ရှမ်းယူနိုက်တက်အသင်းမှ ကျောနံပါတ် (၂) ဇွဲခန့်မင်းအား အနီးစပ်ဆုံး(၂)ပွဲ ပါဝင်ကစားခွင့်မပြုရန်နှင့် ဒဏ်ကြေးငွေငါးသိန်းကျပ် (၅၀၀,၀၀၀/-) ပေးဆောင်ရန် ယမန်နေ့ ဇူလိုင်(၁၀)ရက်က မြန်မာနိုင်ငံဘောလုံးအဖွဲ့ချုပ်၊ စည်းထိန်း/ကျင့်ဝတ်ကော်မတီမှ ပြစ်ဒဏ်ချမှတ်ခဲ့ကြောင်း သိရသည်။
ဇူလိုင်လ (၇) ရက်က ရှမ်းယူနိုက်တက်အသင်းနှင့် မြဝတီအသင်းတို့ Myanmar National League 2024- 2025 ပွဲစဉ် (၁)အဖြစ် တောင်ကြီးမြို့ ပြည်နယ်အားကစားကွင်း၌ ကျင်းပခဲ့ရာတွင် ပထမပိုင်း အချိန်ပို ၄၅+၁ မိနစ်ခန့်၌ ရှမ်းယူနိုက်တက်အသင်းမှ ကျောနံပါတ် (၄) သက်ဟိန်းစိုးနှင့် မြဝတီအသင်းမှ ကျောနံပါတ် (၁၇) နိုင်ဇင်ထက်တို့ ဘောလုံးယှဉ်လုရာမှ အချင်းများခဲ့ရာ နှစ်ဘက်ကစားသမားများ ပါဝင်လာပြီးနောက် ကွင်းလယ်ဒိုင်လူကြီးနှင့် အကူဒိုင်နှစ်ဦးတို့မှ ဝင်ရောက်ဖျန်ဖြေနေချိန်အတွင်း ရှမ်းယူနိုက်တက်အသင်းမှ ကျောနံပါတ်(၂) ဇွဲခန့်မင်းသည် မြဝတီအသင်းမှ ကျောနံပါတ် (၁၀) ရဲမိုးယံအား ဥပဒေပြင်ပ ရင်ဘတ်သို့ဆောင့်တွင်းခဲ့ရာ ပြိုင်ဘက်ကစားသမား လဲကျသွားခဲ့ရခြင်းဖြစ်သည်။
ထို့နောက် ကွင်းလယ်ဒိုင်လူကြီးမှ တာဝန်ကျ ဒိုင်လူကြီးများနှင့် ဖြစ်စဉ်အား သုံးသပ်၍ ရှမ်းယူနိုက်တက်အသင်းမှ ကျောနံပါတ် (၂) ဇွဲခန့်မင်းအား အချိန်ပို (၄၅+၃)မိနစ်တွင် အဝါကတ်ပြားပြသခဲ့သည်။
အဝါကတ်ပြသခံရပြီးနောက် ကွင်းလယ်ဒိုင်လူကြီးအား မကျေမနပ်ရန်လိုသော အပြုအမူပြုလုပ်ခဲ့ခြင်း၊ အရှေ့ဘက်ပွဲကြည့်စင်တန်းမှ ပရိသတ်များပါ ကွင်းလယ်ဒိုင်လူကြီးအား ဆဲဆိုသည့်အထိ ဖြစ်ပေါ်ပြီး မလိုလားအပ်ဘဲ ပွဲစဉ်အား ရုပ်ဆိုးအကျည်းတန်စေသည့်ဖြစ်ရပ်ဖြစ်ပေါ်ခဲ့ခြင်းအတွက် ပွဲချိန်အတွင်း အဝါကတ်ပြားသာ ပြသခံခဲ့ရသည့် ဇွဲခန့်မင်းအား ၎င်း၏ လုပ်ရပ်နှင့် ပတ်သက်၍ မြန်မာနိုင်ငံဘောလုံးအဖွဲ့ချုပ် စည်းကမ်းထိန်းသိမ်းရေးနှင့် ကျင့်ဝတ်ကော်မတီက သီးခြားအရေးယူမှု ပြုလုပ်ခဲ့ခြင်းဖြစ် သည်။
အထက်ပါ ဖြစ်စဉ်အတွက် MFF စည်းကမ်းထိန်းသိမ်းရေးနှင့် ကျင့်ဝတ်ကော်မတီအနေဖြင့် ယမန်နေ့ ဇူလိုင် (၁၀) ရက် နံနက်ပိုင်းက အစည်းအဝေးပြုလုပ်ပြီး ယင်းပွဲစဉ်တွင် တာ ဝန်ထမ်းဆောင်ခဲ့ကြသည့် ဒိုင်လူကြီးများအား ခေါ်ယူမေး မြန်းခြင်း၊ ဒိုင်ကြီးကြပ်နှင့် ပြိုင်ပွဲကြီးကြပ် အစီရင်ခံစာတို့အား ပြန်လည်သုံးသပ်ခြင်း၊ ဖြစ်စဉ်အားရိုက်ကူးထားသည့် ရုပ်သံဖိုင်အား အသေးစိတ်ပြန်လည်ကြည့်ရှုပြီးနောက် ယခုလို ပြစ်ဒဏ်ချမှတ်ခဲ့ခြင်းလည်းဖြစ်သည်။
MFF စည်းထိန်း/ကျင့်ဝတ်ကော်မတီမှ ပချမှတ်သည့် ပြစ်ဒဏ်မှာ ရှမ်းယူနိုက်တက်အသင်းမှ ကျောနံပါတ်(၂) ဇွဲခန့်မင်း အား MNL 1 & 2 League 2024-2025 Regulations ပြိုင်ပွဲကျင်းပရေးစည်းမျည်း/ စည်းကမ်းထိန်းသိမ်းရေးမူ အပိုဒ် (၁၀)နှင့် (၁၈) တို့အရ အနီးစပ်ဆုံး(၂)ပွဲ ပါဝင်ကစားခွင့်မပြုရန်နှင့် ဒဏ်ကြေးငွေငါးသိန်းကျပ် (၅၀၀,၀၀၀/-) ပေးဆောင်ရန်ချမှတ်ခဲ့ခြင်းဖြစ်သည်။
ထို့ပြင် ရှမ်းယူနိုက်တက်အသင်း၏ တာဝန်ရှိသူများအနေဖြင့် နောက်နောင်ပြိုင်ပွဲများတွင် ကျန်ကစားသမားများကိုလည်း အလားတူဖြစ်ရပ်များမဖြစ်စေရန်အတွက် ပိုမိုထိန်းသိမ်းကြပ်မတ်ဆောင်ရွက်ပေးသွားရန် အသိပေးထားသည်။
အလားတူ MNL 1 & 2 League 2024- 2025 ပြိုင်ပွဲဝင်အသင်းများအားလုံး၏ တာဝန်ရှိအကြီးအကဲများ အနေ ဖြင့်လည်း ယှဉ်ပြိုင်မည့် ပွဲစဉ်များတွင် အလားတူဖြစ်ရပ်မျိုး မဖြစ်စေရန်အတွက် ကြပ်မတ်ဆောင်ရွက်ပေးပါရန် မေတ္တာရပ်ခံအပ်ကြောင်း အသိပေးချက်တွင်ပါရှိပြီး ယင်းဆုံးဖြတ်ချက်အပေါ် သိရှိ လိုက်နာနိုင်ပါရန် အသိပေးထားသည်။
