ရုရှားသည် ဒုတိယအကြိမ်ငြိမ်းချမ်းရေးဆွေးနွေးပွဲတက်ရောက်သင့်–ဇလန်းစကီး

ကိဗ်၊ဇူလိုင် ၁၅

စစ်ပွဲနှစ်နှစ်တာကာလသို့ရောက်ရှိလာပြီးနောက် ခရမ်လင်နှင့် ငြိမ်းချမ်းရေးဖော်ဆောင်နိုင်ရန်အတွက် ယခုနှစ်ကုန်ပိုင်း၌ပြုလုပ်မည့် ဒုတိယအကြိမ်မြောက် ယူကရိန်းငြိမ်းချမ်းရေးထိပ်သီးအစည်းအဝေးကို ရုရှား သည် တက်ရောက်သင့်ကြောင်း ဇလန်းစကီးကပြောကြားခဲ့သည်။

ရုရှားနှင့်ယူကရိန်းတို့သည် ၂၀၂၂ ကပြုလုပ်ခဲ့သည့် နှစ်နိုင်ငံကိုယ်စားလှယ်များတွေ့ဆုံဆွေးနွေးမှုနောက်ပိုင်းတွင် ထပ်မံတွေ့ဆုံဆွေးနွေးရန် နှစ်နိုင်ငံလုံးက လက်ရှောင်နေခဲ့ကြခြင်းလည်းဖြစ်သည်။

ပြီးခဲ့သည့်လက ဆွစ်ဇာလန်၌ကျင်းပခဲ့သည့် ငြိမ်းချမ်းရေးထိပ်သီးဆွေးနွေးပွဲသို့ ရုရှားကိုမဖိတ်ကြားခဲ့သော်လည်း ကမ္ဘာ့နိုင်ငံခေါင်းဆောင်အသီးသီးကမူ ယူကရိန်း၏တရားမျှတသောဆုံးဖြတ်ချက်ကိုထောက်ခံသည်ဟုဆိုကြသည်။

နေတိုးကာကွယ်ရေးမဟာမိတ် ထိပ်သီးအစည်းအဝေးတက်ရန်အတွက် အမေရိကန်ပြည်ထောင်စုသို့ရောက်ရှိပြီးနောက်၌ပြုလုပ်သည့် သတင်းစာရှင်းလင်းပွဲ၌ ဇလန်းစကီးက မော်စကိုမှတာဝန်ရှိသူများနှင့် တိုက်ရိုက်တွေ့ဆုံဆွေးနွေးရန်တံခါးဖွင့်ထားကြောင်း ပြောကြားခဲ့သည်။

ရုရှားကိုယ်စားလှယ်များအနေဖြင့် ဒုတိယအကြိမ်မြောက်ထိပ်သီးအစည်းအဝေးကို တက်ရောက်သင့်သည်ဟုယုံကြည်ကြောင်းလည်း ဇလန်းစကီးကဆက်လက်ပြောကြားခဲ့သည်။

Source : အေအက်ဖ်ပီ/အေတီ