှုကော်မတီတို့မှ တာဝန်ရှိသူများ၊ ဆက်စပ်ဝန်ကြီးဌာနများက တာဝန်ရှိသူများ၊ မြန်မာနိုင်ငံမိခင်နှင့် ကလေးစောင့်ရှောက်ရေးအသင်း၊ မြန်မာနိုင်ငံအမျိုးသမီးရေးရာအဖွဲ့ချုပ်၊ မြန်မာနိုင်ငံကြက်ခြေနီအသင်း၊ ကမ္ဘာ့ကျန်းမာရေးအဖွဲ့ (WHO)၊ ကုလသမဂ္ဂ ကလေးများရန်ပုံငွေအဖွဲ့ (UNICEF) နှင့် Clinton Health Access Initiative (CHAI) အဖွဲ့တို့မှ တာဝန်ရှိသူများ တက်ရောက်ကြကြောင်း သိရသည်။
